Jitõb Kwojarjar Etke Armij ro Rebwok Kake?

TA IN jitõb kwojarjar? Emaroñ biruru kajitõk in, bõtab emaroñ bin ñõn lo juõn uak ebiruru. Dri tel eo eutiejtata ken ka 16 an kabuñ in Catholic, Pope Benedict ear jiroñ juõn jar in armij ilo Ailiñ in Australia: “Jejjab maroñ lukkun melele kin ta in Jitõb.”

Emol bwe elõñ lemnok ko im berre ko ñe ej itok ñõn kajitõk in, Ta in jitõb kwojarjar? Itulõl rej jet uak ko me ekkã an armij ro ba:

• Jitõb kwojarjar ej juõn men emour me ej ber iloan dri kalor ro an Kraist.

• Jitõb kwojarjar ej wãwen eo Jeova ej jerbal ilo lõl in.

• Jitõb kwojarjar ej eo ken kajilu ilo Trinity.

Etke armij ro rebwok? Men in ear walok jen ebeben eo ken kemen, ke jet dri tel ro an kabuñ rar ba bwe jitõb kwojarjar eo ear juõn men emour me ej joñõn wõt juõn iben Anij. Bõtab, men in ear jab juõn katak jen Baibel eo ak jen dri kalor ro an Kraist ilo jinoin. Juõn Encyclopedia an Catholic ej ba: “Jitõb kwojarjar ej kajur eo an Anij . . . Enañin aolep Jeje ko ilo Kalimur Ekãl rej kwalok bwe jitõb eo im kajur eo an Anij rej einlok wõt juõn.”

Ebin an armij ro melele bwe juõn kajur ej juõn men emour. Jej ke tõmak dri tel ro an kabuñ ko me rar ba bwe “Jitõb Kwojarjar eo ej juõn Men Emour im ej jenolok jen Jemen im Nejin”?

Ñõn lo uak eo me jemaroñ liki, jej aikwij lale Nan in Anij, Baibel eo, me ej kwalok kin jitõb kwojarjar eo ilo tibrikin. Dri jilik Paul ear je: “Jeje ko otemjej emwij letok kin kakõrmol an Anij, ej bareinwõt or tokjeir kin katakin, im kowe.”​—2 Timote 3:​16.

Etke kwoj aikwij kabukot mol eo kin jitõb kwojarjar? Kinke am jela kin mol eo emaroñ kamaroñ yuk ñõn bõk jiboñ jen Anij. Jet ien, kwoj ke lemnok bwe kwojjab maroñ wõnmanlok wõt kin kajur eo am mõke? Jisõs ear kalimuri dri kalor ro an: “Kajitõk, im naj lewoj ñõn kom . . . Elañe komeo . . . kom jela kijkan lelok men ko remõn ñõn ro nejemi; ta, e jamin lap an Jememiuij i lõñ lelok Jitõb Kwojarjar ñõn ro otemjej rej kajitõk iben ke?”​—Luk 11:​9, 13.

Ilo katak ko tok jet, jenaj kõtlok bwe Jeje ko ilo Baibel ren kemelele ñõn kij kin ta in jitõb kwojarjar. Im jenaj lale ewi wãwen emaroñ or tokjen ñõn mour ko ar.

[Kamelele in juõn pija ilo peij 19]

Jeje ko ilo Baibel rej kemelele ñõn kij kin ta in jitõb kwojarjar