Ilo bok in Maika, kar kanaan bwe Messaia eo enaaj kar l̦otak ilo Betleem. Im enañin 700 iiõ ãlikin an kar je kanaan in, ej kab jejjet kitien ke Jijej ear l̦otak ilo Betleem. Im enañin 30 iiõ ko ãlikin an kar Jijej l̦otak, kanaan eo an Daniel kõn iien eo Messaia enaaj wal̦o̦k ear jejjet kitien. Men in ear wal̦o̦k ilo iiõ eo 29 ke Jijej ear peptaij im Anij ear kapiti kõn kajoor eo an. Ilo iien eo ejejjet, ej kab wal̦o̦k Ine eo kar kallim̦ur kake ak Messaia eo!

Jijej ear m̦õkaj im jino kwal̦o̦k naan im “kõnono gospel an aelõñ in Anij.” (Luk 8:1) Ãinwõt kar kanaan kõn Messaia eo, Jijej ear jouj im lukkuun kea kõn ro jet. Katak ko an rar em̦m̦an im jejjet ñan mour ko an armej ro, im ear “kõmour armej jãn elõñ wãween nañinmej im m̦õjn̦o̦ ko aer.” Men in ear kaalikkar bwe Anij ear pãd ippãn. (Matu 4:23, UBS) Aolep armej ro redik im rerũtto rar kõn̦aan etal im kepaake Jijej. Juon iaan rũkal̦oor ro an Jijej ear ba: “Kõmar lo Messaia eo.”​—Jon 1:41, UBS.

Jijej ear kanaan kõn men ko me renaaj wal̦o̦k m̦okta jãn an kien eo an ak Aelõñ eo an jino tõl armej ro ioon lal̦. Ear ba bwe enaaj wõr tarin̦ae, m̦akũtkũt lal̦, im bar apañ ko jet. Kõn men in, ear rõjañ aolep bwe ren “ekkõl” im pojak.​—Mark 13:37.

Jijej ear weeppãn im aolep iien ear pokake Anij. Ak ear wõr ro rar kõjdate im tokãlik rar m̦ane. Mej eo an ear ãinwõt kein kõl̦l̦ã ñan karo̦o̦ltok ñan armej ro men eo me Adam im Iv rar jerwaane. Ta in? Mour indeeo ilo juon Pedetaij ijin ioon lal̦.

Ear bar jejjet kitien kanaan ko kõn mej eo an Jijej. Juon iaaer me ear jejjet ej kõn kanaan eo bwe Anij enaaj kajerkakpejeik e ãlikin jilu raan im enaaj erom juon jetõb ekajoor. Ãlikin an kar Jijej jerkakpeje im mour, ear jãde ñan rũkal̦oor ro an im oraer kar elõñl̦o̦k jãn 500. Im m̦okta wõt jãn an kar Jijej weaak lõñl̦o̦k, ear kakien rũkal̦oor ro an bwe ren kwal̦o̦k kõn e im Aelõñ eo ñan “ri aelõñ ko otemjej.” (Matu 28:19) Ear ke lukkuun lõt an rein kõm̦m̦ane jerbal in me kar jiroñ er kake?

​—Bwebwenato kein rej itok jãn Matu, Mark, Luk, Jon, im 1 Korint.