1, 2. (1) Ia eo Samuel ear kũrtok armej ro ñane, im ñããt eo ear kõm̦m̦ane men in? (2) Etke Samuel ear aikuj jipañ armej ro bwe ren ukel̦o̦k?

 SAMUEL ear reilo̦k ñan armej ro. Elõñ iiõ in an Samuel jerbal ãinwõt juon rũkanaan im riekajet. Im ej kab m̦õj an kũrtok aolep armej rein ñan bukwõn in Gilgal bwe ren roñjake ta eo ej pojak in ba ñan er. Ilo kar tõre in, ej kab jino iien det im iien m̦adm̦õd wiit. Iien in ear wal̦o̦k ilo allõñ in Mãe ak Juun ekkar ñan kõl̦õn̦ta eo ad ilo raan kein. Ke armej ro rar kobatok, aolepeer rar ikõñ wõt. Ak ewi wãween an Samuel maroñ ukot bũrueer?

² Armej rein rar jab mel̦el̦e kõn joñan an kar lukkuun nana kajjitõk eo rar bõkm̦aantak. Rar akwel̦ap bwe ren kããlõt juon armej bwe en aer kiiñ im rũtõl. Rein rar jab kile bwe aer kar kajjitõk kõn men in ear juon jerawiwi el̦ap im rar jab kautiej Anij eo aer, Jeova, im bareinwõt rũkanaan eo an. Ear ãinwõt ñe rar jol̦o̦k Jeova jãn an Kiiñ ioer! Ta eo Samuel emaroñ kar kõm̦m̦ane ñan jipañ armej rein bwe ren ukel̦o̦k?

3, 4. (1) Etke Samuel ear kwal̦o̦k ñan RiIsrael ro kõn iien ko ear juon ajri? (2) Etke joñak eo an Samuel ewõr tokjãn ñan kõj?

³ Samuel ear ba ñan armej ro: “Ña irũtto im bwijwol̦ã.” Ilo tõre in, Samuel ear l̦al̦l̦ap im uwan̦ kool̦an bõran. Men in ear kõm̦m̦an bwe armej ro ren kwal̦o̦k aer kautiej im roñjake men ko ej ba. Ãlikin, ear wõnm̦aanl̦o̦k wõt im ba: “Iar etetal im̦aami jãn ke iar ajri ñan rainin.” (1 Sa. 11:14, 15; 12:2) Meñe Samuel ear l̦al̦l̦ap, ak ear em̦m̦an wõt an keememeji men ko rar wal̦o̦k ñane ke ear ajri. Pepe  ko ear kõm̦m̦ani ke ear rũtto m̦aantak rar jipañe bwe en kajoor tõmak eo an im tiljek wõt ñan Anij eo an, Jeova.

⁴ Samuel ear aikuj kakajoore im dãpiji wõt tõmak eo an kõnke enañin aolep iien armej ro ear mour ibwiljier rar jab kwal̦o̦k aer tõmak im tiljek ñan Jeova. Ilo raan kein, ejjab bar pidodo ñan kõm̦m̦an bwe tõmak eo ad en kajoor wõt kõnke jej mour ilo juon jukjukun pãd enana im armej ro ie ejjel̦o̦k aer tõmak ilo Anij. (Riit Luk 18:8, UBS.) Jen lale ta eo jemaroñ katak jãn joñak eo an Samuel jãn ke ear juon ajri.

5, 6. (1) Etke ear lukkuun oktak wãween mour eo an Samuel ke ear juon ajri? (2) Etke jinen im jemãn Samuel rar jel̦ã bwe enaaj kar em̦m̦an aer lale Samuel ilo Shailo?

⁵ Ear lukkuun oktak wãween mour eo an Samuel ke ear juon ajri. Etke? Kõnke ãlikin wõt an kar bõjrak an ninnin ippãn jinen, bõlen ke ear jilu an iiõ ak rũttol̦o̦k jidik, ear jino jerbal ilo im̦õn kõppãd eo an Jeova ilo Shailo. Im̦õn kõppãd eo ear 20 jim̦a m̦ail̦ ettol̦o̦kin jãn ijo jikin etan Rema. Jinen im jemãn Samuel, Elkena im Hanna, rar ajel̦o̦k e bwe en jerbal ñan Jeova. Kõn men in, Samuel ear erom juon RũNazerait. a (Lale kõmel̦el̦e eo itulal̦.) Mel̦el̦ein ke bwe Elkena im Hanna rar kõjoole Samuel im jab yokwe e?

⁶ Elkena im Hanna rar jab kõjoole Samuel. Rar jel̦ã bwe Bũrij L̦apl̦ap Ilai enaaj kar lale Samuel kõnke ear jerbal ippãn. Ear bareinwõt wõr kõrã ro rar jerbal ilo im̦õn kõppãd eo. Kõn men in, jinen im jemãn Samuel rar jel̦ã bwe enaaj kar em̦m̦an aer lale l̦adik eo nejierro ilo Shailo.​—Ex. 38:8; Eka. 11:34-39.

7, 8. (1) Ewi wãween an kar jinen im jemãn Samuel jipañe im rejetake kajjojo iiõ? (2) Ta eo ro ewõr nejier ilo raan kein remaroñ katak jãn jinen im jemãn Samuel?

⁷ Hanna im Elkena rar jab mel̦o̦kl̦o̦k m̦aanje in nejierro ejitõnbõro me ear uwaakin jar eo an Hanna. Hanna ear kajjitõk ippãn Anij kõn juon nejin l̦addik im ear kallim̦ur bwe enaaj ajel̦o̦k l̦adik eo bwe en jerbal ñan E toon wõt an mour. Kajjojo iiõ ke Hanna ear lol̦o̦k Samuel, ej kõm̦m̦anel̦o̦k juon an kopã ekadu pein bwe en kein an jerbal ilo im̦õn kõppãd eo. Ealikkar bwe l̦adik in ear m̦õn̦õn̦õ kõn iien lotok ko an jinen im jemãn. Ejjel̦o̦k pere bwe ear lukkuun m̦õn̦õn̦õ ke jinen im jemãn rar rejetake im jipañe ñan kile bwe ej juon jeraam̦m̦an ñan jerbal ñan Jeova ilo im̦õn kõppãd eo.

 ⁸ Ro ewõr nejier ilo raan kein remaroñ katak jãn Hanna im Elkena. Ekkã an ro ewõr nejier l̦õmn̦ak wõt kõn aer kabwe aikuj ko an ajri ro nejier ak remel̦o̦kl̦o̦k kõn aikuj eo juon an ajri ro. Ta in? Ej bwe ren katakin er ñan epaake Jeova. Bõtab, jinen im jemãn Samuel rar kaorõk m̦oktata jem̦jerã eo an baam̦le eo aer ippãn Jeova. Men in ear l̦ap an jipañ Samuel bwe en rũttol̦o̦k im juon armej em̦m̦an.​—Riit Jabõn Kõnnaan 22:6, UBS.

9, 10. (1) Kar ewi joñan kilepen im wãween aer kar kõm̦m̦ane im̦õn kõppãd eo, im ta kar l̦õmn̦ak eo an Samuel kake? (Bar lale kõmel̦el̦e jidikdik eo.) (2) Ta kar jet iaan jerbal ko an Samuel ilo im̦õn kõppãd eo, im ewi wãween an ro reddik raan kein maroñ l̦oor joñak eo an?

⁹ Jemaroñ pijaikl̦o̦k an l̦adik eo rũtto kiiõ im jino make itoitak ilo tol̦ ko reddik ipel̦aakin Shailo. Ke ej pãd ioon tõl ko im reilal̦l̦o̦k ñan bukwõn eo, emaroñ kar lukkuun m̦õn̦õn̦õ ke ej lo im̦õn kõppãd eo an Jeova. Im̦õn kõppãd in ear juon jikin eokkwõjarjar. b (Lale kõmel̦el̦e eo itulal̦.) Kar kajutake enañin 400 iiõ ko m̦oktal̦o̦k, im Moses eo ekar jino tõl jerbal ko ñan kajutake. Eñin ijo armej ro rekõn itok im kabuñ ñan Jeova ie.

¹⁰ Samuel ear m̦õn̦õn̦õ ilo an jerbal ilo im̦õn kõppãd eo an Anij. Baibõl̦ ej ba: “Ilo iien eo ke Samuel ej l̦addik wõt, ear wõnm̦aanl̦o̦k wõt ilo an jerbal ñan [Jeova], im ekõn kõn̦ak juon nuknuk ekadu pein, kõm̦m̦an jãn linen.” (1 Sa. 2:18, UBS) An kar kadu pein kopã eo an Samuel ej kaalikkar bwe ear juon rijjipañ ñan bũrij ro ilo im̦õn kõppãd eo. Samuel ear jab juon bũrij. Ak jet iaan jerbal ko an ilo im̦õn kõppãd eo ej kõppel̦l̦o̦k kõjãm in jibboñ im etal in lale ta ko Ilai ej aikuji kõnke el̦al̦l̦ap kiiõ. Ear lukkuun m̦õn̦õn̦õ kõn jeraam̦m̦an kein ear bũki. Bõtab tokãlik, ear wal̦o̦k jet m̦anit relukkuun nana ilo im̦õn kõppãd eo im Samuel ear inepata im abn̦õn̦õ kaki.

11, 12. (1) Ta bõd l̦apl̦ap eo Hophni im Pinehas rar kõm̦m̦ane? (2) Ta m̦anit ko relukkuun nana Hophni im Pinehas rar kõm̦m̦ani ilo im̦õn kõppãd eo? (Bar lale kõmel̦el̦e jidikdik eo.)

¹¹ Ke Samuel ear dik wõt, ear lo jet m̦anit renana rar wal̦o̦k ilo im̦õn kõppãd eo. Ear wõr ruo nejin Ilai em̦m̦aan, etaer in Hophni  im Pinehas. Baibõl̦ ej ba: “L̦õm̦aro nejin Ilai rar armej nana. Rar kõjekdo̦o̦n [Jeova].” (1 Sa. 2:12, UBS) Hophni im Pinehas rar “armej nana” kõnke rar jab kautiej Jeova. Ear ejjel̦o̦k aerro kea kõn kien ko an Jeova im rar kõjekdo̦o̦n men ko ear kõn̦aan bwe ren kõm̦m̦ani. Wãween in ear tõllo̦k erro ñan aer kõm̦m̦ani men ko jet renana.

¹² Ear lukkuun alikkar kien ko an Anij ñan RiIsrael ro kõn eddo ko an bũrij ro im kõn ta ko rej aikuj kõm̦m̦ani ñe rej lel̦o̦k menin katok ko ilo im̦õn kõppãd eo. Ear wõr unin an kar Kien eo lukkuun tipdiki ta ko bũrij ro rej aikuj kõm̦m̦ani. Etke? Kõnke menin katok ko rar kõkkar kõn aolep karõk ko Anij ear kõm̦m̦ani ñan jol̦o̦k jerawiwi ko an armej ro bwe ren maroñ erreo im̦aan mejãn. Kar wãween eo de in bwe Anij en maroñ kajeraam̦m̦an im tõl er. Bõtab, Hophni im Pinehas rar tõl bũrij ro jet ilo nana bwe ren kõjekdo̦o̦n naanin jiroñ ko an Anij kõn menin katok ko im jab kwal̦o̦k aer kautiej. c​—Lale kõmel̦el̦e eo itulal̦.

13, 14. (1) Ewi wãween an kar men ko renana me rar wal̦o̦k ilo im̦õn kõppãd eo jelõt armej ro rem̦m̦an? (2) Ewi wãween an kar Ilai jab kajejjet eddo ko an meñe ear bũrij eo el̦ap im jemãn Hophni im Pinehas?

¹³ Pijaikl̦o̦k m̦õk an Samuel loe an bũrij ro kõm̦m̦ani m̦anit kein relukkuun nana im ejjel̦o̦k en̦ ej kajim̦weik er. Elõñ alen an kar loe an armej ro, ekoba ro rejeram̦õl, ro rettã, im ro rebũrom̦õj, jibadekl̦o̦k im̦õn kõppãd eo ilo aer kõjatdikdik bwe renaaj bõk kaenõm̦m̦an im kakajoor jãn Jeova. Bõtab, ke rar ro̦o̦l jãn im̦õn kõppãd eo, ear loe aer inepata, lukkuun bũrom̦õj, im jook. Ear bar loe an Hophni im Pinehas kwal̦o̦k aer jab kautiej kien ko an Jeova kõn mour erreo kõnke rar l̦õñ ippãn jet iaan kõrã ro rar jerbal ilo im̦õn kõppãd eo. (1 Sa. 2:22, UBS) Ta kar l̦õmn̦ak eo an Samuel ke ear lo men kein? Bõlen ear kõjatdikdik bwe Ilai enaaj kõm̦adm̦õdi men kein renana bwe ren jab bar wal̦o̦k.

 ¹⁴ Ilai wõt iaan armej ro ear wõr an maroñ ñan kõm̦adm̦õde apañ in ear wal̦o̦k kõnke e bũrij eo el̦ap. An eddo eo ñan kajim̦we jabdewõt jorrããn ko rar wal̦o̦k ilo im̦õn kõppãd eo. Im kõnke ej jemãn Hophni im Pinehas, ear bar an eddo ñan kajim̦we er kõnke men ko l̦õm̦arein nejin rar kõm̦m̦ani rar jab baj jelõt wõt er ak rar bar jelõt elõñ iaan armej ro ilo Israel. Bõtab, Ilai ear jab kajejjet eddo ko an meñe e kar jemãn Hophni im Pinehas, im meñe e kar bũrij eo el̦ap. Ear jab kajeik er ak kar jidik wõt an kar kõnnaan ñan l̦õm̦aro nejin. (Riit 1 Samuel 2:23-25, UBS.) En kar l̦ap an Ilai kajeik l̦õm̦aro nejin kõnke men ko renana rar kõm̦m̦ani rar tõllo̦kũn mej!

15. (1) Ta eo Jeova ear ba ñan Ilai? (2) Ta eo Ilai im baam̦le eo an rar kõm̦m̦ane ãlikin an Jeova kakkõl er?

¹⁵ Joñan an kar nanal̦o̦k wõt men ko rar wal̦o̦k, Jeova ear aikuj jilkinl̦o̦k “juon rũkanaan” ñan Ilai. Baibõl̦ ejjab kwal̦o̦k etan rũkanaan in, ak e eo ear kwal̦o̦k ñan Ilai kõn ta eo Jeova ej pojak in kõm̦m̦ane ñan e im baam̦le eo an. Jeova ear jiroñ Ilai: “Kwõj kautiej l̦õm̦aro nejũm̦ el̦apl̦o̦k jãn Ña.” Kõn men in, ear kanaan bwe enaaj juon wõt iien in an l̦õm̦aro renana nejin Ilai mej. Ear bar ba bwe baam̦le eo an Ilai enaaj l̦ap an eñtaan, im renaaj luuji jeraam̦m̦an eo aer ñan bõk jerbal in bũrij. Naanin kakkõl in ear ke kõm̦akũt baam̦le eo ñan aer kõm̦m̦an oktak ko? Baibõl̦ ej kwal̦o̦k bwe rar jab oktak.​—1 Sa. 2:27–3:1, UBS.

16. (1) Ta ko Baibõl̦ ej ba kõn Samuel? (2) Etke em̦m̦an ippam̦ men ko Baibõl̦ ej ba kõn Samuel?

¹⁶ Ewi wãween an kar aolep men kein renana jelõt Samuel? Ilo bwebwenato in kõn Samuel, ej kwal̦o̦k kõn an kar Samuel rũttol̦o̦k ilo an wõnm̦aanl̦o̦k wõt im kõm̦m̦ani men ko rem̦m̦an. Ñan waanjoñak, ilo 1 Samuel 2:18 (UBS) ej ba bwe “ear wõnm̦aanl̦o̦k wõt ilo an jerbal ñan Irooj” Jeova ilo tiljek. Meñe Samuel ear dik wõt, ak ear likũt jerbal eo an Anij m̦oktata ilo mour eo an. Im ilo eoon 21 ilo ejja jebta in wõt, ej ba kõn juon men el̦apl̦o̦k an em̦m̦an. Ej ba: “Samuel, ear rũttol̦o̦k ilo an jerbal ñan Irooj” Jeova. Mel̦el̦ein men in bwe ke ear rũttol̦o̦k, ear epaakel̦o̦k wõt Jemãn ilañ. El̦aññe jenaaj epaake Jeova ãinwõt kar Samuel, men in enaaj kõjparok im jipañ kõj bwe jen kõm̦m̦ani wõt men ko rem̦m̦an meñe jej pãd ibwiljin armej ro rej kõm̦m̦ani men ko renana.

17, 18. (1) Ewi wãween an jo̦dikdik ro maroñ l̦oor joñak eo an Samuel? (2) Ta eo ej kaalikkar bwe ear jim̦we kããlõt eo an Samuel ñan an tiljek wõt ñan Jeova?

¹⁷ Emaroñ kar pidodo an Samuel l̦õmn̦ak bwe emaroñ kõm̦m̦ane jabdewõt men ekõn̦aan kõnke bũrij eo el̦ap im l̦õm̦aro nejin  rar kõm̦m̦ani men ko renana. Jejjab aikuj jekpen im ba bwe jej kõm̦m̦ani men ko renana kõnke ro jet ekoba ro rej tõl ak lale kõj rej bar kõm̦m̦ani. Elõñ jo̦dikdik ro ilo raan kein rej l̦oor ejja joñak eo wõt an Samuel im rej wõnm̦aanl̦o̦k wõt im ‘jerbal ñan Jeova,’ meñe armej ro jet ipel̦aakier rej kõm̦m̦ani men ko renana im ejjab em̦m̦an joñak ko aer.

¹⁸ Ta eo ear wal̦o̦k ñan Samuel kõn an kar tiljek wõt ñan Jeova? Baibõl̦ ej ba: “Im l̦adik eo, Samuel, ear rũttol̦o̦k, im l̦apl̦o̦k an jitõnbõro ippãn Jeova, im bareinwõt ippãn armej ro.” (1 Sa. 2:26) Ealikkar bwe Samuel ear aorõk ippãn armej ro, el̦aptata ro rar yokwe Jeova im rar kautiej kien ko an. Jeova ear bar kaorõk Samuel kõn an kar tiljek wõt ñane. Im Samuel ear jel̦ã bwe Anij enaaj bõktok jem̦l̦o̦kin aolep jerbal ko renana rar wal̦o̦k ilo Shailo, ak ear jaje ñããt eo enaaj wal̦o̦k. Bõtab juon boñ, ear jel̦ã ñããt eo enaaj kar wal̦o̦k.

19, 20. (1) Ta eo ear wal̦o̦k ñan Samuel juon jimmarok ilo kar im̦õn kõppãd eo? (2) Ewi wãween an kar Samuel kõm̦m̦an ñan Ilai?

¹⁹ Ke ej jimmarok wõt im l̦aam̦ eo el̦ap ilo im̦õn kõppãd eo ejjañin kun, Samuel ej roñ an juon kũri. Ear l̦õmn̦ak bwe Ilai eo ear kũri. Kõn men in, Samuel ear jerkak im “ettõrl̦o̦k ñan ippãn Ilai.” Ilai em̦õj an l̦al̦l̦ap im epilo kiiõ. Kwõj ke pijaikl̦o̦k an Samuel ekkaiuriur im ettõrl̦o̦k bwe en lale ta eo Ilai ear aikuji? Joñan an kar ekkaiuriur, ear jab ekkõn̦ak an juuj. Meñe elõñ men ko Ilai ear kõm̦m̦ani me rar jab jim̦we, ak Samuel ear keememej wõt bwe Ilai ej bũrij eo el̦ap an Jeova. Eñin unin an kar Samuel kwal̦o̦k wõt an kautiej im jouj  ñane, im wãween in ej juon joñak em̦m̦an ñan kõj.​—1 Sa. 3:2-5, UBS.

²⁰ Samuel ear ko̦ruji Ilai im ba: “Ña e, bwe kwaar kũr eõ.” Ak Ilai ear ba bwe ear jab kũri im ear ba ñane bwe en jepl̦aak im kiki. Jilu alen an kar men in wal̦o̦k! Ãliktata, Ilai ej kab kile ta eo ej wal̦o̦k. Kõn wõt men ko renana rar wal̦o̦k ilo im̦õn kõppãd eo, ear jeja an Jeova lel̦o̦k pijen ak kanaan ñan armej ro an. Bõtab, Ilai ear jel̦ã bwe Jeova ear bar jino an kõnono ñan armej ro an ke ear kõnono ñan l̦adik in! Kõn men in, ke Ilai ear bar ba ñan Samuel bwe en jepl̦aak im kiki, ear kwal̦o̦k ñane kilen an naaj uwaak ñe ebar roñ aer kũri. Samuel ear pokake Ilai. Ejjabto jãn iien eo, Samuel ear bar roñ an ainikien eo kũri im ba: “Samuel! Samuel!” Innem, ear uwaak im ba: “Kwõn kõnono, bwe karejeram̦ ej roñjake.”​—1 Sa. 3:1, 5-10, UBS.

21. Ewi wãween ad maroñ roñjake Jeova ilo raan kein, im etke eaorõk men in?

²¹ Kiiõ, ej kab itõn bar wõr juon rũkarejeran Jeova ilo Shailo im ej pokake E. Eñin kar men eo Samuel ear kõm̦m̦ane ilo aolepen mour eo an. Kwõj ke ãinwõt Samuel ilo am̦ roñjake im pokake Jeova aolep iien? Eokwe, jejjab aikuj kõttar an Anij kõnono ñan kõj ilo boñ ilo juon wãween ekabwilõñlõñ. Ilo raan kein, jemaroñ roñ ainikien Anij ilo kõkkar. Ewi wãween? Ej ilo an kõnono ñan kõj ikijjeen Baibõl̦ eo. Ñe jej roñjake im pokake ta ko Baibõl̦ ej ba, enaaj l̦apl̦o̦k wõt ad tõmak ilo Anij. Ear bar ãindein Samuel.

22, 23. (1) Ewi wãween an kar jejjet kitien naan ko Samuel ear ba ñan Ilai? (2) Ta eo ear kõm̦m̦an bwe en em̦m̦anl̦o̦k wõt etan Samuel ippãn armej ro?

²² Boñõn eo Jeova ear kõnnaan ñan Samuel ilo Shailo ear juon iien el̦ap an aorõk ilo mour eo an Samuel. Etke? Kõnke eñin kar iien eo ear jino lukkuun epaake Jeova, im Jeova ear jino kõjerbale bwe en an rũkkõnono im rũkanaan. Ilo kar jinoin, l̦adik in ear mijak in kwal̦o̦k naan ko Jeova ear jiroñ e bwe en ba ñan Ilai. Ear mijak kõnke men kein ej pojak in ba rej kõn kanaan ko kõn men ko Jeova ej pojak in kõm̦m̦ani ñan baam̦le eo an Ilai. Bõtab, Samuel ear aikuj kate e bwe en peran in kwal̦o̦k ñan Ilai aolep men ko Jeova ear ba. Ke ear kõm̦m̦ane men in, Ilai ear kõttãik bũruon im roñjake. Ejjabto tokãlik, aolep men ko Jeova ear ba rar jejjet im wal̦o̦k. Aelõñin Israel ear tarin̦aeik aelõñin Pilistia, im Hophni im Pinehas rar jim̦or mej ilo raan eo wõt. Im Ilai ear bar mej ke ear roñ bwe em̦õj aer bõk Tõptõp eo eokkwõjarjar an Jeova.​—1 Sa. 3:10-18, UBS; 4:1-18, UBS.

²³ Ak kõn Samuel, ear em̦m̦anl̦o̦k wõt etan ippãn armej ro kõn an juon rũkanaan etiljek. Bwebwenato eo ilo Baibõl̦ ej ba bwe Jeova “ear pãd ippãn,” im kõm̦m̦an bwe aolep men ko Samuel ear kanaan kaki ren jejjet kitieer.​—Riit 1 Samuel 3:19, UBS.

24. (1) Ta eo RiIsrael ro rar kõn̦aan kõm̦m̦ane? (2) Etke men in ear juon jerawiwi el̦ap?

²⁴ RiIsrael ro rar ke l̦oore joñak eo an Samuel im epaake Jeova im tiljek wõt ñane? Rar jab. Tokãlik, rar jab kiiõ kõn̦aan bwe juon rũkanaan en tõl er. Ak rar kõn̦aan kããlõt juon armej bwe en kiiñ ñan er. Innem, kõn aer kar kõn̦aan ãinwõt aelõñ ko jet, rar kajjitõk kõn juon aer kiiñ. Jeova ear jiroñ Samuel bwe en katõprak kajjitõk in aer. Bõtab, Samuel ear aikuj kaalikkar ñan RiIsrael ro bwe men in rar kõm̦m̦ane ej juon jerawiwi el̦ap. Ilo m̦ool, kajjitõk in aer ear jab baj kaalikkar wõt aer jab kõn̦aan bwe Samuel en riekajet ñan er. Ak ear bar kaalikkar aer jab kõn̦aan bwe Jeova en aer kiiñ! Eñin unin Samuel ear kũrtok er bwe ren kweilo̦ktok ilo Gilgal.

25, 26. Ke armej ro rar kweilo̦kl̦o̦k ilo Gilgal, ta eo Samuel ear kõm̦m̦ane bwe ren kile bwe rar jerawiwi n̦ae Jeova?

²⁵ Jen pijaikl̦o̦k ad pãd ilo iien in ke Samuel ej itõn kõnnaan ñan RiIsrael rein repen awiia ilo Gilgal. Ke l̦al̦l̦ap in ear kõnono ñan er ilo jikin in, ear kakeememej er kõn an kar tiljek wõt ñan Jeova jãn ke ear dik m̦aantak ñan tõrein ke erũtto. Ãlikin an kar kõnono ñan er, Baibõl̦ ej ba, “Samuel ear kũr ñan Jeova.” Ear kũr ñan Jeova im kajjitõk ippãn bwe en jilkintok jourur im wõt.​—1 Sa. 12:17, 18.

²⁶ Bõlen armej ro remaroñ kar kõrraat im ba, Etke ej kajjitõk kõn jourur im wõt? Ta, ejjab kiiõ iien det ke? Ej kab naaj wõr ilo bwebwenato ñe ãindein! El̦aññe armej rein rar ba men kein, eokwe rej baj kõnnaan wõt ak reilbõk ke rej lo an jino kilmeej im ekkõdo̦do lañ. Ear jino an l̦ap kõto, im kõto eo ear ko̦kkure wiit ko ilo jikin kallib ko. Bareinwõt, ear l̦ap an jourur im ejjaromrom. Innem ear jino an wõt. Ta eo ear wal̦o̦k ñan armej ro? Rar “kanooj mijak Jeova im Samuel.” Kiiõ rej kab kile bwe rar jerawiwi n̦ae Jeova kõn aer kar kajjitõk kõn juon aer kiiñ.​—1 Sa. 12:18, 19.

27. Ta eo Jeova ej kõm̦m̦ane ñan ro rej l̦oore joñak eo an Samuel?

²⁷ Lukkuun wõn eo ear jipañ armej ro ñan kile bõd eo aer? Eokwe, ej alikkar bwe ejjab Samuel, ak ej Anij eo an, Jeova. Jãn ke Samuel ear juon jo̦dikdik ñan iien eo el̦al̦l̦ap, ear kwal̦o̦k wõt an tõmak ilo Anij. Ñan rainin, Jeova ejjañin oktak. Ej rejetake wõt im jipañ ro rej l̦oore joñak eo an Samuel kõn an kar kwal̦o̦k an tõmak.