Peran Wõt Ñe Kwõj Iioon Apañ ko ilo Raan Kein

“Anij am wõj likõpejñak im kajoor; Ri jipañ e kanooj epaak ilo eñtaan ko.”​—SAM 46:⁠1.

JOUJ IM UWAAK:

Ta eo jemaroñ kõm̦m̦ane el̦aññe jejjab kõn̦aan bwe apañ ko ad ren kabbeer kõj?

Ta unin ad aikuj in peran?

Ta wãween ko Jeova ej kõjerbali ñan jipañ kõj kijenmej ium̦win apañ ko jej iiooni?

1, 2. Ta apañ ko rar wal̦o̦k ñan elõñ armej? Ta men eo kõj kajjojo jekõn̦aan kõm̦m̦ane?

 IIEN kein jej mour ie rekanooj in pen. Jorrããn ko rel̦l̦ap rejjab bõjrak aer wal̦o̦k. Rej kõm̦m̦an an armej lukkuun jorrããn im eñtaan. Ta jorrããn kein? Rej m̦akũtkũt lal̦, n̦o ko rel̦l̦ap, kijeek, ibwijleplep, bool̦keno, aire, taibuun, im l̦añ ko rel̦l̦ap. Bareinwõt, elõñ rej iioon apañ ko ilo baam̦le ko aer im mour ko aer make. Men kein rej kõm̦m̦an an armej ro mijak im bũrom̦õj. Em̦ool an Baibõl̦ ba bwe jerata ak apañ ko remaroñ wal̦o̦k ñan jabdewõt armej ilo jabdewõt iien.​—Ekklisiastis 9:​11, UBS.

² Armej ro doon Anij rej wõnm̦aanl̦o̦k wõt im karejar ñan e ilo m̦õn̦õn̦õ meñe rej iioon apañ ko. Bõtab, kõj kajjojo jekõn̦aan bwe jen pojak in kijenmej ium̦win jabdewõt apañ ko rej wal̦o̦k ke jej epaakel̦o̦k jem̦l̦o̦kin jukjuk im pãd in. Ta ko jemaroñ kõm̦m̦ani bwe jen wõnm̦aanl̦o̦k wõt im karejar ñan Anij ilo m̦õn̦õn̦õ meñe men ko renana rej wal̦o̦k ñan kõj? Ta eo enaaj jipañ kõj bwe jen peran wõt ñe jej iioon apañ ko?

KATAK JÃN RO IM RAR PERAN WÕT

3. Ekkar ñan Rom 15:​4, ta eo emaroñ kaenõm̦m̦an kõj ñe jej iioon apañ ko?

³ El̦apl̦o̦k an apañ ko jelõt armej ro kiiõ jãn kar m̦okta, bõtab jãn jem̦aan in an wõr apañ ko rej wal̦o̦k. Jen etale joñak ko an jet ri karejar ro an Anij ilo iien ko etto me rar peran wõt ke rar iioon apañ ko. Jen lale ta eo jemaroñ katak jãn er.​—Rom 15:⁠4.

4. Ta jet iaan men ko Devid ear aikuj kijenmej kaki? Ta eo ear jipañ e?

⁴ L̦õmn̦ak m̦õk kõn jet iaan men ko me Devid ear aikuj in kijenmej kaki. Kiiñ Saul ear kõn̦aan m̦an e. Ri kõjdat ro rar tarin̦ae ippãn im juon iien rar bõke lim̦aro pãleen im ko kake er. Jet iaan ri tarin̦ae ro an im jet iaan ro ilo baam̦le eo an ekoba ro m̦õttan rar m̦on̦e. Bareinwõt, ewõr jet iien Devid ear lukkuun bũrom̦õj. (1 Samuel 18:​8, 9, UBS; 30:​1-5,  UBS; 2 Samuel 17:​1-3; 24:​15, 17; Sam 38:​4-8, UBS) Baibõl̦ ej kwal̦o̦k kõn joñan an kar l̦ap an Devid eñtaan kõn apañ kein im rar wal̦o̦k ñan e. Bõtab, men kein renana rar jab kadikl̦o̦k an lõke Jeova. Devid ear ba: “Jeova kajoor an aõ mour, wõn eo in lõl̦ño̦ñ kake?”​—Sam 27:1; riit Sam 27:​5, 10.

5. Ta eo ear jipañ Ebream im Sera ñan kijenmej ium̦win apañ ko rar iiooni ilo mour ko aerro?

⁵ Ilo enañin aolepen mour eo an Ebream im Sera, erro ar kiki ilo em̦ nuknuk. Erro ar ruwamãejet ilo jikin ko rar pãd ie. Im ejjab aolep iien ear pidodo aerro mour. Ñan waanjoñak, erro ar eñtaan kõn kar juon ñũta ear wal̦o̦k im kõn an kar kauwõtata aerro pãd ibwiljin armej ro jãn aelõñ ko jet. Bõtab, erro ar peran wõt im kijenmej ium̦win aolep men kein. (Jenesis 12:10; 14:​14-16) Ta eo ear jipañ erro ñan kijenmej? Naan in Anij ej kwal̦o̦k ñan kõj bwe Ebream “ear kõttar jikin kweilo̦k eo Anij ear annañe im kalõke, jikin kweilo̦k eo foundation ko an rej pãd ñan indeeo.” (Hibru 11:​8-10, UBS) Ebream im Sera rar jab kõtl̦o̦k bwe apañ ko erro ar iiooni ren kõm̦m̦an aerro bũrom̦õj im ebbeer. Ak aolep iien erro ar keememej wõt men eo Anij ear kallim̦uri erro kake.

6. Ewi wãween jemaroñ anõke joñak eo an Job?

⁶ Job ear juon eo me ear l̦ap jãn joñan an kar eñtaan. Baj l̦õmn̦ak m̦õk kõn eñjake im l̦õmn̦ak eo an ke aolep men ko ilo mour eo an rar oktak im jorrããn. (Job 3:​3, 11) Im ejjab men in wõt, ak Job ear jab jel̦ã ñan jidik taunin an kar wal̦o̦k aolep apañ ko ilo mour eo an. Bõtab, meñe ãindein, Job ear jab ebbeer. Ear tiljek wõt im lõke wõt Anij. (Riit Job 2:​3, UBS.) Elukkuun em̦m̦an joñak in an Job ñan kõj im jej aikuj anõke.

7. Ta jet iaan men ko Paul ear iiooni im eñtaan kaki ke ear kõm̦m̦ane jerbal eo an ñan Anij? Ta eo ear kaperan e bwe en wõnm̦aanl̦o̦k wõt im kõm̦m̦ane jerbal in an?

⁷ L̦õmn̦ak m̦õk bareinwõt kõn joñak eo an rijjelõk Paul. Ewõr men ko rekauwõtata ear iiooni ke ear pãd ilo ijoko ewõr armej ie, ãne jem̦aden, im ke ear ejerakrõk. Ear “kwõle im maro” im ear “pio̦ im keelwaan.” Bareinwõt, Paul ear ba bwe ewõr kar jet iien ear pãd ilo tim̦a ko me rar rup im ruñl̦o̦k ilo̦jet. Im juon iien ear eppepe ilo̦jet ium̦win juon boñ im juon raan. (2 Korint 11:​23-27) Bõtab, meñe Paul ear iioone aolep wãween kein, ear jim̦we wõt an l̦õmn̦ak. Juon iien, Paul ebaj wõt jidik mej. Tokãlik, ear ba: “Men in ear wal̦o̦k bwe kõmin jab make lõke kõm, ak Anij wõt, eo ej kajerkakpeje ro ri mej. Ear lo̦mo̦o̦ren kõm jãn mej ekaeñtaanan, im enaaj bar lo̦mo̦o̦ren kõm.” (2 Korint 1:​8-10, UBS) Ejjab kanooj in lõñ armej ro me rar iioon elõñ apañ ko ãinwõt kar Paul. Bõtab, elõñ iaad jemel̦el̦e kõn eñjake im l̦õmn̦ak eo an Paul ke ear iiooni apañ ko. Innem, joñak in an Paul kõn peran emaroñ bar kaenõm̦m̦an kõj.

JAB KÕTL̦O̦K BWE APAÑ KO REN KABBEER EOK

8. Ewi wãween apañ ko rainin remaroñ jelõt kõj? Kwal̦o̦k waanjoñak eo.

⁸ Rainin, elukkuun obrak lal̦ in kõn jorrããn ko im apañ ko rel̦l̦ap. Kõn men in, elõñ armej rej l̦õmn̦ak bwe rebane apañ ko aer kõn aer l̦ap im lõñ. Ãindein ippãn bar jet ri karejar ro an Anij. Lani * (lale kõmel̦el̦e eo itulal̦) ear m̦õn̦õn̦õ ke erro l̦eo ippãn rar jerbal in pioneer ilo Aujtõrõlia. Bõtab, ke ear jel̦ã bwe ekããnjer ittin, ear lukkuun ilbõk im bwilõñ. Ear bar ba bwe uno ko ear bũki rar kõm̦m̦an an nañinmej im bareinwõt ear jino l̦õmn̦ak bwe ejjel̦o̦k tokjãn. Im ilo ejja iien eo wõt, ear aikuj in bar lale l̦eo pãleen kõnke ekar jorrããn dilepin l̦eo im ej kab m̦õj an m̦wijm̦wij. El̦aññe kwaar iioon wãween ko ãinl̦o̦k wõt in, ta eo kwõnaaj kar kõm̦m̦ane?

9, 10. (1) Ta eo jen jab kõtl̦o̦k bwe Setan en lo tõprak ie? (2) Ta eo jen keememeje im emaroñ jipañ kõj kijenmej ium̦win “elõñ eñtaan” ko ekkar ñan Jerbal 14:⁠22?

⁹ Ñe jej iioon apañ ko, jej aikuj keememej bwe Setan ej kajjioñ in kõjerbali ñan kam̦õjn̦o̦ik tõmak eo ad im bwe en jako ad m̦õn̦õn̦õ. Jen jab kõtl̦o̦k bwe en lo tõprak ilo an kõm̦m̦ane men  in. Jabõn Kõnnaan 24:10 (UBS) ej ba bwe el̦aññe jej bũrom̦õj im ebbeer, innem enaaj ejjel̦o̦k ad kajoor im maroñ ñan kijenmej ium̦win apañ ko jej iiooni. Bõtab, em̦m̦an bwe jen kõl̦mãnl̦o̦kjen̦ kõn joñak ko rem̦m̦an ilo Baibõl̦. Jet iaan joñak kein ej kab m̦õj ad etali ilo jinoin katak in. Ilo ad kõl̦mãnl̦o̦kjen̦ kõn joñak ko rem̦m̦an, men in enaaj kaperan kõj ñe jej iioon apañ.

¹⁰ Ebar em̦m̦an bwe jen keememej bwe ejjel̦o̦k ad maroñ ñan jol̦o̦k aolep apañ ko. Ak jemaroñ kõtmãne bwe jenaaj baj iiooni wõt. (2 Timote 3:​12, UBS) Jerbal 14:22 ej ba: “Jen del̦o̦ñ ilo aelõñ in Anij kõn elõñ eñtaan.” Innem, ijello̦kun am̦ kõtl̦o̦k bwe apañ ko ren kabbeer eok, kwõn watõki bwe rej letok iien ñan am̦ kam̦ool am̦ lõke bwe Anij emaroñ jipañ eok.

11. Ta eo jemaroñ kõm̦m̦ane el̦aññe jejjab kõn̦aan bwe apañ ko ilo mour eo ad ren kabbeer kõj?

¹¹ Jej aikuj l̦õmn̦ak wõt kõn men ko rem̦m̦an ilo mour ko ad. Naan in Anij ej jiroñ kõj bwe ‘juon bõro em̦õn̦õn̦õ ej kam̦õn̦õn̦õik turin mejãd; a kõn bũrom̦õj in bũruod, em̦õj rupe ad.’ (Jabõn Kõnnaan 15:​13) El̦aññe aolep iien jej l̦õmn̦ak wõt kõn men ko me ejjel̦o̦k ad maroñ ñan ukoti ilo mour eo ad, eokwe jenaaj oktak im ebbeer. El̦ap ad jeraam̦m̦an bwe elõñ wãween ko Jeova ej kõjerbali ñan jipañ kõj. Meñe ilo iien ko ewal̦o̦k jorrããn ko rel̦l̦ap, Jeova enaaj kaenõm̦m̦an kõj ikijjeen Naan eo an, rejetake kõj ikijjeen jipañ ko jãn ro jeid im jatid ilo tõmak, im bareinwõt enaaj kaperan kõj ikijjeen kajoor eo an. Erkein ej men ko me jej aikuj l̦õmn̦ak kaki wõt im renaaj lukkuun kam̦õn̦õn̦õik kõj. Ijello̦kun ad l̦õmn̦ak wõt kõn apañ ko ilo mour eo ad, jen kate kõj joñan wõt ad maroñ ñan kijenmej ium̦win aolep apañ ko jej iiooni im l̦õmn̦ak wõt kõn men ko rem̦m̦an ilo mour eo ad.​​—Jabõn Kõnnaan 17:​22, UBS.

12, 13. (1) Ta eo ear jipañ ri karejar ro an Anij ñan kijenmej ium̦win jorrããn ko rel̦l̦ap? Kwal̦o̦k waanjoñak ko. (2) Ta eo jorrããn ko rel̦l̦ap rej kõm̦m̦an ad kile bwe eaorõktata ilo mour eo ad?

¹² Ilo iien ko rej kab mootl̦o̦k, ekar wal̦o̦k jorrããn ko rel̦l̦ap ilo jet aelõñ. Jemaroñ katak jãn wãween an kar ro jeid im jatid ilo tõmak kijenmej ium̦win jorrããn ko meñe ear jab pidodo ñan er. Ilo Pãpode eo ilo iiõ eo 2010, ear m̦akũtkũt lal̦ im ibwiji juon aelõñ etan Chile. Men kein me rar wal̦o̦k rekar ko̦kkure enañin aolepen m̦oko m̦õn ro jeid im jatid ekoba men ko m̦weier. Bareinwõt, jet iaan rein jeid im jatid ekar jako an wõr aer jerbal ñan kabwe aikuj ko aer. Bõtab, meñe rar iioon wãween kein reppen, rar poub wõt ilo jerbal eo an Jeova. Samuel, eo ej juon iaan ro me ear jorrããn m̦weo im̦õn, ear ba: “Ke kõmro lio ippa ear iioon jorrããn ko rel̦l̦ap, kõmro ar jab bõjrak jãn am̦ro etal ñan kweilo̦k ko im kwal̦o̦k naan. Kõn am̦ro kar kõm̦m̦ani wõt men kein, men in ear jipañ kõmro ñan jel̦ã ta eo kõmro en kõm̦m̦ane.” Ri pãlele rein ruo im bar elõñ ro jeid im jatid ilo tõmak rar jab kõtl̦o̦k bwe jorrããn ko rel̦l̦ap rar wal̦o̦k ñan er ren kabbeer er. Aoleper rar wõnm̦aanl̦o̦k wõt im kijejeto ilo aer jerbal ñan Jeova.

¹³ Ilo Jeptõmba eo ilo 2009 eo, ear wõt mijeljel ilo juon jikin etan Manila ilo Philippine. Joñan an kar l̦ap wõt, ear ibwiji jikin in. Juon em̦m̦aan im em̦weiie ear luuji elõñ iaan men ko m̦weien. Em̦m̦aan in ear ba bwe jorrããn in ear jelõt aolep armej, ro ri m̦weiie im ri jeram̦õl jim̦or. Aoleper rar iioon el̦ap apañ im eñtaan. Men in ej kakeememej kõj kõn naan in kakapilõk eo an Jijej. Ear ba: “Kom̦win koorl̦o̦k m̦weiuk ko ñan kom̦ ilañ, ijo ejjo im dile reban ko̦kkuri, im ri ko̦o̦t reban rupe im ko̦o̦ti.” (Matu 6:​20, UBS) Emaroñ m̦õkaj an jako jããn im men ko m̦weied. Kõn men in, armej ro me rej likũt men kein m̦oktata ilo mour ko aer ekkã aer iioon bũrom̦õj im inepata. Ej juon men el̦apl̦o̦k an mãlõtlõt ñe jej likũt Jeova m̦oktata ilo mour eo ad kõnke jekdo̦o̦n ta eo ej wal̦o̦k ñan kõj, jeban luuji jem̦jerã eo ad ippãn.​​—Riit Hibru 13:​5, 6, UBS.

UNIN AD AIKUJ IN PERAN

14. Ta unin ad aikuj in peran?

¹⁴ Jijej ear jiroñ rũkal̦oor ro an bwe enaaj wõr apañ ko renaaj wal̦o̦k ilo iien pãd eo an. Bõtab,  ear ba ñan er: “Kom̦win jab lõl̦ño̦ñ.” (Luk 21:⁠9) Ewõr unin ad aikuj in peran kõnke Irooj eo ad Jijej Kũraij im Ri Kõm̦anm̦an eo Jeova rej jipañ kõj. Paul ear rõjañ Timote ilo an kar jiroñe im ba bwe Anij “ejjab kõm̦m̦an bwe jen pikõt, ak ej kobrak kõj kõn kajoor im yokwe im maroñ anjo̦ ioon kõn̦aan ko ad make.”​​—2 Timote 1:​7, UBS.

15. Ta eo jet iaan ri karejar ro an Anij rar ba kõn aer lõke e? Ewi wãween jemaroñ peran ãinwõt er?

¹⁵ Baibõl̦ eo ej kwal̦o̦k ta ko jet iaan ri karejar ro an Anij rar ba kõn aer lõke e. Juon iaaer ej Devid im ear ba: “Irooj ej kõjparok im wõnake eõ; Ij lõke e. Ear jipañ eõ, innem ij m̦õn̦õn̦õ im ij al im nõbare.” (Sam 28:​7, UBS) Bareinwõt, Paul ear ba: “Ilo men kein otemjej el̦ap ad anjo̦ kõn Eo ear yokwe kõj.” (Rom 8:​37) Im ke Jijej ear jel̦ã bwe m̦õttan jidik renaaj kalbuuji im m̦ane, ear ba juon men me ej kaalikkar an lukkuun epaake Anij. Ear jiroñ rijjelõk ro an: “I jab make Iaõ, bwe Jema ej pãd Ippa.” (Jon 16:​32) Ta eo ri karejar rein an Anij rej kaalikkare ikijjeen naan kein aer? Eokwe, aoleper rej kaalikkar aer lõke Jeova kõn aolepen bũrueer. El̦aññe jej katak ñan lõke Anij ilo ejja wãween in wõt, jenaaj peran wõt jekdo̦o̦n ta apañ ko jej iiooni.​​—Riit Sam 46:​1-3, UBS.

BÕK TOKJÃN JÃN WÃWEEN AN ANIJ JIPAÑ EOK

16. Etke eaorõk bwe jen katak Naan in Anij?

¹⁶ Ñe jej lõke kõj make, men in eban jipañ kõj ñan peran. Bõtab, ñe jej lõke Anij, men in enaaj kaperan kõj. Jenaaj peran im kajoor ñe jej niknik ilo ad katak Baibõl̦. Ñe jej kõm̦m̦ane men in, jemaroñ jel̦ã kajjien Anij im jej katak ñan lõke bwe enaaj jipañ kõj. Juon jeid im jatid kõrã me ewõr an nañinmej in bũrom̦õj ear ba bwe ñe ej riiti eoon ko rekaenõm̦m̦an jãn iien ñan iien, men in ej kõm̦m̦an bwe en em̦m̦an an mour. Jej ke keini ad katak ippãn baam̦le eo ad kajjojo wiik ãinwõt an kumi in ri karejar eo etiljek im mãlõtlõt rõjañ kõj ñan kõm̦m̦ane? Ad katak Naan in Anij emaroñ jipañ kõj ñan bõk ejja wõt l̦õmn̦ak eo an ri jeje sam eo ear ba: “O enañin l̦ap aõ yokwe kien ko Am̦! I kõl̦mãnl̦o̦kjen̦ kake ium̦win aolepen raan.”​​—Sam 119:⁠97.

17. (1) Ta wãween eo juon Jeova ej jipañ kõj bwe jen peran? (2) Ewi wãween bwebwenato ko ilo bok ko ad kõn ro jeid im jatid rar jipañ eok?

¹⁷ Bar juon wãween Jeova ej jipañ kõj ñan peran im kajoor ej ikijjeen bok ko an doulul in me rej katakin kõj kõn Naan eo an im rej kal̦apl̦o̦k ad lõke e. Elõñ rar bõk jipañ jãn aer kar riiti bwebwenato ko an ro jeid im jatid ilo bok kein. Ñan waanjoñak, juon jeid im jatid kõrã ilo Esia me ewõr an nañinmej in bũrom̦õj ear bõk kaenõm̦m̦an jãn an kar riiti juon bwebwenato ilo bok ko ad. Bwebwenato eo ear riiti ej kõn juon jeid im jatid m̦aan eo ekõn kar jerbal in mejinede ak ear bar bõk ejja nañinmej in wõt an kõrã in. Meñe ãindein, m̦aan in jeid im jatid ear wõnm̦aanl̦o̦k wõt im tiljek ilo an karejar ñan Anij. Kõrã eo jeid im jatid ear je im ba: “Bwebwenato in ear jipañ eõ ñan lukkuun mel̦el̦e kõn apañ eo aõ im ear letok aõ kõjatdikdik.”

18. Etke jej aikuj kate kõj ñan keini ad jar?

 ¹⁸ Jeova ej bareinwõt jipañ kõj ikijjeen jar. Jar emaroñ jipañ kõj ilo jabdewõt wãween ko jej iiooni. Rijjelõk Paul ear kaalikkar joñan aorõkin jar ke ear ba: “Kom̦win jab inepata kõn jabdewõt, ak ilo ami jar kom̦win kajjitõk ippãn Anij kõn aolepen aikuj ko ami, im iien otemjej kom̦win kajjitõk kõn bũruon kam̦m̦oolol. Innem aenõm̦m̦an eo an Anij, eo el̦ap jãn joñan an armej maroñ mel̦el̦e kake, enaaj kõjparok bũruomi im l̦õmn̦ak ko ami, ilo ami juon wõt ippãn Kũraij Jijej.” (Pilippai 4:​6, 7, UBS) Jej ke kate kõj ñan keini ad jar im kajjitõk bwe Anij en jipañ kõj ñan kijenmej ium̦win apañ ko? Ilo Iñlen, juon jeid im jatid m̦aan etan Alex eto an kar bõk nañinmej in bũrom̦õj. L̦ein ear ba bwe men eo im ear l̦aptata an kar jipañ e ej ilo an kar “kõnono ippãn Jeova ilo jar im roñjake E ilo an riiti Naan eo An.”

19. Ewi joñan an aorõk ñan pãd ilo kweilo̦k ko?

¹⁹ Kweilo̦k ko rej bar juon wãween Jeova ej jipañ kõj. Juon ri jeje sam ear je im kwal̦o̦k an kar lukkuun kõn̦aan pãd ilo tampel̦ eo an Jeova. (Sam 84:​2, UBS) Ãindein ke bar kõj? Lani, eo kar kwal̦o̦k kõn e ilo jinoin katak in, ear ba bwe ekanooj in aorõk bwe en pãd ilo aolep kweilo̦k ko im ippãn ro jein im jatin ilo tõmak. Ear ba, “Bwe Jeova en jipañ eõ, iar aikuj in pãd ilo kweilo̦k ko.”

20. Ewi wãween poub ilo jerbal in kwal̦o̦k naan ej jipañ kõj?

²⁰ Bareinwõt, ñe jej poub wõt ilo jerbal in kwal̦o̦k naan, jenaaj peranl̦o̦k. (1 Timote 4:​16) Ilo Aujtõrõlia, juon jeid im jatid kõrã ear iioon elõñ apañ ko ilo mour eo an. Liin ear ba: “Iar jab kõn̦aan kwal̦o̦k naan ñan jidik, ak juon iaan m̦aan ro rej lale eklejia eo ear kajjitõk ippa bwe in kwal̦o̦k naan ippãn. Kõn men in, iar etal. Ealikkar bwe Jeova ear jipañ eõ ilo aolepen iien ko iar ilo̦k im kwal̦o̦k naan kõnke iar lukkuun m̦õn̦õn̦õ.” (Jabõn Kõnnaan 16:​20, UBS) Elõñ rar lo im kile bwe ilo aer jipañ ro jet ñan tõmak ilo Jeova, men in ear bareinwõt kakajoore tõmak ko aer. Ilo aer jipañ ro jet, men in ej kõm̦m̦an bwe ren jab l̦õmn̦ak kõn apañ ko aer. Ak ej kõm̦m̦an bwe ren l̦õmn̦ak wõt kõn men ko rej kabuñbũruon Jeova ak men ko me raorõkl̦o̦k.​​—Epesõs 5:⁠10.

21. Ta eo jemaroñ tõmak im lõke ñe jej iioon apañ ko?

²¹ Elõñ men ko Jeova ear litok ñan jipañ kõj bwe jen kijenmej ium̦win apañ ko ad. El̦aññe jej kõtl̦o̦k bwe en jipañ kõj, jenaaj m̦õn̦õn̦õ wõt meñe elõñ apañ ko jej iiooni. Bareinwõt, jemaroñ katak ñan peran wõt ñe jej kõl̦mãnl̦o̦kjen̦ kõn joñak ko rem̦m̦an an ri karejar ro an Anij im anõke joñak ko aer. Meñe emaroñ lõñl̦o̦k apañ ko jej iiooni ke jej epaakel̦o̦k wõt jem̦l̦o̦kin jukjuk im pãd in, ak jemaroñ bõk ejja wõt l̦õmn̦ak eo an Paul ke ear ba: “El̦ap aer ko̦kkure kõm, ak kõm ban jeepepl̦o̦k” im “kõm ban ebbeer.” (2 Korint 4:​9, 16, UBS) Ikijjeen jipañ eo jãn Jeova, jemaroñ peran im kijenmej wõt ium̦win apañ ko jej iiooni.​​—Riit 2 Korint 4:​17, 18, UBS.

[Kamelele eo itulal]

[Kajitõk ko ñan katak]

[Pija ilo peij 14]

Em̦õj an Jeova kwal̦o̦k ñan kõj ta ko jen kõm̦m̦ani ñan bõk jipañ ñe jej iioon apañ ko