Ñe juon armej ej iioon jorrããn ak jerata, eitok wõt bwe en kajjitõk “Etke?” El̦ap ad m̦õn̦õn̦õ im kam̦m̦oolol bwe Baibõl̦ eo ej letok uwaak ko ralikkar ñan kajjitõk in!

1. Ewi wãween an kar Setan jino bõktok nana ñan lal̦ in?

Setan Tepil̦ eo ear jum̦ae Anij. Setan ear kõn̦aan irooj ioon ro jet, innem ear kapoik armej ro m̦oktata, Adam im Iv, ñan kobal̦o̦k ippãn im jum̦ae Anij. Setan ear kõm̦m̦ane men in ilo an kar riab ñan Iv. (Jenesis 3:1-5) Ear kõm̦m̦an bwe Iv en l̦õmn̦ak bwe Jeova ear kõm̦m̦ane juon men ejjab jim̦we ilo an dãpiji juon men em̦m̦an jãne. Ilo an ba men in, ej ãinwõt ñe ej ba bwe armej ro renaaj m̦õn̦õn̦õl̦o̦k ñe rejjab pokake Anij. Riab eo kein kajuon Setan ear ba ñan Iv ej bwe eban mej. Eñin unin, Baibõl̦ ej n̦aetan Setan “ri-riab im jemãn aolep ri-riab.”​—Jon 8:44.

2. Ta eo Adam im Iv rar kããlõt ñan kõm̦m̦ane?

Jeova ear lukkuun jouj ikijjeen men ko ear lil̦o̦k ñan Adam im Iv. Ear ba bwe remaroñ m̦õñã jãn jabdewõt wõjke ilo jikin kallib in Iden ijello̦kun wõt juon wõjke. (Jenesis 2:15-17) Meñe ear ba men in, ak Adam im Iv rar kããlõt ñan m̦õñã jãn leen wõjke in. Iv “ear bõk jãn leen, im m̦õñã.” Innem tokãlik Adam ‘ear bar m̦õñã.’ (Jenesis 3:6) Erro jim̦or rar jab pokake Anij. Kõnke Adam im Iv rar weeppãn, ear piktokier bwe ren kar kõm̦m̦ane men eo ejim̦we. Bõtab kõnke rar kããlõt ñan jab pokake Anij, rar jerawiwi im jum̦ae maroñ eo an Anij ñan tõl er. Kõn wõt jokãlõt eo aerro, rar iioon el̦ap eñtaan.​—Jenesis 3:16-19.

3. Ewi wãween an kar jokãlõt eo an Adam im Iv jelõte kõj?

Ke Adam im Iv rar jerawiwi, rar oktak im jab weeppãn, im itok jãn aerro ãindein aolep ro ineerro rar jolõt jab weeppãn. Baibõl̦ ej kõnono kõn Adam im ba: “Kõn juon wõt armej, jerawiwi ear del̦o̦ñ ilo lal̦ in im mej ear wal̦o̦k kõn wõt jerawiwi, im mej ear ajeeded ñan aolep armej.”​—Rom 5:12.

Elõñ un ko unin ad eñtaan. Jet iien jej eñtaan itok jãn jokãlõt ko renana jej kõm̦m̦ani. Jet iien jej eñtaan kõn wõt jokãlõt ko renana an ro jet. Im jet iien jej eñtaan kõnke jej pãd ilo juon jikin ilo iien eo ej wal̦o̦k jorrããn ie me jaar jab kõtmãne kake.​—Riit Ekklisiastis 9:11, UBS.

 KAM̦WILAL̦L̦O̦K AM̦ MEL̦EL̦E

4. Eo ej wũnjãn eñtaan ko jej iiooni

Elõñ rej tõmak bwe Anij ej kõjbwebweik aolepen lal̦ in. M̦ool ke men in? Kõjo̦e PIJAIN ALWÕJ eo.

Riit Jemes 1:13 im 1 Jon 5:19, innem bwebwenato kake kajjitõk in:

• Anij ej ke wũnjãn eñtaan im men ko renana rej wal̦o̦k?

5. L̦õmn̦ak kõn men ko rej wal̦o̦k itok jãn an Setan irooj ioon lal̦ in?

1. Adam im Iv rar weeppãn im mour ilo Pedetaij. Bõtab rar roñjake Setan im jum̦ae Jeova

2.   Ãlikin aer jum̦ae, lal̦ in ear obrak kõn jerawiwi, eñtaan, im mej

3. Jeova enaaj kõjem̦l̦o̦k jerawiwi, eñtaan, im mej. Armej renaaj bar weeppãn im mour ilo Pedetaij

6. Jeova ej kea kõn ad eñtaan

Anij ej ke kea kõn ad eñtaan? L̦õmn̦ak kõn naan ko an Kiiñ Devid im rijjilõk Piter. Riit Sam 31:7 im 1 Piter 5:7, innem bwebwenato kake kajjitõk in:

• Ewi wãween am̦ eñjake ilo am̦ jel̦ã bwe Jeova ej loe im ej kea ñe jej iioon eñtaan?

 TARLEP IN KATAK EO ILO TUKADU

Setan Tepil̦ eo im armej ro ruo jinointata rej unleplepin an wal̦o̦k men ko renana ilo lal̦ in. El̦ap an Jeova kea kõn eñtaan ko jej iiooni, im m̦õttan jidik enaaj jol̦o̦k ad eñtaan.

Ãlij

• Riab ta eo Setan Tepil̦ ear ba ñan Iv?

• Kõnke Adam im Iv rar jum̦ae, ewi wãween an men in jelõt kõj aolep?

• Ewi wãween ad jel̦ã bwe Jeova ej kea kõn ad eñtaan?