ILO iien ko etto ilo Baibõl̦, on̦ããn eo ñan pãleek juon jiroñ ekkã aer lel̦o̦k ñan baam̦le eo an jiroñ eo ilo iien eo rej kõm̦m̦an karõk ñan m̦are. On̦ããn eo rej lel̦o̦k emaroñ kar kitibuj m̦weiuk ko me raorõk, menninmour ko, ak jããn. Ewõr iien, rekõn bar kõl̦l̦ã ikijjeen aer kõm̦m̦an jerbal, ãinwõt kar Jekob, eo im ear errã ñan jerbal ñan jemãn Rejel ium̦win jimjuon iiõ bwe en maroñ m̦areik Rejel. (Jen. 29:17, 18, 20) Kar ta unin m̦anit in me rekõn kõm̦m̦ane?

Juon rimmãlõtlõt me ej etale kobban Baibõl̦ etan Carol Meyers ej ba: “On̦ããn eo kar lel̦o̦k ñan pãleek juon jiroñ emaroñ kar juon kein kõl̦l̦ãiki baam̦le eo an jiroñ in kõnke renaaj luuji jerbal ko jiroñ in ekõn kõm̦m̦ani, juon men me ear lukkuun aorõk ippãn baam̦le ko me rej mour kõn jikin kallib.” On̦ããn in emaroñ kar bar kõkajoor jem̦jerã eo ikõtaan baam̦le kein ruo me kiiõ rej nukwiik doon ikijjeen mourin m̦are. Im kõtaan kein aer emaroñ kõm̦m̦an bwe ren maroñ kappok jipañ jãn doon ilo iien ko reppen. Bareinwõt, on̦ããn in me rej lel̦o̦k ñan pãleek juon jiroñ ear kaalikkar bwe juon jiroñ ak kõrã ej engage ak ej pojakin m̦are, im bwe enaaj kiiõ jako an pãd ium̦win kõjparok eo an jemãn ak enaaj kiiõ pãd ium̦win kõjparok eo an l̦eo ippãn.

Aer kõn lel̦o̦k on̦ããn ñan pãleek juon jiroñ ear jab mel̦el̦ein bwe jiroñ in ej juon m̦weiuk me remaroñ wiaiki ak wiakake. Ekkar ñan juon bok (Ancient Israel​—Its Life and Institutions) ej ba: “Men in me rar aikuj kõm̦m̦ane ilo aer kõl̦l̦ãik joñan juon jããn ak lel̦o̦k juon men me aorõkin ej joñan wõt on̦ããn eo ñan pãleek juon jiroñ, ekõm̦m̦an bwe en ãinwõt ñe wãween an ri-Israel ro kõn bõk pãleer ñan m̦are ej ãinwõt ñe rej wiaik juon men. Bõtab ñe jenãj lale, on̦ããn eo me rej lel̦o̦k ãinwõt ejjab ñan kõl̦l̦ãik on̦ããn jiroñ eo, ak ej ñan kõjepl̦aak ak karo̦o̦ll̦o̦k men eo me baam̦le eo ej luuji.”

Rainin, ilo jet aelõñ ko, armej rej wõnm̦aanl̦o̦k wõt kõn m̦anit in ñan lel̦o̦k juon on̦ããn ñan pãleek juon jiroñ. El̦aññe juon jinen im jemãn me rej Kũrjin rej kajjitõk kõn juon on̦ããn rot in, ej aikuj ‘alikkar ñan armej otemjej ke er ri-mel̦el̦e’ ilo aer jab kajjitõk el̦apl̦o̦k jãn joñan eo me ekkar. (Pil. 4:5; 1 Kor. 10:32, 33) Ilo wãween in, rej kaalikkar bwe rejjab jet ro me rej “arõk” ak yokwe jããn. (2 Tim. 3:2) Bareinwõt, ñe rein rejjab kajjitõk kõn juon joñan me el̦ap an baj l̦e jãn joñan, l̦eo ak likao eo me ej pojakin m̦areik jiroñ eo nejier eban aikuj oktak im karum̦wijl̦o̦k iien m̦are eo kõn an aikuj m̦okta jerbal im pukot joñan on̦ããn eo me ej aikuj lel̦o̦k. Ak l̦ein me ej pojakin m̦areik jiroñ eo nejier eban eddodo im l̦õmn̦ak bwe ej aikuj bõjrak jãn an bainier bwe en pukot juon an full-time jerbal ñan an lo joñan on̦ããn eo me rej kõtmãne jãne kõn on̦ããn eo ñan pãleek juon jiroñ.

Ilo jet jikin ko ilo lal̦ in, kien eo an jikin eo ej karõk on̦ããn eo ñan pãleek juon jiroñ. Ilo jikin ko me wãween in ej wal̦o̦k ie, juon jemãn im jinen me rej Kũrjin rej pokake im l̦oor kakien kein. Etke? Naanin Anij ej jiroñ Kũrjin ro bwe “ren kõttãik er ñan ri-utiej ro” im pokake kakien ko me rejjab n̦ae kien ko an Anij.​—Rom 13:1; Jrb. 5:29.