KATAK KO KÕN TAITÕL̦IN BOK IN | M̦OOL KE BWE EWÕR SETAN?
Ewõr Ke Setan?
“Iar dik im rũttol̦o̦k ilo aelõñin El Salvador. Ke iar bõt, m̦am̦a ekõn ba, ‘Lale bwe Setan enãj itok im bõk kwe!’ Im ikõn ba, ‘Em̦m̦an en itok!’ Iar tõmak ilo Anij, im iar jab tõmak bwe ewõr Setan.”—ROGELIO.
Kwõj ke errã ilo l̦õmn̦ak in an Rogelio ke ear dik? Ta iaan mel̦el̦e kein kwõj tõmake?
-
Ejjel̦o̦k Setan, im ãt in Setan ej kõkkar kõn nana ko ippãn juon armej.
-
Ewõr Setan, ak ejjab lukkuun el̦tok ñan kõj armej.
-
Setan ej juon jetõb ekajoor im el̦ap an tõlpiloik armej ro.
Ekajjo tõmak ko an elõñ milien armej ro kõn mel̦el̦e kein 3. Ak eaorõk ke ñan ad jel̦ã ewi wõt mel̦el̦e in ejim̦we iaaer? Eokwe, ñe ejjel̦o̦k Setan, mel̦el̦ein bwe em̦õj m̦on̦e ro me rej tõmak bwe ewõr Setan. Im ñe ewõr Setan ak ejjab lukkuun el̦tok ñan kõj, mel̦el̦ein bwe ejjel̦o̦k unin an armej ro mijak e. Bõtab, ñe Setan ej juon eo me el̦ap an kajoor im ej tõlpiloik armej ro, mel̦el̦ein bwe elukkuun l̦ap an kauwõtata.
Jen lale wãween an Jeje ko Rekkwõjarjar uwaake kajjitõk kein: Ta in im wõn in Setan? Setan ej ke kakõl̦l̦en nana ko ippãn juon armej? Setan ej ke juon jetõb? El̦aññe ewõr Setan, ej ke juon eo ekauwõtata ñan kwe? El̦aññe aet, ewi wãween am̦ maroñ kõjparok eok jãne?
