Kajjitõk 1: Ewõr Ke Unin Aõ Mour?
Kajjitõk 1: Ewõr Ke Unin Aõ Mour?
ROSALIND, eo ear dik im rũttol̦o̦k ilo Iñlen, ear kõn̦aan katak bwe en lukkuun jel̦ã kõn elõñ men. Ear bar kõn̦aan jipañ armej ro. Ãlikin an kar kadiwõjl̦o̦k jãn jikuul̦, ear bõk juon jerbal eutiej me ej kitibuj an jipañ ro ejjel̦o̦k im̦weer, im ear bareinwõt jipañ ro reutam̦we, ekoba ro epen aer ekkatak. Meñe ear em̦m̦an jerbal kein an im ear bwe an m̦weiie, ear ba, “Ium̦win elõñ iiõ in aõ kajjitõk ippa make, ‘Etke jej pãd im mour?’ im ‘Ta unin ad mour?’ ”
Etke jet rej bõkm̦aantak kajjitõk in? Armej rejjab ãinwõt menin mour ko me rejjab maroñ kwal̦o̦k kain l̦õmn̦ak rot kein me armej remaroñ kwal̦o̦ki. Kõj armej ewõr ad maroñ ñan katak jãn men ko rar wal̦o̦k ñan kõj m̦okta, bareinwõt ñan pukot ilju im jekl̦aj, im ñan jibadek juon mour em̦m̦an im ewõr tokjãn.
Ta uwaak eo an jet kõn kajjitõk in? Elõñ rej l̦õmn̦ak bwe unin ad mour ej ñan jibadek buñbuñ im m̦weiie bwe jen maroñ m̦õn̦õn̦õ.
Ta eo uwaak in an armej ro ej kaalikkare? Ej kaalikkar bwe jekõn̦aan kõm̦m̦ani wõt men ko el̦ap ad kaorõki ilo mour ko ad jãn ad kõm̦anm̦an ankilaan Anij. Im ej kwal̦o̦k bwe el̦apl̦o̦k ad kaorõk kõn̦aan ko ad make.
Ta eo Baibõl̦ ej ba? Meñe Kiiñ Solomon ear kanooj m̦weiie im ear kõm̦m̦ani elõñ menin kam̦õn̦õn̦õ ko ilo mour eo an, ak tokãlik ear lo bwe men kein rej m̦õn̦õn̦õ an jidik wõt iien. Ear lo men eo me ej kõm̦m̦an an juon armej lukkuun m̦õn̦õn̦õ im wõr unin an mour ke ear ba: “Ãliktata, ewõr wõt juon men inaaj ba: Kwõn kautiej Anij im kabuñ ñane, im kwõn pokake kien ko an, kõnke eñin unin an kar Anij kõm̦anm̦an kõj armej.” (Ekklisiastis 12:13, UBS) Ad pokake kien ko an Anij ej kitibuj ad ta?
Ke Anij ear kõm̦anm̦an kõj ear kõn̦aan bwe jen m̦õn̦õn̦õ ilo mour ko ad. Solomon ear je: “Eñin men eo em̦m̦antata bwe juon armej en kõm̦m̦ane: m̦õñã im idaak, im m̦õn̦õn̦õ kõn leen jerbal ko an. Bõtab ij kile ke men kein rej bareinwõt itok jãn Anij.”—Ekklisiastis 2:24, UBS.
Anij ej bar kõn̦aan bwe jen yokwe im kõjparok baam̦le ko ad. Jen lale naan in kakapilõk kein an me rejejjet im remaroñ jipañ kajjojo ro uwaan juon baam̦le.
“L̦õm̦aro ren bareinwõt yokwe lim̦aro pãleer im ãinwõt ãnbwinnier.”—Epesõs 5:28.
“Lio en kautiej l̦eo pãleen.”—Epesõs 5:33.
“Ajri ran̦, kom̦win pokake jememi im jinemi.”—Epesõs 6:1.
El̦aññe jej pokake naan in kakapilõk kein ilo Baibõl̦, jenaaj lo m̦õn̦õn̦õ im jokwane. Bõtab, men eo eaorõktata jemaroñ kõm̦m̦ane ej wõnm̦aanl̦o̦k im katak kõn Ri Kõm̦anm̦an eo ad im epaake ãinwõt juon M̦õttad. Ilo m̦ool, Baibõl̦ ej ba bwe jen “ruwaakl̦o̦k ñan Anij.” Im ej kallim̦ur bwe Anij ‘enaaj ruwaaktok ñan kõj.’ (Jemes 4:8) El̦aññe kwõj kõm̦m̦ane men in, kwõnaaj m̦õn̦õn̦õ im kwõnaaj kile bwe ewõr unin am̦ mour.
Ñan kal̦apl̦o̦k am̦ mel̦el̦e kõn ewi wãween kwõmaroñ mour ilo juon wãween ej kabuñbũruon Anij, lale katak 12 in bok eo etan Katak ko Rem̦ool jãn Baibõl̦ Eo. Kwõmaroñ copy jãn Internet ilo www.mt1130.com
[Kamelele in juõn pija ilo page 5]
Ta eo Jijej Ear Ba kõn Unin Ad Mour?
Jijej ear jel̦ã kõn unin an kar mour ioon lal̦ in. Ear ba: “Kõn men in iar l̦otak, im kõn men in iar itok ñan lal̦, bwe in kõnnaan kõn m̦ool.” (Jon 18:37) Ilo aolepen mour eo an Jijej, ear katakin armej ro m̦ool eo kõn Anij im kõn Ankilaan.
Enaaj wõr unin ad mour el̦aññe jej l̦oore joñak eo an Jijej. Ilo m̦ool, Jijej ej kũr kõj ñan katak jãn e. (Matu 11:29) Jen lale ruo wãween jemaroñ kõm̦m̦ane men in.
Jijej ear ba bwe el̦aññe jekõn̦aan m̦õn̦õn̦õ jej aikuj “eo̦roñ naan in Anij, im kõjparoke.” (Luk 11:28) Ewi wãween jemaroñ kõm̦m̦ane men in? Ej ilo ad katak bwe jen jel̦ã ‘Anij eo em̦ool, im Jijej Kũraij eo ear jilkintok.’—Jon 17:3.
Jijej ear kakien rũkal̦oor ro an ñan katakin ro jet kõn men ko rar katak im jel̦ã kaki. Ear ba: “Innem kom̦win ilo̦k, im kõm̦m̦an ri aelõñ ko otemjej bwe ren rũkal̦oora, im peptaij er ilo etan Jema im Nejin, im Jetõb Kwõjarjar; im katakin er bwe ren pokake naan ko otemjej iar jiroñ kom̦.”—Matu 28:19, 20.
Ro im rar kal̦apl̦o̦k aer jel̦ã kõn Anij ilo aer katak Baibõl̦ im jerbali men ko rar katak kaki, rar lo bwe men in ear ukot mour ko aer im kõm̦m̦an bwe ren lukkuun m̦õn̦õn̦õ. Im ñe rej jipañ ro jet ñan katak kõn Anij, el̦apl̦o̦k aer tõmak bwe ewõr unin aer mour.
