Aelõñ eo an Anij ej juon kien ilañ. Aelõñ in enaaj jol̦o̦k aolep kien ko an armej im enaaj kõm̦m̦an bwe en jim̦or tõprak ankilaan Anij ilañ im bareinwõt ioon lal̦. Ennaan eo kõn Aelõñ eo an Anij ej juon ennaan ekanooj em̦m̦an. Etke? Kõnke armej ro rekõn̦aan im rej aikuji juon kien em̦m̦an ñan tõl er. Aelõñ eo wõt an Anij enaaj katõprake men in. Kien in an Anij enaaj kõm̦m̦an bwe aolep armej ro rej mour ioon lal̦ in ren mour ilo aenõm̦m̦an im jokwane ippãn doon.​—Riit Daniel 2:44; Matu 6:9, 10; 24:14.

Ilo juon aelõñ ak kien, ewõr juon ri tõl ak kiiñ. Ilo Aelõñ eo an Anij, Jeova ear jitõñ Nejin, Jesus Christ, bwe en Kiiñ.​—Riit Revelesõn 11:15.

Nejin Anij ej Kiiñ eo elukkuun em̦m̦an kõnke ejouj im eperan in kõm̦m̦ani men ko rejim̦we. (Matu 11:28-30) Bareinwõt, ewõr an kajoor im maroñ ñan jipañ armej ro kõnke enaaj tõl armej ro rej mour ioon lal̦ in jãn ijo jikin ilañ. Ãlikin an kar jerkakpeje, ear weaakl̦o̦k ñan lañ, im kõttar ituanbijmaroñin Jeova m̦ae tõre eo Anij enaaj kairooj e. (Hibru 10:12, 13) Tokãlik, Anij ear lel̦o̦k kajoor im maroñ bwe en jino an irooj ak tõl.​—Riit Daniel 7:13, 14.

Juon kumi me Baibõl̦ ej n̦aetaer “ro rekwõjarjar” renaaj irooj ak tõl ippãn Jesus ilañ. (Daniel 7:27) Ro rekwõjarjar im kar kããlõt er m̦oktata kar rijjelõk ro retiljek an Jesus. Ñan kiiõ, Jeova ej wõnm̦aanl̦o̦k wõt im kããlõt em̦m̦aan im kõrã ro retiljek bwe  ren irooj ak tõl ippãn Jesus. Ãinwõt kar Jesus, armej rein renaaj jerkakpeje im mour ilañ.​—Riit Jon 14:1-3; 1 Korint 15:42-44.

Jete armej renaaj etal ñan ilañ? Jesus ear ba bwe ro renaaj mour ilañ rej ãinwõt juon “bwij edik.” (Luk 12:32) Oran aolep armej rein me renaaj etal ñan lañ ej 144,000. Renaaj irooj ak tõl ippãn Jesus ioon armej ro ilo lal̦ in.​—Riit Revelesõn 14:1.

Aelõñ eo an Anij ear jutak ilo kar iiõ eo 1914. * Ta men eo m̦oktata Jesus ear kõm̦m̦ane ãinwõt Kiiñ ak Ri Tõl eo an Aelõñ eo? Eokwe, ear jolal̦tak Setan im enjel̦ ro an renana jãn lañ. Joñan an kar Setan lukkuun illu ear jino an kõm̦m̦an poktak ipel̦aakin lal̦ in. (Revelesõn 12:7-10, 12) Jãn kar iien in, ear l̦apl̦o̦k wõt nana ilo lal̦ in. Men ko ãinwõt tarin̦ae, ñũta, nañinmej ko rel̦l̦ap im m̦akũtkũt lal̦ rej kam̦ool im “kakõl̦l̦en” bwe m̦õttan jidik Aelõñ eo enaaj jino an tõl aolep armej ro ilo lal̦ in.​—Riit Luk 21:7, 10, 11, 31.

Aelõñ eo an Anij em̦õj an jino kakuktok elõñ armej ro jãn ipel̦aakin lal̦ in bwe ren bõrokuk ippãn doon. Aelõñ eo an Anij ear kõm̦m̦ane men in ikijjeen jerbal in kwal̦o̦k naan eo me ej wal̦o̦k ipel̦aakin lal̦. Elõñ milien armej ro rej kiiõ mour ium̦win Aelõñ eo an Anij im rej watõk Jesus ãinwõt aer Kiiñ ak Ri Tõl. Aelõñ eo an Anij enaaj kõjparok armej rein ilo iien eo enaaj ko̦kkure jukjuk im pãd in enana ilo lal̦ in. Aolep ro me rekõn̦aan bõk jeraam̦m̦an ko jãn Aelõñ eo an Anij rej aikuj kate er im kõttãik er ñan Jesus.​—Riit Revelesõn 7:9, 14, 16, 17.

Ium̦win naaj 1,000 iiõ ko, Aelõñ eo an Anij enaaj kajejjet aolep men ko Anij ear kõn̦aan kõm̦m̦ani ñan armej ro jãn kar jinoin. Aolepen lal̦ in enaaj erom juon pedetaij. Ãliktata, Jesus enaaj kajepl̦aak Aelõñ eo bwe en pãd ium̦win tõl eo an Jemen. (1 Korint 15:24-26) Ewõr ke armej en̦ kwõjel̦ã kajjien im kokõn̦aan bwebwenato ippãn kõn Aelõñ eo an Anij?​—Riit Sam 37:10, 11, 29.