Elõñ armej ro ipel̦aakin lal̦ in rej aikuj kijeer m̦õñã im jikin aer jokwe. Jet remaroñ aikuji wõt juon kõjatdikdik kõn ilju im jekl̦aj. Ad kate kõj ñan jipañ kain armej rot in ej kõm̦m̦an bwe Anij en buñbũruon ippãd im kõjeraam̦m̦an kõj.

“Eo ej tũriam̦okake ro rijjeram̦õl, ej lel̦o̦k ñan Jeova, im Enaaj n̦aon̦ããn kõn an kõm̦m̦an em̦m̦an.”​—JABÕN KÕNNAAN 19:17.

Jesus ear kwal̦o̦k juon waanjoñak kõn juon em̦m̦aan me jet ri-ko̦o̦t rar m̦ane im etal jãne ak eitõn mej. (Luk 10:29-37) Juon armej me ejaje kajjien ear bõjrak im jipañe em̦m̦aan eo ejorrããn. Ear kõm̦m̦ane men in meñe ear oktak aelõñ ak m̦anit ko aerro jãn doon.

Em̦m̦aan in ear jab baj jipañ wõt armej eo kõn kinej ko ippãn im jipañe kõn men ko ej aikuji ak ear bar kaenõm̦m̦ane im jol̦o̦k an inepata.

Ta eo jej katak jãn waanjoñak in? Jesus ear kwal̦o̦k bwe jej aikuj jipañ ro rej pãd ilo aikuj ilo jabdewõt wãween ko jemaroñi. (Jabõn Kõnnaan 14:31) Jeje ko Rekkwõjarjar ej katakin bwe ejjabto Anij enaaj kõjem̦l̦o̦k jeram̦õl im eñtaan. Bõlen jemaroñ l̦õmn̦ak im ba, ewi wãween im ñããt Anij enaaj kõm̦m̦ane men in? Ilo katak eo tok juon enaaj kwal̦o̦k kõn jeraam̦m̦an ko me ri-Kõm̦anm̦an eo ad me el̦ap an yokwe ej kallim̦uri eok kaki.