Ewi Wãween an Kabuñ ko Watõk Tarin̦ae?
Alberto ear juon ri tarin̦ae ium̦win enañin joñoul iiõ. Ej ba: “Ãlikin an ri tõl in kabuñ eo jar im kajeraam̦m̦ane kõm, ear ba, ‘Anij en pãd ippemi.’ Ak iar ba ilo bũruõ, ‘Baibõl̦ ej ba, “Kwõn jab uror,” ak kiiõ ij etal im tarin̦ae im m̦an armej ro jet.’”
Ewõr bar juon em̦m̦aan etan Ray im ear tarin̦ae ilo Pata eo an Lal̦ in Kein Karuo. Juon iien ear kajjitõk ippãn ri tõl in kabuñ eo me ear jare er: “Kwõj uwetok ioon waan tarin̦ae in im jar bwe kõmin wiin ilo tarin̦ae. Ak ro kõmij ilen tarin̦aek er, rejjab ke bar kõm̦m̦an ãindein?” Ri tõl in kabuñ in ear uwaak im ba: “Jejjab jel̦ã kõn karõk ko an Anij.”
El̦aññe ejjab jubũruom̦ kõn uwaak in, eokwe ebar wõr ro jet rejjab jubũrueer im rejjab mel̦el̦e.
TA EO BAIBÕL̦ EJ BA KÕN MEN IN?
Jijej ear ba bwe juon iaan kien ko rel̦aptata an Anij ej bwe “kwõn yokwe rũturum̦ im ãinwõt kwe.” (Mark 12:31) Jijej ear ke ba bwe jen yokwe armej ro wõt jãn bukwõn eo ad ak jãn aelõñ eo ad? Ear jab. Ak ear ba ñan rũkal̦oor ro an: “Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.” (Jon 13:34, 35) Joñan an naaj l̦ap aer yokwe doon, armej renaaj kile bwe rej Kũrjin ro rem̦ool. Reban m̦an ro jet im renaaj m̦õn̦õn̦õ in mej kõn doon.
Kũrjin ro ilo iien ko etto rar l̦oore naan kein an Jijej. Juon bok me ej kwal̦o̦k kõn kabuñ ko etto ej ba bwe ri tõl in kabuñ ko etto ekoba em̦m̦aan ro etaer Tertullian im Origen rar jel̦ã im kwal̦o̦k bwe emo an jabdewõt Kũrjin m̦anm̦an armej. Kien eo an Jijej ear bõbraik aer bõk kun̦aaer ilo tarin̦ae ko an Rom.
TA EO RI KÕNNAAN RO AN JEOVA REJ KÕM̦M̦ANE?
Elõñ Ri Kõnnaan ro an Jeova im rej jokwe ilo enañin aolep aelõñ ko ilo lal̦ in. Kõn men in, ñe ej wõr tarin̦ae ko ikõtaan aelõñ ko aer, men in elukkuun pen ñan er. Bõtab, rej lukkuun kate er ñan jab bõk kun̦aaer im rej kwal̦o̦k wõt aer yokwe ro jet.
Ri tõl in kabuñ ko rej ke katakin armej ñan yokwe ro jet?
Ñan waanjoñak, ilo kar 1994 eo ear wõr tarin̦ae ikõtaan ruo bwij ilo juon jikin ilo Africa etan Rwanda. Ri Kõnnaan ro an Jeova jãn bwij eo etan Hutu im jãn bwij eo juon Tutsi, rar jab bõk kun̦aaer ñan jidik. Ekkã aer kar likũt mour ko aer ilo kauwõtata ñan jipañ doon im n̦ooje ro jet jãn bwij eo juon ilo m̦õko im̦weer. Ke ri tarin̦ae ro jãn Hutu rar jibwe ruo Ri Kõnnaan ro an Jeova kõn aer jipañe Kũrjin ro m̦õttaer jãn Tutsi, ri tarin̦ae rein rar ba ñan erro: “Komiro ej mej kõnke komiro ar jipañ armej in Tutsi bwe ren ko.” Im rar m̦ane em̦m̦aan rein ruo jãn bwijjin Hutu me rej Ri Kõnnaan ro an Jeova.—Jon 15:13.
Ta l̦õmn̦ak eo am̦ kõn men in? Ri Kõnnaan ro an Jeova rej ke l̦oore naan ko an Jijej bwe jen yokwe ro rũturid im ãinwõt kõj?
