‘Ilo ran ko an Kiñ Herõd’

ILO an kajeoñ mõn niñniñ eo Jisõs, Herõd eo Elap, kiñ in Judia, ear jilkinlok dri jilik ro an ñõn mõn aolep ladrik ro ilo Betleem me ruo air yiõ im driklok. Bwebwenato ko an armij rej kwalok kin elõñ ian men ko rar walok ‘ilo ran ko an kiñ Herõd,’ me ej jibõñ kij ñõn melele kin men ko rar walok mokta im ilo ien mour eo an Jisõs im jerbal in kwalok nan eo an.​—Matu 2:​1-​16.

Ta eo ear kõmõn bwe Herõd en kõnan mõn Jisõs? Im etke ke Jisõs ear lotak, ear or juõn an dri Ju ro kiñ, ak ke ear mij, Pontiõs Pailat, juõn dri Rom, ear komja ñõn ir? Ñõn lukkun melele kin jerbal eo an Herõd ilo bwebwenato an armij im etke ej aurõk ñõn ro rej riiti Baibel eo, jej aikwij etale men ko rar walok elõñ yiõ ko mokta jen an kar Jisõs lotak.

Air Ire kin Wõn eo Enaj Iroij ilo Judia

Ilo lukwõlapen ebeben eo ken karuo mokta jen an kar Jisõs lotak, Judia ear ber iomin kajur eo an baamle eo an Seleucid me rar iroij ilo ailiñ in Siria. Rar itok jen juõn ian kapen in dri tõrinae ro emen me rar iroij elikin an kar buñ iroij eo an Alexander eo Elap. Bõtab, ilo yiõ eo 168 mokta jen an kar Jisõs lotak, ke juõn ian kiñ ro jen baamle eo an Seleucid ear kajeoñ jolok kabuñ eo an Jeova im likiti kumi in kabuñ eo an Zeus ilo tempel eo ilo Jerusalem, baamle eo an Maccabee ear tel dri Ju ro ñõn jumaiki. Baamle eo an Maccabee, ak ãt eo juõn Hasmonean, ear iroij ion Judia jen yiõ ko 142-​63 mokta jen an kar Jisõs lotak.

Ilo yiõ eo 66 mokta jen an kar Jisõs lotak, ruo man nejin iroij eo jen baamle eo an Hasmonean, Hyrcanus II im Aristobulus, leo jein im jãtin, rar jumae dron bwe juõn iairro en iroij. Juõn tõrinae ear walok im erro jimor rar kajitõk jibõñ jen Pompey, juõn kapen in tõrinae an dri Rom me ilo ien eo ear ber ilo ailiñ in Siria. Pompey ear mõkõj im bõk kwonan.

Kajur eo an Ailiñ in Rom ear ereraklok ñõn ailiñ ko iturear, im ilo ien in, ear iroij ion enañin aolepen Esia Minor. Bõtab, iroij ro remõjno an ailiñ in Siria rar jab kõmõn jabrewõt men bwe armij ro ren lor kakien ko. Men in ear kõmõn bwe en ejelok ainemõn im ear kamakõt dri Rom ro ñõn kejbãrok ainemõn eo ilo ailiñ ko iturear. Inem Pompey ear bõk kwonan ñõn bõk ailiñ in Siria.

 Ear bebe ñõn jibõñ Hyrcanus ilo tõrinae eo ear walok ikõtairro Aristobulus, im ilo yiõ eo 63 mokta jen an kar Jisõs lotak, dri tõrinae ro an Rom rar tõrinaek Jerusalem im ke rar anjo, rar kairoije Hyrcanus. Bõtab, Hyrcanus ear jab juõn dri tel eanemkwoj. Kiõ, ear or an dri Rom ro maroñ im rar jab kõnan kõtlok bwe maroñ ko air ion jikin in en joko. Hyrcanus ear juõn iroij etã, me ear ber iomin kajur eo an Rom im ear atartar wõt ion jibõñ eo air ñõn kowõnmanlok iroij eo an. Ear maroñ lolorjake makõtkit ko an ailiñ eo an, bõtab ke ear itok ñõn kõmõn bujen iben ailiñ ko jet, ear aikwij lor kakien ko an Rom.

An Herõd Jino Iroij

Hyrcanus ear juõn iroij emõjino. Bõtab, Antipater, juõn armij in Idom me ej jemen Herõd eo Elap, ear jibõñ e. Antipater ear lap an kajur im e eo ear kõmõn bebe ko ñõn iroij eo. Ear jab kõtlok bwe dri Ju ro me rar jumae ren bõk kajur im ejjabto tokelik Antipater ear jino kajur ion Judia ijellokin kiñ eo. Ear jibõñ Julius Caesar ñõn tõrinaek dri kijirãt ro an ilo Ijipt, im dri Rom ro rar nawõnãn Antipater ikijen air kar leliñlok jerbal eo an einwõt juõn komja me dri tel in Rom wõt ear utiej jen e. Inem Antipater ear jitõñ leo nejin etan Phasael bwe en iroij ilo Jerusalem, im leo juõn nejin etan Herõd ñõn iroij ilo Galili.

Antipater ear katakin lõmaro nejin bwe ejelok tõbrõk enaj walok elañe dri Rom ro rejjab errã. Herõd ear kememej men in. Ilo aolepen ien jerbal eo an, ear aikwij jokkin wõt juõn ilo an kajejit kõnan ko an dri Rom ro me rar jibõñ e bwe en iroij wõt im kõnan ko an dri Ju ro ear iroij ioir. Kin an kar jela kilen lolorjake im kabel ilo jerbal eo an einwõt juõn kapen in tõrinae, men kein rar jibõñ e. Ilo ien eo kar jitõñ e bwe en juõn iroij ke ear 25 an yiõ, Herõd ear wini buruen dri Ju ro im dri Rom ro ikijen an kar kate ñõn jolok kumi in dri nana ro jen ailiñ eo ear iroij ie.

Elikin an kar dri kijirãt ro poisoni Antipater ilo yiõ eo 43 mokta jen an kar Jisõs lotak, Herõd ear erom armij eo ekajurtata ilo Judia. Bõtab, ear or armij ro rar kijirãt e. Ro me baamle ko air rar itok jen lain in iroij ilo Jerusalem rar watõk e juõn eo ear nibiji iroij eo air im rar kajeoñ karel dri Rom ro ñõn jolok e jen iroij. Bõtab, kõtõbar eo air ear jab tõbrõk. Dri Rom ro rar tiljek ñõn Antipater ilo air kememej kar jerbal ko an im rar kaurõk maroñ ko an leo nejin.

Kar Kãlete Iroij eo an Judia

Bebe eo an kar Pompey ñõn jibõñ Hyrcanus ilo tõrinae eo ear walok iben baamle eo an Hasmonean ñõn bõk tron eo 20 yiõ ko remotlok ear kaillu elõñ armij. Ro rar jibõñ Aristobulus elõñ alen rar kajeoñ in bõk tron eo, im ilo yiõ eo 40 mokta jen an kar Jisõs lotak, rar lo tõbrõk kin jibõñ eo an dri Partia ro me rar dri kijirãt ro an dri Rom. Ilo air kar kortokjen bwok eo ear walok jen tõrinae eo ilo Rom, rar tõrinaek Siria im Judia im ke rar anjo rar jolok Hyrcanus jen tron eo, im kairoij juõn jen baamle eo an Hasmonean me ear kijirãte dri Rom ro.

Herõd ear ko ñõn Rom, im rar lukkun karuwaineneiki e. Dri Rom ro rar kõnan jolok dri Partia ro jen Judia bwe ailiñ eo en bar ber iomin kajur eo air im kãlet juõn iroij emõn ibeir. Rar aikwij juõn armij me remaroñ liki im rar lo bwe Herõd ej armij eo ejejit im enaj rejetake dri Rom ro. Kin men in, dri utiej ro an Rom rar kairoij Herõd bwe en kiñ in Judia. Juõn ian men ko me Herõd ear kõmõne ilo an ebbururu kin tõmak eo an ñõn kejbãrok wõt kajur eo an ej ilo an kar tel juõn kumi in armij im maaj jen imõn kwelok ko an dri utiej ro an Rom ñõn tempel eo an Jupiter, ijo ear katok ñõn anij wan ko.

Kin jibõñ eo an dri tõrinae ro an Rom, Herõd ear anjo jen dri kijirãt ro an ilo Judia im ear bõk tron eo. Irenwõne eo an ñõn rein me rar jumae e ear lukkun nana. Ear jolok baamle eo an Hasmonean im dri Ju ro me rar itok jen lain eo an iroij me rar rejetake ir, im bareinwõt ro me rar illu kin an mõtaik ailiñ in Rom ak ej iroij ioir.

Herõd Ej Kalaplok Kajur eo An

Ilo yiõ eo 31 mokta jen an Jisõs lotak, Octavius, tokelik kar naetan Sizar Augõstõs ear anjo ion Mark Antony ilo Actium im ear jutõk einwõt juõn dri tel an Rom me ejelok ear jumaiki. Herõd ear kile bwe kin an kar to airro Mark Antony mõtaik dron, renaj kar lemnok bwe rejjab maroñ liki e. Inem Herõd ear mõkõj im kwalok ñõn Octavius bwe ej tiljek ñõn e. Kin men in dri  tel eo ekãl an Rom ear kalikar bwe Herõd ej kiñ in Judia im ear kalaplok jikin ko ear iroij ie.

Ilo yiõ ko tokelik, Herõd ear kabin im kamweie ailiñ eo an, im ear kõmõn bwe Jerusalem en juõn jikin elap an armij ro lore mõnit ko an ailiñ in Greece. Ear jino juõn jerbal in ekkal elap im ear kalek moko imõn iroij ro, jikin kwelok eo etan Seseria ej ber iturin lojit, im moko relap ñõn tempel eo an Jerusalem. Bõtab, kõtõbar ko an im unjen kajur eo an rar berber wõt ion jimjera eo an iben ailiñ in Rom.

Herõd ear eo eutiejtata ilo Judia im aolep rar aikwij kõmõni men ko ej ba. Herõd ear bareinwõt kajur ion pris ro reutiej, im ear jitõñ jabrewõt armij ñõn bõk jerbal in ekar ñõn an kõnan.

An Ebanban Ear Tellok ñõn An Uror

Mour eo an Herõd ear lukkun bwoktak. Elõñ ian limaro joñoul belen rar kõnan bwe juõn ian lõmaro nejiir en bõk tron eo an jemeir ñe enaj mij. Karõk ko retino iloan imõn Herõd ear kõmõn an lej im jab liki baamle eo an. Kin an kar ebanban, ear kõmõn bwe ren mõn lio belen eaurõktata iben etan Mariamne, im tokelik ear kõmõn bwe ren totoik lõmaro ruo nejin kin an lemnok bwe rar kõmõn karõk ko retao nae e. Kin men in, bwebwenato eo ilo buk in Matu kin an kar Herõd mõn aolep ajiri ro ilo Betleem ej errã iben men ko armij ro rejela kake kin karkar ko karkarin Herõd im kõtõbar eo an ñõn jolok dri kijirãt ro.

Jet rej ba bwe kin an kar Herõd jela bwe enañin aolep armij ro rar drike, ear bebe bwe ilo ien eo ej mij aolep ailiñ eo ej aikwij buromõj kake im jab lõñliñ bwe emij. Ñõn an kõtõbrõk jibarbar eo an, ear kalbuj dri utiej ro an Judia im kakien bwe ren mõn ir ilo ien eo rej kajela bwe emij. Bõtab rar jab lore kien in.

Tokjen Iroij eo an Herõd eo Elap

Elikin mij eo an Herõd, Rom ear kakien bwe Arkileõs en bõk jikin jemen einwõt iroij in Judia im kõmõn bwe lõmaro ruo nejin Herõd ren iroij ilo jikin ko jet. Antipas en iroij ion Galili im Perea, im Pilip ion Ituria im Trakonitis. Arkileõs ear jab buñbuñ iben armij ro dron im dri tel ro an ilo Rom. Elikin joñoul yiõ in an kar likjõp ilo an iroij, dri Rom ro rar jolok e im rar jitõñ juõn air mõke komja, me ear bõk jerbal in moktalok jen Pontiõs Pailat. Ilo kõtan ien in, Pilip im Antipas eo me Luk ej naetan Herõd, rar wõnmanlok wõt im iroij ion jikin ko rar iroij ie. Eñin kar wãwen kien ko ilo kar jinoin jerbal in kwalok nan eo an Jisõs.​—Luk 3:1.

Herõd eo Elap ear juõn dri tel emeletlet ilo kien im juõn dri uror, bwelen men eo enanatata ear kõmõne ej ilo an kar kajeoñ mõn Jisõs ke ear niñniñ. Ar etale jerbal eo an Herõd ej jibõñ ro rej riit Baibel ñõn melele men ko raurõk me rar walok ikõtan men ko rar je ilo Jeje ko ilo Kalimur Mokta im bwebwenato ko ilo buk in Gospel ko. Ej bareinwõt jibõñ ir ñõn melele ewi wãwen dri Rom ro rar jino iroij ion dri Ju ro im kin men ko rar walok mokta im ilo ien mour eo an Jisõs im jerbal in kwalok nan eo an.

[Kamelele in juõn pija ilo peij 31]

Palestine im jikin ko ibelakin ilo ran ko an Herõd

SIRIA

ITURIA

GALILI

TRAKONITIS

Lomalo in Galili

River Jordan

Seseria

SAMERIA

PEREA

Jerusalem

Betleem

JUDIA

Lomalo in Salt

IDOM

[Kamelele in juõn pija ilo peij 29]

Herõd ear juõn ian iroij ro me rar kajur ion Judia ilo ebeben ko ruo mokta jen jerbal in kwalok nan eo an Jisõs