Ki ko ñõn Kamõnõnõik Juõn Baamle

Ñe Eo Beleõm Ej Aikwij Jibõñ kin Nañinmij eo An

Kinke iar bõk juõn nañinmij me ej kõmõn aõ mõk im metõk enbwiniõ, leo iba wõt ear aikwij jerbal. Bõtab ear jab konono iba kin muri ko kimro ej aikwij kõllãiki. Etke ejjab konono iba kin joñõn jããn ko amro? Men in ej kõmõn aõ lemnok bwe elap amro muri im ejela bwe ñe ijela, men in enaj lukkun kainebataik iõ.​—Nancy. *

MOUR in mare emaroñ juõn men ebin, bõtab ñe juõn ian dri belele ro ej bõk juõn nañinmij elap ak eo juõn ej ejmour wõt, elaplok an bin. * Kwoj ke kouk eo beleõm me eor an nañinmij? Elañe kwoj kõmõn eindrein, kwoj ke kalomõnlokjen kin kajitõk kein: ‘Ewi wãwen inaj kijenmij ñe elaplok an eo beleiõ nañinmij? Ewi toõn aõ maroñ wõnmanlok im kouk eo beleiõ im bareinwõt kõmat mõña, karreo, im jerbal? Etke enana aõ mour kin an emõn ejmour eo aõ ak ejmour eo an eo beleiõ ejjab emõn?

Ijo turãjet, elañe kwe eo kwoj nañinmij, kwomaroñ lemnok: ‘Ewi wãwen aõ maroñ bõk juõn lemnok emõn kin ña mõke ñe ijjab maroñ inek erro ko aõ? Eo beleiõ ej ke drike iõ kin aõ nañinmij? Ej ke melelen bwe ejoko amro mõnõnõ?’

Ekaburomõjmõj bwe jet rar jibil kin air kar bõk juõn nañinmij elap. Ak, ejjab melelen bwe mour in mare eo am ej ilok ñõn an jorran.

Elõñ dri belele ro rar kate wõt im kijenmij iben dron meñe rar bõk juõn nañinmij elap. Ñõn wanjoñok, lemnok kin Yoshiaki im Kazuko. Kin an jorran drilep eo drin Yoshiako, men in ear kõmõn bwe en jab maroñ emakõtkit ñõn jidrik mae ien juõn ear aikwij jibõñ e. Kazuko ej kemelele: “Leo iba ej aikwij jibõñ ilo aolep men. Kin aõ kouk e, men in ej kõmõn bwe en metõk kenwaõ, aera, im peiõ, im ña bar juõn dri nañinmij im aolep ien ij aikwij etal ñõn juõn aujpitõl me ej lale nañinmij in dri. Ekkã aõ kin lemnok bwe jerbal in kouk ekanuij in kamõkmõk.” Bõtab, meñe ej jelmae wãwen kein rebin, Kazuko ej ba: “Kõtan eo amro einwõt dri belele ro ear laplok an kajur.”

Inem, ta ki eo ñõn lo wõt mõnõnõ iomin abañ kein? Juõn wãwen ej bwe dri belele ro me rej kejbãrok wõt air mõnõnõ im jokõne wõt ilo mour in mare eo air rej watõk nañinmij eo einwõt juõn men enana ejjab ñõn eo wõt enañinmij ak ñõn erro jimor. Ilo mol, elañe eo rejetam  ej nañinmij, men in ej jelet komro jimor, meñe ilo wãwen ko reoktõk jen dron. Kar kwalok kin an leo im lio atartar wõt ion dron ilo Jenesis 2:24: “Leo e naj likit jemen im jinen, im edrep na iben lio belen: im irro naj juõn wõt kõniek.” Kin men in, ñe juõn ian dri belele ro ej bõk juõn nañinmij elap, eaurõk bwe leo im lio jimor ren jerbal iben dron ñõn kijenmij kin abañ eo.

Bareinwõt, melele ko kin air kar kõmõn juõn etale ej kwalok bwe dri belele ro me rej kejbãrok wõt kõtan eo air iben dron meñe rej jelmae juõn nañinmij elap, rej melele kin wãwen eo rej ber ie im katak wãwen ko remaroñ jibõñ ir ñõn iminene kake. Elõñ ian men ko me rar katak kaki ñõn kijenmij rej einlok wõt nan in kakabilek ko rej walok ilo Baibel eo. Jen etale jilu wãwen ko jemaroñ lemnok kaki me rej walok itulõl.

Kwalok Joij ñõn Dron

Ekklisiastis 4:9 ej ba: “Ruo remõnlok jen juõn.” Etke? Kinke ilo eon 10 ej ba bwe “elañe re buñ, juõn e naj kejerkak eo juõn.” Kwoj ke ‘kejerkak eo rejetam’ ikijen am kwalok nan ko rejoij ñõn e?

Kwomaroñ ke bukot wãwen ko rekeie ñõn jibõñ dron? Yong, eo me lio belen emij rãjetin enbwinin ej ba: “Ij kajeoñ kwalok joij ñõn lio beleiõ ien otemjej. Jabrewõt ien ij maro, ij lemnok bwe emaroñ bar maro. Ñe ikõnan etal ñõn nabõj im lale melan eo eaibujuij, ij kajitõk iben elañe ekõnan itok iba tok. Kimro ej jimor iñtan im kijenmij iben dron kin wãwen in kimij ber ie.”

Ijo turãjet, elañe kwoj bõk jibõñ jen eo beleõm, eor ke jet men ko kwomaroñ kõmõni ñõn kwe mõke me reban kokkure ejmour eo am? Elañe aet, men in emaroñ kakõmõnmõnlok iñjake eo am kin kwe mõke im emaroñ jibõñ eo rejetam bwe en maroñ wõnmanlok wõt ilo an lale yuk.

Ijellokin am lemnok bwe kwojela wãwen eo emõntata ñõn kwalok joij ñõn eo beleõm, etke kwojjab kajitõk iben ta eo ekõnan? Tokelik Nancy, eo me kar konono kake ilo jinoin, ear jiroñ leo belen kin joñõn an kar jelet e ke ear jab jela kin joñõn jããn ko an baamle eo. Kiõ leo belen ej kate e ñõn kalaplok an konono iben kin men in.

KAJEOÑWE MEN IN: Je men ko me kwoj lemnok bwe eo beleõm emaroñ kõmõni kiõ bwe wãwen eo kwoj ber ie en birurulok jidrik, im eo beleõm en bar kõmõn ejja wãwen in wõt. Inem jenij iben dron men ko komro kar jei. Kajjojo iamiro en kãlet juõn ak ruo ian wãwen ko komro ej lemnok bwe komro maroñ jerbali.’

Kõmõne Juõn Lajrõk Ejokkin Wõt Juõn

Dri meletlet eo Kiñ Solomon ear je: “Eor ien ñõn jabrewõt men.” (Ekklisiastis 3:1) Bõtab, kinke nañinmij eo emaroñ kabañ baamle eo, emaroñ bin air lore lajrõk eo air. Ta eo kwomaroñ kõmõne ñõn lo jidrik tõbrõk ñõn jokkin wõt juõn?

Jen ien ñõn ien komro jimor en bõk ien ñõn kakije im jab lemnok kin nañinmij eo. Komro maroñ ke kõmõni men ko rekamõnõnõ me komro kin kõmõni iben dron mokta jen an kar walok nañinmij eo? Elañe jab, komro maroñ ke kajeoñ kõmõni makõtkit ko komro ejañin kar kõmõni? Emaroñ juõn men ebiruru einwõt riit ñõn dron ak juõn men ebwe an bin einwõt katak juõn kajin ekãl. Amiro kõmõni men ko iben dron im jab lemnok kin nañinmij eo enaj kakajurlok kõtan eo amiro im kalaplok amiro mõnõnõ.

Bar juõn men emaroñ jibõñ komro ñõn jokkin wõt juõn ej ilo amiro kobalok iben ro jet. Baibel eo ej ba ilo Jabõn Kennan Ko 18:1: “Eo ej mõkelok ian, ej kabukot kõnan eo an, im ej lej nae meletlet otemjej e keie.” Kwoj kile ke ilo eon in bwe kamõkelok iar emaroñ jelet lemnok eo ar ilo juõn wãwen enana? Ijo turãjet, am kobalok iben ro jet jen ien ñõn ien, emaroñ kõmõn bwe en emõn am mour im jibõñ yuk ñõn bar bõk lemnok ko remõn. Etke kwojjab bõk  buñten ne eo moktata ñõn kirtok juõn bwe en lowõj yuk?

Jet ien, jokkin wõt juõn emaroñ juõn abañ ñõn ro rej kouk ro beleir. Kin an jet lap air jerbal, jidrik kin jidrik rej mõk, im ej jelet ejmour eo air. Ejjabto, men ko rej kõmõni remaroñ kõmõn bwe en ejelok air maroñ ñõn wõnmanlok im kouk eo beleir ejitenburu. Inem elañe kwoj lale eo beleõm enañinmij, kwon jab kejekron aikwij ko am mõke. Kõmõn ien ñõn am mõke iam im kakije. Jet rej lo bwe ejibõñ ñe rej konono kin inebata ko air jen ien ñõn ien iben juõn mõtair ebak, elañe ir kõra rej konono iben kõra ro im eman ro rej konono iben eman ro mõtair.

KAJEOÑWE MEN IN: Je ilo juõn peba kin aolep abañ ko kwoj jelmaiki ilo am kouk eo beleõm. Inem je men ko kwomaroñ kõmõni me renaj jibõñ yuk ñõn anjo ioir ak kijenmij kaki. Jen an le jen joñõn am etali men kein, kwon kajitõk ibõm mõke, ‘Ta wãwen eo ebiruru tata im elaplok an alikar ñõn kakõmõnmõnlok wãwen eo kimij ber ie?’

Kajeoñ Drebij Juõn Lemnok Ejime

Baibel eo ej kakkil: “Kwon jab ba, Etke ran ko moktata remõn jen ran kein?” (Ekklisiastis 7:​10) Bõprae am lemnok kin ewi wãwen naj kar ber eo amiro elañe eo juõn en kar jab nañinmij. Kememej bwe eor joñõn mõnõnõ ilo lõl in. Ki eo ñõn lo wõt mõnõnõ ej bwe kwon melele kin wãwen eo kwoj ber ie im kõmõn joñõn wõt am maroñ.

Ta eo emaroñ jibõñ yuk im eo beleõm ilo wãwen in? Bwebwenato iben dron kin jerammõn ko komro ej loi. Mõnõnõ wõt meñe jidrik wõt an or wõnmanlok ilo ejmour eo am. Bukot men ko komro maroñ reimanlok ñõni, im kõmõn mejenkajik ko ebiruru amiro tõbari.

Ruo dri belele etair Shoji im Akiko rar lo tõbrõk kin air kar jerbali nan in kakabilek ko itulõñ. Juõn ien elikin an kar Akiko bõk juõn kain nañinmij einlok wõt kirro, rar aikwij kadriklok air bõk kwonair ilo jerbal in kwalok nan. Rar ke buromõj? Aet. Ak, Shoji ej rejañ ro me rej ber ilo ejja wãwen in lok wõt: “Kwon jab ebwer kin am lemnok kin men ko kwojjab maroñ kõmõni kiõ. Kwon drebij wõt juõn lemnok ejime. Meñe eor amiro kejatrikrik ñõn bar jeblak ñõn mour eo amiro kar mokta, lemnok wõt kin wãwen mour eo am kiõ. Ñõn ña, melelen men in bwe ij aikwij lemnok wõt kin aõ lale lio beleiõ im jibõñ e.” Nan in rejañ in ekeie emaroñ jibõñ kwe bareinwõt elañe eo beleõm ej aikwij jibõñ kin an nañinmij.

[Kamelele ko itulal]

KAJITÕK IBÕM MÕKE . . .

Ta eo kimro eo beleiõ ej aikwij kõmõne kiõ?

▪ Kalaplok amro konono kin nañinmij eo

▪ Kadriklok amro konono kin nañinmij eo

▪ Kadriklok amro inebata

▪ Kalaplok amro kwalok joij ñõn dron

▪ Kõmõni men ko rej kaitoklimoik kimro im jab lemnok kin nañinmij eo

▪ Kalaplok amro kobalok iben ro jet

▪ Kõmõni mejenkajik ko iben dron

[Kamelele in juõn pija ilo peij 28]

Ñõn amiro lo tõbrõk ilo amiro jokkin wõt juõn ilo mour eo amiro, komro maroñ ke kõmõne juõn men ekamõnõnõ iben dron?