Ki ko ñõn Kamõnõnõik Juõn Baamle

Kapoj Jodrikdrik ro bwe Ren Pojõk ñe Reridto

“Konono iben ladrik ro nejiõ ekin emõn. Rar lukkun roñjake men ko ikin ba, im emõkõj air bokake. Ak kiõ ke rej jodrikdrik, kimij akwail kin men ko otemjej. Rej jumae makõtkit ko me rej ekkeijaklok ñõn ien am kabuñ. Rej kajitõk, ‘Jej aikwij ke konono kin Baibel eo?’ Mokta jen an kar ladrik ro nejiõ erom jodrikdrik ro, iar jab lemnok bwe men in en kar walok ñõn baamle eo aõ, meñe iar lo an walok ñõn ro jet.”​—Reggie. *

EOR ke nejõm jodrikdrik? Elañe aet, kwoj kamol juõn ian ien ko rekaitoktoklimo ilo an ajiri eo nejõm ridtolok. Bareinwõt emaroñ juõn ian ien ko elap inebata ie. Kwonañin ke kar iion wãwen kein tok ilõl?

▪ Ke ear drik wõt ladrik eo nejõm, ear einwõt juõn wa kar lukwoje na ilo juõn oab, kwe. Kiõ, einwõt juõn jodrikdrik, ej kanõke to eo, kinke ej kijorur in jerak, im kwoj iñjake bwe ejjab kõnan bwe kwon iuwe.

▪ Ke ledrik eo nejõm ear juõn ajiri, ear ba ñõn kwe kin aolep men. Kiõ, einwõt juõn jodrikdrik, emwij an ejaake juõn kumi in ro mõtõn, im kwoj iñjake bwe kwojjab juõn iair.

Elañe men kein rej bareinwõt walok ilo baamle eo am, jab mõkõj in lemnok bwe ajiri eo nejõm ej erom juõn eo ebõt im kiblia. Inem ta in ewalok? Ñõn uak kajitõk in, jen etale wãwen ko raurõk me ien jodrikdrik ej jibõñ ilo an ajiri ro ridtolok.

Ien Jodrikdrik Eaurõk Ilo an Juõn Ridtolok

Jen ien lotak im manlok, ej ien eo moktata me ajiri eo ej kõmõn men otemjej ilo mour eo an einwõt buñten ne ko neen moktata, nan eo ear ba moktata, ran in jikuul eo an jinointata, erkein ej jejjo wõt ian men ko. Ro jemen im jinen rej mõnõnõ ñe rej lo an ajiri ro tõbar men kein. Tõbrõk kein rej kamol bwe ajiri eo nejõm ej ridtolok.

Ien jodrikdrik ej bareinwõt aurõk ilo an juõn ridtolok meñe emaroñ juõn ien ebin iben jet jemen im jinen. Jej melele unin air inebata. Ilo mol, ewõr ke juõn jemen ak jinen emõnõnõ in lo an juon ajiri eo ekin bokake oktõk ñõn juõn jodrikdrik emalkaro? Meñe eindrein, ien jodrikdrik elukkun aurõk ilo an juon ridtolok. Ilo wãwen it?

Baibel eo ej ba bwe juõn ien “leo e naj likit jemen in jinen.” (Jenesis 2:​24) Un eo elaptata unin an aurõk ien jodrikdrik ej kinke ej jibõñ kapoj ladrik eo ak ledrik eo nejõm ñõn ran en me enaj kamõnõnõ ak ilo ejja ien eo wõt ekaburomõjmõj. Ilo ien eo, ajiri eo nejõm emaroñ ba ejja nan ko wõt an kar dri jilik Paul: “Ke I ar ajiri, I ar konono einwõt ajiri, I ar jela einwõt ajiri, I ar lemnok einwõt ajiri: a kiõ bwe I ridto emwij aõ wutik men ko an ajiri.”​—1 Dri Korint 13:11.

Eñin men eo ladrik eo ak ledrik eo nejõm ej kõmõne ilo ien jodrikdrik. Ej wutik karkar ko karkarin ajiri im ej katak ñõn erom juõn ridto  me ejela lale e mõke im emõn ridtõn ñõn an ilok jen mweo. Ilo mol, juõn buk ej ba bwe ien jodrikdrik ej ien eo ej kapoj jodrikdrik ro ñõn ilok jen jemeir im jineir.

Emol bwe kiõ, lemnok eo bwe ladrik ak ledrik “jidrikdrik” eo nejõm enaj mõkelok ian emaroñ kõmõn am berre. Kwomaroñ kajitõk:

▪ “Elañe ladrik eo nejiõ ejjab bõk erro eo ñõn karreoik rum eo an mõke, ewi wãwen an naj kejbãrok juõn im?”

▪ “Elañe ledrik eo nejiõ ejjab maroñ kajejit auõ eo kar karõk bwe en rol ñõn mweo, ewi wãwen an naj kejbãrok auõ ko an ilo jikin jerbal?”

Elañe kwoj inebata kin ejja men kein wõt, kememej men in: Mõkelok ian ejjab juõn kejem me ajiri eo nejõm emaroñ relõñ wõt ie, ej juõn ial me ladrik ak ledrik eo nejõm ej itoitak ie, im ej bõk elõñ yiõ ko ñõn kõtõbar jikin eo ej etal ñõn e. Ak kiõ, kwoj loe im jela bwe “e lukjõk men in bwebwe ilo buruen juõn ajiri.”​—Jabõn Kennan Ko 22:15.

Bõtab, kin tel eo ekkar, ajiri eo nejõm enaj oktõk jen juõn jodrikdrik ñõn juõn ridto eor iben “maroñ in jela kajen emõn im nana.”​—Dri Hibru 5:​14.

Ki ko ñõn Lo Tõbrõk

Ñõn kapoj jodrikdrik eo nejõm bwe en pojõk ñe eridto, kwoj aikwij jibõñ e ñõn kadreklok “maroñ in jela” eo an bwe en maroñ mõke kõmõni bebe ko remõn. Nan in kakabilek kein jen Baibel eo renaj jibõñ yuk ñõn kõmõn eindrein.

Dri Pilippai 4:5: “Ami kamanwa en walok ñõn armij otemjej.” Jodrikdrik eo nejõm ej kajitõk, bwelen bwe en tolok auõ eo kar karõk bwe en rol ñõn mweo. Ilo mõkõj kwoj ba jab. Jodrikdrik eo nejõm ej aol, “Kwoj watõk iõ einwõt juõn ajiri!” Mokta jen am uak im ba, “Eokwe, am kõmõn ej einwõt juõn ajiri,” lemnok kin men in: Jodrikdrik ro ekkã air kõnan bwe en laplok air anemkwoj jen joñõn eo remaroñwe, ak ro jemen im jinen ekkã air kõnan lelok jidrik wõt anemkwoj jen joñõn eo remaroñ kar lelok. Kwomaroñ ke baj kõtlok ir jen ien ñõn ien? Etke kwojjab baj lemnok kin men eo jodrikdrik eo nejõm ej ba?

KAJEOÑ MEN IN: Je juõn ak ruõ wãwen ko me kwomaroñ kalaplok jidrik ien an jodrikdrik eo nejõm anemkwoj. Kemelele ñõn e bwe kwoj kalaplok ien an anemkwoj ñõn baj melejoñwe wõt. Elañe ej bokake karõk eo, kwomaroñ bar kalaplok an anemkwoj. Elañe ejjab, inem kwonaj kadriklok ien eo kar lelok bwe en anemkwoj.​—Matu 25:21.

Dri Kolosse 3:​21: “Ro jemeir, komin jab kaillu ro nejimi, bwe ren jab õbwer.” Jet ro jemen im jinen rej kajeoñ beek men otemjej jodrikdrik eo nejiir, ej kõmõni. Ñõn beek wõn eo ej ber iben im ta eo ej kõmõne, rej lukkun lale e. Rej kãlet wõn ro mõtõn im tilekek im roñjake an konono ilo telephone. Bõtab enañin aolep ien wãwen kein rejjab lo tõbrõk. An le jen joñõn am beek e emaroñ kõmõn bwe en kõnan wõt ko, im am kananaik ro mõtõn aolep ien emaroñ kalaplok an kõnan kõmao ibeir. Bareinwõt am tilekek im roñjake an konono emaroñ lujure ñõn bukot ial in an konono iben ro mõtõn ilo am jaje kake. Elañe elap am kajeoñ beek e, inem enaj driklok am maroñ ion. Ilo mol, elañe jodrikdrik eo nejõm ejjab katak ñõn kõmõn bebe ko ñõn e mõke ilo ien eo ej ber mweo, enaj ewi wãwen an jela kõmõn bebe elikin ej ilok jen mweo?

KAJEOÑ MEN IN: Ien eo tok juõn kwoj konono iben jodrikdrik eo nejõm kin juõn abañ, jibõñ e ñõn etale wãwen jokãlet ko an renaj jelet e. Ñõn wanjoñok, jen am kananaik ro mõtõn, kwon ba: Ta elañe rej kalbuji [etan armij eo] kin an rupe kien? Enaj ewi wãwen etam?” Jibõñ jodrikdrik eo nejõm ñõn lo bwe wãwen jokãlet ko an renaj kõkõmõnmõnlok ak katton ãt eo etan.​—Jabõn Kennan Ko 11:17, 22; 20:11.

Dri Epesõs 6:4: “Komin jab biuktõke ro nejimi ñõn illu: a komin kakajiririik ir ilo kaje im  kowe an Iroij.” Nan eo “kowe” ej kitibuj elaplok jen baj kwalok kemelele ko wõt. Ej melelen lujur lemnok eo an ajiri eo kin mour jime ilo juõn wãwen me enaj karel kõmõn ko an. Elaptata an aurõk men in ñe ajiri eo nejõm ej erom juõn jodrikdrik. Juõn jemen etan Andre ej ba: “Ilo an ajiri eo ridtolok, kwoj aikwij ukot wãwen kwoj kebake im kamanwa wõt iben.”​—2 Timote 3:​14.

KAJEOÑ MEN IN: Ñe juõn abañ ej walok, kajeoñ ukot erro ko an dron. Kajitõk iben jodrikdrik eo nejõm ta nan in kakabilek ko enaj kar lewoj ñõn yuk elañe kwar ajiri eo nejin. Kõmõn bwe en bukot melele ko me rej rejetak ak jumae lemnok eo an. Bwebwenato iben dron kin men in ilo wik eo tok juõn.

Dri Galetia 6:7: “Jabrewõt eo armij ej jeor e, men in e naj bareinwõt marmir e.” Kwomaroñ katakin ajiri eo ikijen am kajeiki bwelen ilo am jilkinlok e ñõn rum eo an ak kamo an kõmõne juõn ian makõtkit ko emõntata iben. Bõtab, iben juõn jodrikdrik, enaj emõn ñe kwoj lemnok kin men ko remaroñ walok.​—Jabõn Kennan Ko 6:​27.

KAJEOÑ MEN IN: Jab jibõñ e ikijen am kõllãik aolep muri ko an ak kõmõn jekben ñõn dri kaki ro an kin unin an nana grade ko an. Kõtlok bwe en lo leen kõmõn ko an im enaj juõn menin katak ñõn e me eban melokloke.

Einwõt juõn jemen im jinen, bwelen kwokõnan bwe ien jodrikdrik en einwõt juõn ial in balun me ajiri eo nejõm emaroñ mõkõj im emõn an etõr ie im ej kelok. Inem ej tõbar ien eo ke eridto. Bõtab ejeja kain kelok rot in emõn. Meñe eindrein, ien eo ajiri eo nejõm ej jodrikdrik ej lewoj ñõn yuk juõn ien emõn ñõn “kibel juõn ajiri ilo ial eo en etal ie.” (Jabõn Kennan Ko 22:6) Nan in kakabilek ko ilo Baibel rej juõn berber ebin me kwomaroñ kalek juõn mour in baamle eo elemõnõnõ ie.

[Kamelele ko itulal]

KAJITÕK IBÕM MÕKE . . .

Ilo ien eo jodrikdrik eo nejiõ ej ilok jen mweo, enaj ke maroñ kõmõni wãwen kein?

▪ ekkeini an lor mõnit eo an kin makõtkit ko me rej ekkeijaklok ñõn ien an kabuñ

▪ kõmõni jokãlet im bebe ko remõn

▪ emõn an kwalok lemnok eo an iben ro jet

▪ kejbãrok ejmour eo an

▪ jela kilen kejbãrok jããn

▪ karreoik im kejbãrok juõn im

▪ ejela ta eo en mõke kõmõne

[Pija ilo peij 23]

Elañe jodrikdrik eo nejõm ear kalikar bwe emaroñ kajejit erro ko an, kwomaroñ ke bar kalaplok ien an anemkwoj?