Wãwen Ar Jela​—Elañe Emol an Anij Kea Kake Kij

ELAÑE Anij ej yokwe kij, etke ekanuij lõñ iñtan ko? Kajitõk in ej juõn ian kajitõk ko armij rar kajitõk kake jen ien ko etto. Bwelen kwoj errã kin men in bwe elañe kwoj yokwe juõn armij, kwoban kõnan lo an iñtan, im elañe ej iion jorran, kwonaj kar kajeoñ in jibõñ e. Eñin unin an elõñ armij berre bwe Anij ej yokwe kij, kinke rej lo an kanuij lap iñtan ko ilo lõl in. Kin men in, eaurõk bwe jen etale mokta men ko rej kamol bwe Anij ej lukkun yokwe im kea kake kij.

Menin Kõmõnmõn ko Rej Kamol Bwe Anij Ej Yokwe Kij

Jeova Anij ej e eo ear “kõmõnmõn lõñ, im lõl, im lometo, im men otemjej ilo ir.” (Jerbal 4:​24) Ilo ar kalomõnlokjen kin men ko Jeova ear kõmõnmõni, jemaroñ ba bwe ej kea kake kij. Ñõn wanjoñok, lemnok kin men ko rej kamõnõnõ yuk. Kwoj mõnõnõ ke kin mõña ko renno? Jeova emaroñ kar letok juõn wõt kain mõña ñõn ar mour kake. Ijellokin men in, ear kõmõnmõn elõñ kain mõña ko rekajjo wãweir ñõn ar mõnõnõ kaki. Bareinwõt, Jeova ear kõmõnmõn im kaibujuij lõl in kin elõñ kain wijki, wũt, im melan ko raibujuij ñõn ar mõnõnõ kaki.

Lemnok bareinwõt kin wãwen an kar kõmõnmõn kij. Maroñ eo iber ñõn kõmõn kejak, mõnõnõ kin kajõñjõñ ko, im maroñ eo ñõn ar mõnõnõ kin men ko raibujuij ibelakir rejjab lukkun aurõk ñõn kõmõn bwe mour en wõnmanlok wõt, bõtab men kein aolep Anij ear litoki ñõn kõmõn bwe wãwen ar mour en emõn im lemõnõnõ. Lemnok bareinwõt kin kõtan ak jimjera eo am iben ro jet. Wõn iar ejjab  mõnõnõ ñe ej kõmao iben ro mõtõn rebake ak ñe juõn eo jej lukkun yokwe ej atebokõj kij? Emol, maroñ eo ñõn kwalok yokwe ej juõn menin letok jen Anij eo eyokwe! Kinke Anij ear kõmõnmõn armij im lelok ñõn ir maroñ eo ñõn yokwe, ejelok berre bwe karkar in ej mõtõn karkar ko karkarin Anij.

Baibel eo Ej Kamol Yokwe eo An Anij Kin Kij

Baibel eo ej jiroñ kij bwe Anij ej yokwe. (1 Jon 4:8) Yokwe eo an ejjab alikar wõt ilo menin kõmõnmõn ko an ak bareinwõt ej alikar ilo Nan eo an, Baibel eo. Ñõn wanjoñok, Baibel eo ej letok nan in tel ko me remaroñ kejbãrok ejmour eo ar, rejañ kij ñõn jadõr ilo men otemjej, im nan in kakkil ko nae karek im mãtia.​—1 Dri Korint 6:​9, 10.

Baibel eo ej bareinwõt letok nan in jiroñ ko kin wãwen ar jerbal ilo ainemõn iben dron, ej rejañ kij ñõn ar yokwe dron, kwalok koutiej, im joij ñõn ro jet. (Matu 7:​12) Ej kananaik jerbal im mõnit ko me rej bõktok elap iñtan, einwõt kibbon, ñiremij, ebanban, lũñ, im uror. Elañe armij ro rej kajeoñ in mour ekkar ñõn nan in kakabilek ko ilo Baibel, inem enaj driklok iñtan ko ilo belakin lõl.

Bõtab, kein kamol eo elaptata me ej kalikar yokwe eo an Anij, ej alikar ilo an kar letok Nejin, Jisõs, ñõn lomoren armij. Jon 3:​16 ej ba: “Kin an Anij yokwe lõl, E ar letok juõn wõt Nejin E ar keutak, bwe jabrewõt eo ej liki E en jab joko, a en mour in drio.” Kin men in, Jeova emwij an kar karõke ñõn an bõktok jemlok ñõn mij im iñtan ñõn indrio.​—1 Jon 3:8.

Alikar, elõñ kein kamol ko bwe Jeova ej yokwe kij. Kin men in, ejime ñõn ar ba bwe ejjab mõnõnõ elañe ej lo ar iñtan. Enaj emakõt ñõn an kajemlok iñtan. Jejjab aikwij antone pojõk wõt kin men in, kinke Baibel eo ej jiroñ kij kin ewi wãwen an Anij naj kajemlok iñtan.

[Kamelele in juõn pija ilo peij 12]

Maroñ eo ñõn yokwe ej juõn menin letok jen Anij eo eyokwe