Angela ej juon jeid im jatid kõrã 30 jim̦a an iiõ im ejjel̦o̦k pãleen. * (Lale kõmel̦el̦e eo itulal̦.) Jet iaan em̦m̦aan ro me rej lale eklejia eo renaaj lol̦o̦ke im bwebwenato ippãn bõtab ejaadin ikũmkũm kõn men in. Angela ej kajjitõk ippãn make, ‘Renaaj ba ta ñan ña? Ãinwõt ijel̦ã bwe iar jako jãn jet kweilo̦k ko, ak ilukkuun m̦õk kõn wõt jerbal eo aõ. Aolep raan ij lale im kau l̦al̦l̦ap im lel̦l̦ap ro, innem ñe ij ro̦o̦l ñan m̦weo im̦õ, ilukkuun m̦õk.’ Ejjab men in wõt, ak Angela ej bar inepata kõnke enañinmej jinen.

El̦aññe kwe juon iaan em̦m̦aan rein me renaaj bwebwenato ippãn Angela, ta eo kwõnaaj kar kõm̦m̦ane ñan jipañ im kakajoor e? M̦oktata ta eo kwomaroñ kõm̦m̦ane m̦okta jãn am̦ lol̦o̦k im bwebwenato ippãn ro me ‘rem̦õk’ ak rebbeer ãinwõt Angela?​—Jeremaia 31:25.

Jet iien jej m̦õk kõn jikin jerbal ko ad ak kõn eddo ko ad. Ñan waanjoñak, ri kanaan Daniel ear lukkuun “m̦õk” ke ear lo juon visõn im ear jab maroñ mel̦el̦e kake. (Daniel 8:27) Ta eo ear jipañe? Anij ear jilkinl̦o̦k juon enjel̦ etan Gebriel ñan Daniel. Enjel̦ in ear kõmel̦el̦eik mel̦el̦ein visõn eo ñan Daniel im ear ba ñane bwe Jeova ear eo̦roñ jar eo an. Ejjab men in wõt, ak enjel̦ in ear ba ñan Daniel: “Anij ej yokwe eok.” (Daniel 9:21-23, UBS) Tokãlik, bar juon enjel̦ ear kakajoor Daniel kõn ejja naan kein wõt.​—Daniel 10:19, UBS.

Kwõmaroñ bar kakajoor juon iaan ri tõmak ro m̦õttad me em̦õk ak ebbeer. Ta eo enaaj jipañ eok ñan kakajoor e? Eokwe, l̦õmn̦ak m̦okta kõn apañ ko ej iiooni. Kajjitõkin eok make, ‘Ta apañ ko ej iiooni? Etke apañ kein remaroñ kabbeer  e? Kain armej rot e, ta wãween ko rem̦m̦an ej kwal̦o̦ki?’ Juon em̦m̦aan etan Richard ear jino lale eklejia eo elõñl̦o̦k jãn 20 iiõ ko remootl̦o̦k. Ej ba bwe m̦okta jãn an lol̦o̦k im bwebwenato ippãn juon iaan ri tõmak ro m̦õttad, ej l̦õmn̦ak kõn wãween ko rem̦m̦an kõn e. Ej bar lukkuun l̦õmn̦ak kõn apañ ko ej iiooni. Men in ej jipañ Richard ñan jel̦ã ta en kõm̦m̦ane ñan jipañ im kakajoor eo jein im jatin. Innem, el̦aññe komiro juon em̦m̦aan me ej lale eklejia eo naaj lol̦o̦k im bwebwenato ippãn juon iaan ri tõmak ro m̦õttad, ta eo komiro en kõm̦m̦ane m̦okta jãn amiro etal? Em̦m̦an bwe komiro en bwebwenato ippãn doon m̦okta kõn apañ ko ri tõmak eo m̦õttad ej iiooni.

Juon jeid im jatid emaroñ jook in kwal̦o̦k bũruon ñan em̦m̦aan ro me rej lale eklejia. Innem, ta eo kwõmaroñ kõm̦m̦ane ñan jipañ e bwe en jab ãliklik ak jook? Kwõmaroñ ettõñdikdik im kwal̦o̦k naan ko rejouj ñan e ilo jinoin amiro bwebwenato. Juon em̦m̦aan etan Maikal ear jino lale eklejia eo elõñl̦o̦k jãn 40 iiõ ko remootl̦o̦k. Ñe ej lol̦o̦k im bwebwenato ippãn ri tõmak ro m̦õttad ekkã an ba: “Kwõjel̦ã ta, ej juon jeraam̦m̦an ñan kõm ro im rej lale eklejia bwe kõm maroñ lol̦o̦k ro jeid im jatid ilo m̦oko im̦weer im kal̦apl̦o̦k ad jel̦ã kajjier. Kõn men in, iar kijooror in itok im bwebwenato ippam̦.”

M̦okta jãn am̦ bwebwenato ippãn eo jeid im jatid, kwõmaroñ jar ippãn. Ñe kwõj jar ippãn kwõn kwal̦o̦k kõn men ko rem̦m̦an kõn e ãinwõt an kijenmej, yokwe im an tõmak. Eñin men eo rijjelõk Paul ear kõm̦m̦ane ke ear jar kõn ri tõmak ro m̦õttan. (1 Tessalonika 1:2, 3) El̦aññe kwõj bar kwal̦o̦k men kein ilo jar eo am̦, men in enaaj jipañ komiro jim̦or im enaaj jim̦we amiro l̦õmn̦ak kõn unin am̦ lol̦o̦k e. Innem, enaaj em̦m̦an amiro bwebwenato ippãn doon im kwõnaaj maroñ kakajoor e. Jar eo am̦ emaroñ bar kaenõm̦m̦an e. Juon em̦m̦aan etan Ray eto an lale eklejia eo im ej ba bwe jet iien jej mel̦o̦kl̦o̦k kõn men ko rem̦m̦an jaar kõm̦m̦ani ilo ad jerbal ñan Anij. Ak ñe bar juon ej kakeememej kõj kõn men kein, men in ej lukkuun kaenõm̦m̦an bũruod.

Bar juon wãween kwõmaroñ kakajoor im jipañ eo m̦õttam̦ ej ilo am̦ kõjerbal Baibõl̦. Men in enaaj jipañ e meñe kwõj baj kwal̦o̦k juon wõt  eoon. (Rom 1:11, UBS) Ñan waanjoñak, juon jeid im jatid emaroñ lukkuun bũrom̦õj im l̦õmn̦ak bwe ejjel̦o̦k tokjãn. Ta eoon eo kwõmaroñ kwal̦o̦k ñan e? Eokwe, kwõmaroñ riiti eoon eo me ej kwal̦o̦k kõn ri jeje sam eo me ear ba, “Ãin an ejjel̦o̦k tokja wõt nien wain eo em̦õj jol̦o̦ke.” Meñe ri jeje Sam in ear l̦õmn̦ak bwe ejjel̦o̦k tokjãn ak ear ba: “Ijjañin mel̦o̦kl̦o̦k kien ko am̦.” (Sam 119:83, 176, UBS) Ãlikin am̦ kõmel̦el̦eiki mel̦el̦ein eoon in, kwõmaroñ ba ñan e bwe ej ãinwõt ri jeje Sam in me ejjab “mel̦o̦kl̦o̦k kien ko” an Anij.

Ak ta eoon ko kwõmaroñ kwal̦o̦ki ñan juon jeid im jatid kõrã me ejeja an kwal̦o̦k naan ak ejakol̦o̦k an kijejeto kõn jerbal ko an Anij? Eokwe, bõlen kwõmaroñ rõjañe ilo am̦ kwal̦o̦k waanjoñak eo kõn kõrã eo me ear luuji jããn ak m̦õttan jelba eo. (Luk 15:8-10, UBS) M̦õttan jelba in emaroñ kar m̦õttan m̦arm̦ar eo me el̦ap an aorõk ippãn kõrã eo. Ñe kwõj bwebwenato ippãn in jeid im jatid, kwõmaroñ ba ñan e bwe ej ãinwõt m̦õttan jelba eo me el̦ap an aorõk kõnke ej m̦õttan eklejia eo. Tokãlik, kwõmaroñ jipañ e bwe en kile bwe ej ãinwõt juon iaan jiip ko an Jeova im el̦ap an Jeova yokwe im kaorõke.

Ekkã an ro jeid im jatid m̦õn̦õn̦õ in bwebwenato kõn eoon ko rem̦m̦an ippãer. Kõn men in, kwõn kõtl̦o̦k aer kõnnaan im en jab kwe wõt ej kõnnaan! Ãlikin am̦ riiti juon eoon, kwõmaroñ kwal̦o̦k kõn juon naan ilo eoon eo im kajjitõk ippãer ñan kwal̦o̦k ta mel̦el̦ein ak ta eo em̦m̦an ippãer. Ñan waanjoñak, kwõmaroñ riiti 2 Korint 4:16. Tokãlik kwõmaroñ kajjitõk ippãer, “Elemen an kar Jeova ‘kõkããl’ ak kakajoor eok?” Ñe kwõj kwal̦o̦k kajjitõk ko ãinwõt kajjitõk jab in enaaj em̦m̦an amiro bwebwenato im enaaj kakajoor komiro jim̦or.​—Rom 1:12, UBS.

Kwõmaroñ bar kwal̦o̦k kõn bwebwenato eo an juon armej ilo Baibõl̦ ñan jipañ im kakajoor juon jeid im jatid. Bõlen in jeid im jatid ej lukkuun bũrom̦õj im ebbeer ãinwõt kar Hanna ak Epaprodaitõs. Meñe rein rar lukkuun bũrom̦õj ak rar lukkuun aorõk ippãn Anij. (1 Samuel 1:9-11, 20; Pilippai 2:25-30) Ebar lõñ bwebwenato ko rem̦m̦an ilo Baibõl̦ im kwõmaroñ kwal̦o̦ki ñan jipañ im kakajoor juon jeid im jatid.

Ãlikin am̦ lol̦o̦k im bwebwenato ippãn juon jeid im jatid, wõnm̦aanl̦o̦k wõt im jipañ e. (Jerbal 15:36) Elemen? Eokwe, m̦okta jãn am̦ etal jãn m̦weo im̦õn, kwõmaroñ kõm̦m̦an karõk ippãn ñan kwal̦o̦k naan ippãn doon. Juon em̦m̦aan etan Bernard me eto an lale eklejia eo ej ba bwe ej bar kepaak eo jeid im jatid im kajjitõk ippãn kõn naan in rõjañ ko ear lel̦o̦k ñan e. Ilo jouj, ej kajjitõk im ba, “Ejet men eo kõjro ar kõnnaan kake, ear ke jipañ eok?” Ñe kwõj kwal̦o̦k am̦ kea ilo wãween in, kwõnaaj jel̦ã el̦aññe ebar lõñ men ko kwõmaroñ kõm̦m̦ani ñan jipañ e.

Kõnke jej pãd ilo raan ko ãliktata, ro jeid im jatid relukkuun aikuj in jel̦ã bwe kwõj yokwe er, mel̦el̦e kõn er, im bwe reaorõk ippam̦. (1 Tessalonika 5:11) Kõn men in, m̦okta jãn am̦ etal im lol̦o̦k juon jeid im jatid kwõn bõk iien ñan l̦õmn̦ak kõn apañ ko ej iiooni. Em̦m̦an bwe kwõn jar kõn ta ko kwõnaaj ba im kõl̦mãnl̦o̦kjen̦ kõn eoon ko kwõnaaj riiti ñan e. El̦aññe kwõj kõm̦m̦ani men kein, kwõnaaj kwal̦o̦k naan ko rejejjet im rem̦m̦an, im kwõnaaj kakajoor eo “em̦õk” ak ebbeer!