El̦aññe eñtaan ejjab itok jãn Anij, innem ta eo ej kõm̦m̦an bwe en l̦ap kwõle, jeram̦õl, tarin̦ae ko rel̦l̦ap, nañinmej ko renana, m̦akũtkũt lal̦ im l̦añ ko rel̦l̦ap? Naanin Anij, Baibõl̦ eo, ej kaalikkar jilu un ko unin an armej eñtaan:

1. An Armej L̦õmn̦ak Wõt kõn Er Make, Arõk, im Dike Doon. “Armej ewõr an maroñ ioon bar juon bwe en kõjorrããne.” (Ekklisiastis 8:9) Ekkã an armej iioon eñtaan itok jãn jerbal ko renana an armej ro rejjab weeppãn, im jãn ro rej l̦õmn̦ak wõt kõn er make, ak armej ro renana.

2. Men ko Remaroñ Wal̦o̦k ilo Jidimkij. Ekkã an armej ro rej eñtaan kõnke “jerata ej wal̦o̦k ñan jabdewõt armej” ilo jidimkij. (Ekklisiastis 9:11, UBS) Mel̦el̦ein men in bwe jirilo̦k ej pãd im̦aan men otemjej ilo ejjel̦o̦k kõtmãne kake, ak emaroñ kõnke armej ro rejjab kõjparok im rej jirilo̦k.

3. Rũtõl eo Enana an Lal̦ In. Baibõl̦ ej lukkuun kaalikkar un eo el̦aptata unin an l̦ap an armej iioon eñtaan. Ej ba: ‘Aolepen lal̦ in ej pãd ium̦win pein rinana eo.’ (1 Jon 5:19, UBS) “Rinana” in ej Setan Tepil̦ eo, juon jetõb ekajoor, eo ilo kar jinoin ear juon enjel̦ nejin Anij, ijoke ear jab “jutak ilo m̦ool.” (Jon 8:44) Ebar wõr enjel̦ ro jet rar kobal̦o̦k ippãn Setan im jum̦ae Anij kõnke ren l̦oor kõn̦aan ko aer make, kõn men in rar oktak im enjel̦ ro renana. (Jenesis 6:1-5) Jãn tõre eo rar jum̦ae Anij tok ñan rainin, Setan im enjel̦ ro an renana rej lukkuun kate er ñan kõjbwebweik men ko rej wal̦o̦k ilo lal̦ in, im el̦ap aer jelõt aolepen lal̦ in ilo juon wãween elukkuun nana. Men in elukkuun alikkar ilo raan kein ad. Kiiõ, el̦ap an Tepil̦ eo illu im ej “m̦on̦e aolepen lal̦,” im eñin unin “ejerata lal̦” in. (Revelesõn 12:9, 12, UBS) Setan ej juon rũtõl enana im lãj, im el̦ap an m̦õn̦õn̦õ ñe ej lo an armej eñtaan. Alikkar bwe Setan ej wũnjãn eñtaan ko armej rej iiooni, im ejjab Anij.

L̦ÕMN̦AK KÕN MEN IN: Juon eo im elukkuun nana im ejjab kea kõn armej ej kõm̦m̦an bwe ren iioon eñtaan meñe ejjel̦o̦k rueer. Ñe jej keidi men in ñan Baibõl̦, ej ba: “Anij yokwe.” (1 Jon 4:8) Im kõnke ej juon eo el̦ap yokwe im wãween ko jet rem̦m̦an ippãn elukkuun ‘ettol̦o̦k jãn Anij bwe en kõm̦m̦ani men ko renana, im jãn eo Ekajoor Bõtata bwe en kõm̦m̦an jab wãnõk.’​—Job 34:10.

Meñe ãindein ak jemaroñ bõk l̦õmn̦ak in, ‘Ewi toon an naaj Anij eo Ekajoor Bõtata kõtl̦o̦k an Setan wõnm̦aanl̦o̦k im tõl ilo juon wãween enana?’ Ãinwõt ad kar katak kake, Anij elukkuun dike nana im elukkuun bũrom̦õj ñe ej lo ad iioon eñtaan. Bareinwõt, Baibõl̦ eo ej rõjañ kõj im ba: “Kom̦win likũt ami inepata otemjej n̦a ippãn, bwe kwõaorõk ippãn.” (1 Piter 5:7) Anij ej yokwe kõj im el̦ap an kajoor ñan jol̦o̦k aolep eñtaan im men ko rejjab jim̦we, im jenaaj etale men in ilo katak eo tok juon. * (Lale kõmel̦el̦e eo itulal̦.)