Anij ejjab kalijekl̦o̦k im ekõn̦aan kõjeraam̦m̦an aolep armej.

Anij ear kallim̦ur ñan ri-kanaan Ebream im ba, “kõn kwe nukũn otemjej ilal̦ renaaj jeraam̦m̦an.”​—Jenesis 12:3.

Ta eo jej katak jãn men in? El̦ap an Anij lukkuun yokwe kõj im ekõn̦aan kõjeraam̦m̦an aolep baam̦le ko​—em̦m̦aan ro, kõrã ro, im ajri ro—​ro rej pokake e.

Anij ej juon eo el̦ap an tũriam̦o im ej kõjeraam̦m̦an ro me rej kate er ñan jel̦ã kajjien.

Eo Ekajoor Bõtata ear lel̦o̦k ñan ri-kanaan Moses maroñ eo ñan kõm̦m̦an menin kabwilõñlõñ ko rel̦l̦ap. Meñe ãindein, ak Moses ear jar im ba: “Kwõn kwal̦o̦k ñan eõ ial̦ ko Am̦, bwe in jel̦ã kake Kwe, bwe in lo jouj im̦aan mejam̦.” (Exodus 33:13) Anij ear m̦õn̦õn̦õ kõn men eo Moses ear kajjitõk ippãn kake, im ear kõjeraam̦m̦ane bwe en l̦apl̦o̦k jel̦ãl̦o̦kjen̦ ippãn im l̦apl̦o̦k an mel̦el̦e kõn ial̦ ko An im kadkad ko kadkadin. Ñan waanjoñak, Moses ear katak im jel̦ã bwe ri-Kõm̦anm̦an eo ej juon “Anij eo eobrak kõn jouj im tũriam̦o.”​—Exodus 34:6, 7, UBS.

Ta eo jej katak jãn men in? Anij ekõn̦aan kõjeraam̦m̦an kõj aolep​—em̦m̦aan im kõrã im ajri ro—​el̦aññe jej kate kõj ñan kal̦apl̦o̦k ad jel̦ã kajjien. Ej kwal̦o̦k ilo Jeje ko Rekkwõjarjar wãween ad aikuj kabuñ ñane im bwe ekõn̦aan bwe jen bõk buñbõro eo an im bwe ekõn̦aan kõjeraam̦m̦an kõj.

Jemaroñ m̦õn̦õn̦õ kõn jeraam̦m̦an ko jãn Anij me rej ñan indeeo, el̦aññe jenaaj katak kõn Jesus, im men ko ear kõm̦m̦ani im katakin ro jet kaki.

Naanin Anij ej kwal̦o̦k kõn elõñ tipdikin men ko kõn mour eo an Jesus im men ko ear katakin kaki. Anij ear lel̦o̦k ñan Jesus kajoor ñan kõm̦m̦an elõñ menin kabwilõñlõñ ko rel̦l̦ap, ãinwõt kõmour ro repilo, ro rejarroñroñ, im ro raajukub. Joñan, ear bar kõmour ro remej. Jesus ear kõm̦m̦ani men kein me rej kwal̦o̦k kõn jeraam̦m̦an ko Anij enaaj bũktok ñan aolep armej ilju im jekl̦aj. Ear kõmel̦el̦e kõn wãween kõj kajjojo jemaroñ m̦õn̦õn̦õ kõn jeraam̦m̦an kein, ke ear ba: “Bwe ren maroñ bõk mour indeeo, rej aikuj in jel̦ã kõn kwe, Anij eo wõt em̦ool, im Jesus Christ, eo kwaar jilkintok.”​—Jon 17:3.

Jesus ear tũriam̦o im jouj. Em̦m̦aan im kõrã ro, ajri im ro rerũtto, rar m̦õn̦õn̦õ in itok ñan ippãn im eo̦roñ naanin kũr eo an, ke ear ba: “Katak jãn ña, bwe ij juon eo eineem̦m̦an im ettã bũruon. Ñe kom̦ naaj kõm̦m̦ane men in, kom̦ naaj kakkije im aenõm̦m̦an.” (Matu 11:29) Jesus ear oktak jãn ro ilo tõre eo an me enana aer kar kõm̦m̦an ñan kõrã ro, ear kwal̦o̦k an jouj im kautiej kõrã ro.

Ta eo jej katak jãn men in? Jesus ear kwal̦o̦k an l̦ap an yokwe armej ro, im ear likũt juon joñak elukkuun em̦m̦an kõn wãween ad aikuj kõm̦m̦an ñan doon.

Jeje ko Rekkwõjarjar rej kwal̦o̦k bwe “ñan kõj, ewõr juon wõt Anij” im bwe Jesus Christ ear ri-keeañ eo ettã bũruon an Anij. (1 Korint 8:6) Jesus ear kaalikkar im ba bwe Anij eutiejl̦o̦k jãne im bwe Anij ear jilkintok e ñan lal̦ in.​—Jon 11:41, 42; 14:28. *