1. Etke Kwõjkwõj eo ej raan eo eaorõktata ilo iiõ in? (Luk 22:​19, 20)

 ÑAN armej ro an Jeova, Kwõjkwõjin Keememej Mej eo an Jesus ej raan eo eaorõktata ilo iiõ in. Ej iien eo wõt me Jesus ear ba ñan ri-kal̦oor ro an bwe ren kõm̦m̦ane ak keememeje. (Riit Luk 22:​19, 20.) Elõñ un ko unin ad reim̦aanl̦o̦k ñan iien Kwõjkwõj eo. Jen etale jet iaan un kein.

2. Ta jet iaan un ko unin ad reim̦aanl̦o̦k ñan iien Kwõjkwõj eo?

² Kwõjkwõjin Keememej Eo ej jipañ kõj ñan kõl̦mãnl̦o̦kjen̦ kõn joñan an aorõk katok in mour eo an Jesus. Ej kakeememej kõj kõn wãween ko jemaroñ kwal̦o̦k ad kam̦m̦oolol kõn katok in mour eo an Jesus. (2 Kor. 5:​14, 15) Ej bareinwõt kõpel̦l̦o̦k juon iien ñan ad “kõkajoor doon ikijjeen tõmak ko ad.” (Rom 1:12) Kajjojo iiõ, ewõr ro jeid im jatid me ejako aer kwal̦o̦k naan im kweilo̦k, rej itok ñan iien in. Joñan, iien in ear kõm̦akũt jet iaan rein ñan jepl̦aaktok ñan Jeova kõn an kar ro jeid im jatid lukkuun karwaineneik er im kwal̦o̦k yokwe. Im elõñ iaan ro me ewõr aer itoklimo kõn m̦ool eo rej em̦m̦akũt ñan etetal ilo ial̦ eo ej tõll̦o̦k ñan mour kõn wõt men ko rej loi im roñ kaki ilo iien in. Jej lo unin an Kwõjkwõj eo juon iien elukkuun aorõk ñan kõj!

3. Ewi wãween an Kwõjkwõj eo kabõrokuk aolep ro jeid im jatid ipel̦aakin lal̦ in? (Bar lale pija eo.)

³ Bar l̦õmn̦ak m̦õk kõn wãween an iien Kwõjkwõj eo kabõrokuk aolep ro jeid im jatid ipel̦aakin lal̦ in. Ri-Kõnnaan ro an Jeova ipel̦aakin lal̦ in rej koba ippãn doon ilo iien eo al̦ eo ej pojakin tulo̦k. Kõj aolep jej roñjake juon katak me ej lukkuun kaalikkar aorõkin katok in mour eo an Jesus. Jej al kake ruo al in nõbar, letok-letak wain im bũreet eo, im kõn aolepen  bũruod jej ba “amen” ãlikin ad jar emãn alen. Ium̦win 24 awa, aolep eklejia ko ipel̦aakin lal̦ in enaaj m̦õj aer l̦oore karõk in. Kwõmaroñ ke pijaikl̦o̦k joñan an Jeova im Jesus lañlõñ ke rej lo ad bõrokuk ippãn doon im kwal̦o̦k kautiej ñan erro ilo wãween in?

4. Ta ko jenaaj etali ilo katak in?

⁴ Ilo katak in, jenaaj kõnono kõn jilu kajjitõk ko: Ewi wãween jemaroñ kõpooje bũruod ñan Kwõjkwõj eo? Ewi wãween jemaroñ jipañ ro jet ñan bõk tokjãn jãn iien in? Im ewi wãween jemaroñ jipañ ro jeid im jatid me ejako aer kweilo̦k im kwal̦o̦k naan? Uwaak ko ñan kajjitõk kein renaaj jipañ kõj ñan pojak ñan iien in eokkwõjarjar.

EWI WÃWEEN JEMAROÑ KÕPOOJE BŨRUOD ÑAN IIEN KWÕJKWÕJ EO?

5. (1) Etke jej aikuj kõl̦mãnl̦o̦kjen̦ kõn aorõkin katok in mour eo an Jesus? (Sam 49:​7, 8) (2) Ta ko kwaar katak jãn pijain alwõj eo Etke Jesus Ear Mej?

⁵ Juon iaan wãween ko jemaroñ kõpooj bũruod ñan iien Kwõjkwõj eo ej ikijjeen ad kõl̦mãnl̦o̦kjen̦ kõn aorõkin katok in mour eo an Jesus Christ. Ejjel̦o̦k men en̦ jemaroñ kõm̦m̦ane ñan lo̦mo̦o̦ren kõj make jãn jerawiwi im mej. (Riit Sam 49:​7, 8, UBS; bar lale pijain alwõj eo etan Etke Jesus Ear Mej?) a Kõn men in, Jeova ear karõk bwe Jesus en katok kõn mour eo an bwe en maroñ lo̦mo̦o̦ren kõj. Alikkar bwe erro jim̦or rar kõm̦m̦ane juon men ekanooj in l̦ap. (Rom 6:23) Ñe el̦apl̦o̦k ad kõl̦mãnl̦o̦kjen̦ kõn men ko Jeova im Jesus rar kõm̦m̦ani ñan kõj, enaaj l̦apl̦o̦k ad kam̦m̦oolol kõn katok in mour eo an Jesus. Jenaaj kõnono kõn jet iaan men ko reppen me Jeova im Jesus rar m̦õn̦õn̦õ in kõm̦m̦ani ñan kõj. Bõtab m̦oktata, ta ko kar aikuj in kõm̦m̦ani bwe Jesus en katok kõn mour eo an?

6. Ta ko kar aikuj in kõm̦m̦ani bwe Jesus en katok kõn mour eo an?

⁶ Katok in mour eo an Jesus ej on̦ããn eo Jeova ear kõl̦l̦ãiki ñan karo̦o̦ltok men eo Adam ear luuji. Jeova ear kõm̦anm̦an Adam, armej eo jinointata, bwe en weeppãn. Ke ear jerawiwi, ear luuji kõjatdikdik eo ñan mour indeeo, im men in ear jab jelõte wõt ak ear bar jelõt aolep ajri ro nejin. Bwe en maroñ bar jepl̦aaktok men eo Adam ear luuji, Jesus ear katok kõn mour eo an eweeppãn. Ilo aolepen mour eo an Jesus ijin ioon lal̦, “ejjel̦o̦k jerawiwi ear kõm̦m̦ane, im ear jab etao ilo naan ko an.” (1 Pit. 2:22) Ke Jesus ear mej, mour eo an eweeppãn ear joñan wõt juon ippãn mour eo Adam ear luuji.—1 Kor. 15:45; 1 Tim. 2:6.

7. Ta jet iaan mãlejjoñ ko me Jesus ear jelm̦aiki ke ear pãd ijin ioon lal̦?

⁷ Jesus ear pokake Jemãn ilo men otemjej meñe elukkuun lõñ mãlejjoñ ko ear jelm̦aiki ke ear pãd ijin ioon lal̦. Ke ear juon ajri, ear aikuj kõttãik e ñan rũtto ro jemãn im jinen me rar jab weeppãn meñe ear l̦otaktok im juon eo eweeppãn. (Luk 2:51) Ke ear juon jo̦dikdik, ear aikuj jum̦ae jabdewõt ijjiped ear iiooni ñan jab pokake Jemãn ak jol̦o̦k an tiljek ñane. Im ke Jesus ear juon em̦m̦aan, ear aikuj jutak pen n̦ae Setan Tepil̦ eo im menin kapo ko an, ekoba an Setan kajju ba ñane bwe en bõjrak jãn an tiljek ñan Anij. (Matu 4:​1-11) Setan ear lukkuun kõn̦aan kõm̦m̦an bwe Jesus en jerawiwi bwe en jab maroñ katok kõn mour eo an.

8. Ta mãlejjoñ ko jet me Jesus ear aikuj kijenmej kaki?

⁸ Ilo jinoin jerbalin kwal̦o̦k naan eo an Jesus, ekar wõr mãlejjoñ ko jet me ear iiooni. Ewõr ro rar jum̦aiki im kaeñtaane, im mour eo an ear pãd ilo kauwõtata. (Luk 4:​28, 29; 13:31) Ear aikuj kijenmej ippãn ri-kal̦oor ro an kõn aer jab weeppãn. (Mark 9:​33, 34) Ke kar liaakel̦o̦k ñan kien, rar kaeñtaane im kajjirere  kake. Innem rar m̦ane ñan mej ilo juon wãween ekõmmetak im ekajjookok. (Hib. 12:​1-3) Ilo mãlejjoñ eo an ãliktata, ear aikuj kijenmej make iaan ilo an jab bõk kõjparok jãn Jemãn. b—Matu 27:46.

9. Ewi wãween am̦ eñjake kõn aolep men ko Jesus ear kõm̦m̦ani kõn kõj? (1 Piter 1:8)

⁹ Alikkar bwe el̦ap an kar Jesus iioon eñtaan bwe en maroñ karõl̦o̦k kõj jãn jerawiwi. Ñe jej kõl̦mãnl̦o̦kjen̦ kõn aolep men ko Jesus ear kõm̦m̦ani kõn kõj, men in ejjab ke kam̦wilal̦l̦o̦k yokwe eo ad ñane?—Riit 1 Piter 1:8.

10. Ta eo Jeova ear aikuj kaarmejjeteiki bwe Jesus en maroñ katok kõn mour eo an?

¹⁰ Ak ta kõn Jeova? Ta eo ear m̦õn̦õn̦õ in kaarmejjeteiki bwe Jesus en maroñ katok kõn mour eo an? Jeova im Jesus relukkuun epaake doon. Kõtaan eo aerro ej juon kõta elukkuun jejuwaan ikõtaan juon jemãn im nejin. (JK. 8:30) Kõn men in, baj l̦õmn̦ak m̦õk kõn wãween an kar Jeova eñjake ke ear lo an Jesus kijenmej ium̦win elõñ apañ ko ke ear pãd ijin ioon lal̦. Ejjel̦o̦k pere bwe ear lukkuun rup bũruon Jeova ke ear lo an nana an armej ro kõm̦m̦an ñan Jesus, aer kar kõjekdo̦o̦ne, im mãlejjoñe.

11. Kõjerbal juon waanjoñak ñan kwal̦o̦k kõn wãween an kar Jeova eñjake ke rar m̦ane Jesus ñan mej.

¹¹ Ñe kwõj juon jemãn ak jinen im em̦õj an jako juon nejũm̦, alikkar bwe kwõlukkuun jel̦ã joñan an kõmmetak im rup bũruod ñe ejako juon nejid. Meñe el̦ap ad lõke bwe enaaj wõr juon iien jerkakpeje ñan ro remej, ak men in ejjab jol̦o̦k ad metak im bũrom̦õj ñe juon eo ejitõnbõro ippãd ej mej. Waanjoñak in ej jipañ kõj ñan mel̦el̦e eñjake ko an Jeova ke ear lo an eo Nejin me ejitõnbõro ippãn eñtaan im mej ilo kar iiõ eo 33 C.E. c—Matu 3:17.

12. Ta ko jemaroñ kõm̦m̦ani wiik ko m̦okta jãn iien Kwõjkwõj eo?

¹² Ilo wiik ko m̦okta jãn Kwõjkwõj eo, ilo iien am̦ katak ippam̦ make ak ilo Iien Kabuñ an Baam̦le, kwõmaroñ ke katak kõn katok in mour eo an Jesus? Kwõmaroñ kõjerbale Bok in Jipañ Ri Kõnnaan ro an Jeova ñan Kappok Mel̦el̦e ak kein katak ko jet an doulul in ñan kal̦apl̦o̦k am̦ mel̦el̦e kõn katok in mour eo an Jesus. d Bareinwõt, kwõmaroñ l̦oore jikejuul̦in riit Baibõl̦ ñan iien Kwõjkwõjin Keememej Eo ilo bok eo Jerbal eo Ad im Wãween Ad Mour—Kein Katak. Im ilo raanin Kwõjkwõjin Keememej Eo, jab mel̦o̦kl̦o̦k in alwõje katak eo  ejejuwaan kõn Kwõjkwõj eo (Morning Worship program). Ñe jej kõpooje bũruod ñan Kwõjkwõj eo, jenaaj maroñ jipañ ro jet bwe ren bar bõk tokjãn jãn iien in.—Ezra 7:10.

JIPAÑ RO JET ÑAN BÕK TOKJÃN

13. Ta men eo m̦oktata jemaroñ kõm̦m̦ane ñan jipañ ro jet ñan bõk tokjãn jãn iien Kwõjkwõj eo?

¹³ Ewi wãween ad maroñ jipañ ro jet ñan bõk tokjãn jãn iien Kwõjkwõj eo? Men eo m̦oktata jemaroñ kõm̦m̦ane ej kũrtok er ñan iien in. Kobal̦o̦k ippãn ad kũr ro jej iioone er ilo kwal̦o̦k naan, jemaroñ bar kõm̦m̦an juon laajrak in etan armej ro me jekõn̦aan kũr er. Jemaroñ kũr ro nukũd, ro jej jerbal ippãer, ri-jikuul̦ ro m̦õttad, im ro jet. Meñe emaroñ jabwe ad peba in kũr ak jemaroñ bar lel̦o̦k link eo ñan peba in kũr in ilo online. Jejjab jel̦ã oran armej ro remaroñ itok!—Ekl. 11:6.

14. Kwal̦o̦k juon waanjoñak me ej kaalikkar aorõkin ad make kũr juon ñan iien Kwõjkwõj eo.

¹⁴ Ñe kwõj make lel̦o̦k juon peba in kũr ñan juon armej ñan iien Kwõjkwõj eo, men in emaroñ kõm̦akũt er ñan lukkuun kõn̦aan itok. Ñan waanjoñak, juon iien, juon jeid im jatid kõrã ear lukkuun bwilõñ ke l̦eo pãleen me ejjab pãd ilo m̦ool eo ear ba bwe enaaj kobal̦o̦k ippãn ñan Kwõjkwõj eo. Etke ear bwilõñ? Kõnke ilo iiõ ko m̦oktal̦o̦k ekõn kũr l̦eo ippãn bwe en kobal̦o̦k ippãn, bõtab ear jab etal ippãn. Bõtab ta eo ear kõm̦m̦an bwe en ukot an l̦õmn̦ak? L̦eo pãleen ej ba: “Ewõr juon ear letok aõ peba in kũr.” Ej ba bwe juon iaan em̦m̦aan ro rej lale eklejia me ear jel̦ã kajjien, ear kũrtok e im lel̦o̦k an make peba in kũr. Em̦m̦aan in pãleen eo jeid im jatid ear etal ñan Kwõjkwõj eo ilo iiõ eo im elõñ iiõ ko tokãlik.

15. Ta eo jekõn̦aan keememeje ñe jej kũr armej ro ñan iien Kwõjkwõj eo?

¹⁵ Keememej bwe ro me jej kũr er emaroñ wõr aer kajjitõk—el̦aptata ñe rejjañin itok ñan juon iaan kweilo̦k ko ad. Jemaroñ l̦õmn̦ak kõn jet kajjitõk ko remaroñ kwal̦o̦ki im pojak ñan uwaaki. (Kol. 4:6) Ñan waanjoñak, jet remaroñ l̦õmn̦ak: ‘Enaaj ewi aetokin?’ ‘Kain nuknuk rot ko jej aikuj kõn̦aki?’ ‘Ewõr ke on̦ããn del̦o̦ñ?’ ‘Renaaj ke tõltõl jaba?’ Ñe jej kũr juon ñan Kwõjkwõjin Keememej Eo, jemaroñ kajjitõk ippãn, “Ewõr ke am̦ kajjitõk?” innem  uwaaki kajjitõk ko an. Jemaroñ bareinwõt kaalwõje pijain alwõj eo Keememej Mej eo an Jesus im Ta ko Rej Wal̦o̦k ilo Im̦õn Kweilo̦k ko Ammim? ñan jipañe mel̦el̦e wãween ad kõm̦m̦ane iien kweilo̦k ko ad. Im katak 28 ilo bok eo M̦õn̦õn̦õ kõn Mour ñan Indeeo! ej kwal̦o̦k kõn elõñ boin ko rem̦m̦an jemaroñ kwal̦o̦k ñan er.

16. Ta kajjitõk ko me ro rej kobatok ñan iien Kwõjkwõj eo remaroñ kajjitõk kaki?

¹⁶ Ñan ro rekããl me ewõr aer itoklimo kõn Baibõl̦ eo, emaroñ wõr aer kajjitõk ãlikin aer pãd ilo iien Kwõjkwõj eo. Remaroñ kajjitõk etke jet (ñe ewõr) rar bõk kun̦aaer in idaak wain im m̦õñã bũreet eo. Remaroñ bar kajjitõk ewi ikkutkut in ad kõm̦m̦ane Kwõjkwõj eo. Im remaroñ kõn̦aan jel̦ã el̦aññe Ri-Kõnnaan ro an Jeova rej kõm̦m̦ane aolep kweilo̦k ko aer ilo ejja wãween eo wõt. Meñe rej bõkm̦aantak mel̦el̦e kein ilo katak eo ilo iien Kwõjkwõj eo, ak jemaroñ aikuj kõmel̦el̦eik l̦o̦k ñan ro rej kab kobatok. Katak eo ilo jw.org etan “Etke Eoktak Wãween an Ri-Kõnnaan ro an Jeova Kõm̦m̦ane Iien Kõjota eo an Irooj jãn Kabuñ ko Jet?” emaroñ jipañ eok ñan uwaaki jet iaan kajjitõk ko aer. Jekõn̦aan kate kõj joñan wõt ad maroñ—m̦okta jãn iien Kwõjkwõj eo, ilo iien eo jej kõm̦m̦ane, im ãlikin —ñan jipañ “ro em̦m̦an bũrueer” ñan bõk tokjãn jãn iien in.—Jrb. 13:48.

JIPAÑ RO JEID IM JATID ME EJAKO AER KWEILO̦K IM KWAL̦O̦K NAAN

17. Ewi wãween an em̦m̦aan ro rej lale eklejia maroñ jipañ ro jeid im jatid me ejako aer kweilo̦k im kwal̦o̦k naan? (Ezekiel 34:​12, 16)

¹⁷ Ilo allõñ ko repaake iien Kwõjkwõj eo, ewi wãween an juon em̦m̦aan ej lale eklejia maroñ jipañ ro jeid im jatid me ejako aer kweilo̦k im kwal̦o̦k naan? Kwõmaroñ kaalikkar ñan er bwe kwõj kea kõn er. (Riit Ezekiel 34:​12, 16.) M̦okta jãn Kwõjkwõj eo, kate eok ñan lol̦o̦k elõñ iaan rein joñan wõt am̦ maroñ. Kaalikkar ñan er bwe kwõj kea kõn er im bwe kokõn̦aan jipañ er ilo jabdewõt wãween kwõmaroñe. Kũrtok er ñan kobatok ilo iien Kwõjkwõj eo. Ñe rej kobatok, kwõn kwal̦o̦k yokwe im karwaineneik er. Ãlikin Kwõjkwõj eo, wõnm̦aanl̦o̦k wõt im lol̦o̦k er ak call e rein jeid im jatid rejitõnbõro im jipañ er ilo  jabdewõt wãween bwe ren bar jepl̦aak ñan Jeova.—1 Pit. 2:25.

18. Ewi wãween kõj aolep jemaroñ jipañ ro jeid im jatid me ejako aer kweilo̦k im kwal̦o̦k naan? (Rom 12:10)

¹⁸ Aolep ro ilo eklejia eo remaroñ jipañ ro jeid im jatid me ejako aer kweilo̦k im kwal̦o̦k naan ñan kobatok ñan iien Kwõjkwõj eo. Ewi wãween? Ikijjeen aer kwal̦o̦k yokwe, jouj, im kautiej. (Riit Rom 12:10.) Keememej bwe bõlen jiip rein rar ãliklik in bar itok im kweilo̦k. Bõlen rar mijak kõn wãween an naaj eklejia eo kõm̦m̦an ñan er. e Kõn men in, kõjparok jãn am̦ kwal̦o̦k kajjitõk ko remaroñ kajook er ak jãn am̦ ba naan ko me remaroñ kõmetak er. (1 Tes. 5:11) Rein jeid im jatid rej rũttõmak ro m̦õttad. Jem̦õn̦õn̦õ in bar kabuñ ippãer!—Sam 119:176; Jrb. 20:35.

19. Ta tokjãn ko jej bũki itok jãn ad keememeje mej eo an Jesus?

¹⁹ Jej ke lo aorõkin an kar Jesus karõk bwe jen kõm̦m̦ane ak keememeje Kwõjkwõjin Keememej Eo an kajjojo iiõ? Ilo ad kobatok ilo iien in, elõñ tokjãn ko jej bũki ekoba ro jet. (Ais. 48:​17, 18) Jej kaddekl̦o̦k yokwe eo ad ñan Jeova im Jesus. Jej kaalikkar joñan ad kam̦m̦oolol kõn men ko erro ar kõm̦m̦ani ñan kõj. Jej kõkajoore kõtaan eo ad ippãn rũttõmak ro m̦õttad. Im jemaroñ bar jipañ ro jet ñan katak kõn wãween aer maroñ bõk jeraam̦m̦an ko me katok in mour eo an Jesus ej kõmaroñ kõj ñan bũki. Kõn men in, jen aolep kate kõj ñan pojak ñan Kwõjkwõj eo an iiõ in—raan eo eaorõktata ilo iiõ in!