L̦õmn̦ak m̦õk ñe en kar ejjel̦o̦k meram in al̦ ilo lal̦ in? Al̦ ej lel̦o̦k kajoor ñan wõjke ko bwe en maroñ wõr bõlõkier, wũt ko ie, leer, pinõt, im ine ko. Ej bar kõm̦m̦an bwe wõjke ko ren jorome tok dãn eo jãn bwidej kõn okran im dãn eo ej wanlõñl̦o̦k ñan bwilikõn innem diwõjl̦o̦k ñan mejatoto ãinwõt tabin dãn ko imejatoto.

Wõt ej juon menin letok eaorõk jãn Anij kõnke ej kõm̦m̦an bwe menin eddek ko ilo lal̦ in ren maroñ wõr leer ñan ad maroñ m̦õñã. Anij ej letok ñan kõj wõt jãn lañ im leen keinikkan ko ilo iien aer kalle, ej letok kijed ekkan im koobrak bũruod kõn lem̦õn̦õn̦õ.

Elõñ jemãn baam̦le ko rej inepata ñe ejabwe m̦õñã im nuknuk ñan baam̦le ko aer. Lale ta ko eoon kein rej ba: “Kom̦win kanooj l̦õmn̦ak kõn bao ko imejatoto, rejjab ekkat ine ak m̦adm̦õd ak aini leen keinikkan ko n̦a ilowaan im̦õn kakkon̦ ko, bõtab Jememiwõj ilañ ej naajdik er. Ta kom̦ij jab aorõkl̦o̦k jãn bao ko ke?”​—Matu 6:25, 26.

“Kom̦win ekkatak jãn wãween an wũt ko ilo mel̦aaj eddek . . . ; Ak ij ba ñan kom̦ bwe meñe [Kiiñ] Solomon ear kõn̦ak elõñ men ko raiboojoj, ak rar jab aiboojojin wõt juon iaan wũt kein. El̦aññe Anij ej kõm̦m̦an bwe en aiboojoj menin eddek ko ilo mel̦aaj ko . . . , ta eban l̦apl̦o̦k an lewaj ami nuknuk ke?”​—Matu 6:28-30.

Kõnke Anij emaroñ letok kijed m̦õñã im ad nuknuk, ejjel̦o̦k pere bwe emaroñ bar jipañ kõj kõn men ko jet jej aikuji ilo mour eo ad. El̦aññe jej pukot ñan kõm̦anm̦an ankilaan Anij, emaroñ kõjeraam̦m̦an ad kate kõj ñan ekkat keinikkan ko ak jipañ kõj kappok ad jerbal bwe jen maroñ wiaiki aikuj ko ad.​—Matu 6:32, 33.

Aet, elõñ un ko rem̦m̦an unin ad maroñ yokwe Anij ñe jej kõl̦mãnl̦o̦kjen̦ kõn al̦, wõt, bao ko, im wũt ko. Ilo katak eo tok juon, enaaj kwal̦o̦k kõn wãween an kar ri-Kõm̦anm̦an eo ad kõnono ippãn armej ro.