Epidodo ñan ba bwe Setan, eo me Baibõl̦ ej kõnnaan kake, ej kakõl̦l̦en nana ko ippãn juon armej. Bõtab, eñin ke men eo Baibõl̦ ej ba kõn Setan? El̦aññe aet, etke Baibõl̦ ej kwal̦o̦k bwe Setan ear kõnnaan ippãn Jijej Kũraij im ippãn Anij eo Ekajoor Bõtata? Eokwe, jen lale ta ko rar wal̦o̦k ilo iien kein.

Ke Jijej ear jino jerbal in kwal̦o̦k naan eo an, Tepil̦ eo ear kajjioñ kapoe kõn 3 menin kapo ko. M̦oktata, Setan ear kajjioñ in kapo Jijej bwe en kõjerbal maroñ eo an jãn Anij ekkar ñan kõn̦aan ko an make bwe en jol̦o̦k an kwõle. Kein karuo, Tepil̦ eo ear kajjioñ in kapo Jijej bwe en kõm̦m̦ane juon men ekauwõtata, me enãj kar kaalikkar an Jijej kappok nõbar jãn ro jet. Ãliktata, Setan ear bar kajjioñ kapo Jijej ilo an kar ba bwe enãj lel̦o̦k aolep aelõñ ko an lal̦ ñane el̦aññe enãj pedo im kabuñ ñane. Ilo aolep iien kein jilu me Setan ear kajjioñ in kapo Jijej, Jijej ear jum̦aiki ilo an ãlijil̦o̦k jet eoon ko jãn Baibõl̦ ñane.​—Matu 4:1-11; Luk 4:1–13.

Wõn eo Jijej ear kõnnaan ippãn? Ear ke kõnnaan ippãn juon men enana me ej wal̦o̦k ippãn make? Baibõl̦ ej ba bwe em̦õj kapo Jijej kõn “men ko otemjej, ãinwõt kõj, ijoke ejjel̦o̦k jerawiwi Ippãn.” (Hibru 4:15) Baibõl̦ ej bar ba: “Ear jab kõm̦m̦an jerawiwi; im ejjel̦o̦k en̦ ear roñ juon naanin riab jãn lo̦ñiin.” (1 Piter 2:22, UBS) Jijej ear weeppãn im ear tiljek wõt ñan Anij. Ear jab kõtl̦o̦k bwe en wal̦o̦k l̦õmn̦ak im kõn̦aan ko renana ippãn. Innem, ealikkar bwe Jijej ear  kõnnaan ippãn juon eo emour, im jab juon men enana me ej wal̦o̦k ippãn make.

Ilo ejja iien in wõt me Setan ear kõnnaan ippãn Jijej, ebar wõr kein kam̦ool ko bwe Setan ej juon eo emour.

• Tepil̦ eo ear kapo Jijej ilo an ba bwe enãj lel̦o̦k aolepen aelõñ ko an lal̦ in ñane ñe enãj pedo im kabuñ ñane. (Matu 4:8, 9) Ñe Setan ear jab juon eo emour, ealikkar bwe enãj kar ejjel̦o̦k tokjãn men ko ear ba. Barein wõt, Jijej ear jab ba bwe ejjel̦o̦k an Setan maroñ ioon aelõñ ko.

• Ãlikin an kar Jijej jum̦ae menin kapo ko an Tepil̦ eo, Baibõl̦ ej ba bwe Tepil̦ eo ear “ilo̦k jãn E m̦ae bar juon iien.” (Luk 4:13) Men in ej kwal̦o̦k bwe Setan ej juon rijum̦ae eo me ejjab bõjrak jãn an jum̦ae, im ejjab kakõl̦l̦en nana ko ippãn juon armej.

• Baibõl̦ ej ba bwe ‘enjel̦ ro rar itõm jipañe’ Jijej. (Matu 4:11) Rein me rar wal̦o̦kl̦o̦k ñan Jijej bwe ren rõjañe im jipañe rar ke lukkuun m̦oolin enjel̦? Aet. Kõn men in, jemaroñ ke ba bwe Setan ear bar juon jetõb ak juon eo emour ãinwõt kar enjel̦ rein?

Bwebwenatoun Job ej bareinwõt kwal̦o̦k kõn ruo iien ko me Setan im Anij rar kõnnaan ippãn doon. Job ekar juon eo el̦ap an kautiej Anij. Im ilo iien kein ruo me Anij im Setan rar kõnnaan ippãn doon, Anij ear nõbar Job kõn an kar tiljek im karejar wõt ñane. Ak Setan ear ba bwe unin an Job karejar ñan Anij ej kõnke el̦ap an Anij kajeraam̦m̦ane. Ke Tepil̦ eo ear kõnnaan ippãn Anij, ear ãinwõt ñe el̦apl̦o̦k an jel̦ã kõn Job jãn an Anij jel̦ã kake e. Kõn men in, Jeova ear kõtl̦o̦k bwe Setan en bõk aolep men ko m̦weien Job, ajri ro nejin, im bwe en lel̦o̦k juon nañinmej ñane.  * (Lale kõmel̦el̦e eo itulal̦.) Ejjabto tokãlik, ear jino alikkar bwe men ko Jeova ear ba kõn Job rar m̦ool, im men ko Setan ear ba rar riab. Im Anij ear kajeraam̦m̦an Job kõn an kar tiljek wõt ñane.​—Job 1:6-12; 2:1-7.

Ke Anij im Setan rar kõnnaan ippãn doon, Jeova ear ke kõnnaan ñan juon men enana me ej wal̦o̦k ippãn make? Baibõl̦ ej ba: “El̦ap an weeppãn jerbal ko an Anij.” (2 Samuel 22:31, UBS) Baibõl̦ ej bar ba: “Eokkwõjarjar, eokkwõjarjar, eokkwõjarjar, Irooj Anij Ekajoor Bõtata.” (Revelesõn 4:8, UBS) Kwõjarjar ej mel̦el̦ein lukkuun erreo im ejjel̦o̦k jerawiwi ñan jidik. Jeova eweeppãn im ejjel̦o̦k jabdewõt likjab ippãn. Kõn men in, ejjel̦o̦k jabdewõt men enana kõn E.

Jet remaroñ ba bwe Job ear jab juon lukkuun armej. Kõn men in, rej ba bwe bwebwenato eo ilo bokin Job kõn an kar Anij im Setan kõnnaan ippãn doon ej juon bwebwenato in kõkkar, im ear jab m̦ool an wal̦o̦k. Ak m̦ool ke men in? Eokwe, eoon ko jet ilo Baibõl̦ rej kwal̦o̦k bwe Job ear juon m̦oolin armej. Ñan waanjoñak ilo Jemes 5:7-11, kar kwal̦o̦k kõn joñak eo an Job ñan rõjañ Kũrjin ro bwe ren kijenmej ium̦win wãween ko reppen. Im kar bar kakeememej er bwe Jeova enãj kajeraam̦m̦an er el̦aññe rej tiljek wõt ãinwõt kar Job. En kar ke wõr tokjãn naan in rõjañ kein ñan Kũrjin ro el̦aññe bwebwenatoun Job ear jab m̦ool an wal̦o̦k? Im en kar ke wõr tokjãn el̦aññe ejjab m̦ool an Setan mãlejjoñe Kũrjin ro? Ejjab men in wõt, ak ilo bokin Ezekiel 14:14, 20, ke kar kõllaajrake etan em̦m̦aan ro 3 rewãnõk, etan Job ej juon iaan ãt ko rar wal̦o̦k ippãn etan Noa im Daniel. Job ear juon lukkuun armej, ãinwõt kar Noa im Daniel, im ear bar l̦ap an tõmak ilo Anij. El̦aññe Job ear lukkuun juon armej, ealikkar bwe eo me ear matõrtõre im kõm̦m̦an bwe en wal̦o̦k elõñ kain apañ ñane, ear bar juon eo emour ak em̦ool an pãd.

Ealikkar an Baibõl̦ kwal̦o̦k bwe Setan ej juon jetõb ak juon eo em̦ool an pãd. Ak kiiõ kwõmaroñ kajjitõk ippam̦ make im ba: ‘Setan ej ke kõm̦m̦an bwe en wal̦o̦k apañ im men ko rekauwõtata ñan ña im baam̦le e aõ ilo raan kein?’

Ta eo enãj wal̦o̦k, ñe ilo jidimkij ekajju iwõj juon kumi in rinana ñan bukwõn eo am̦? Ealikkar bwe bukwõn eo am̦ enãj oktak im juon jikin elukkuun kauwõtata kõnke elõñ men ko renana renãj wal̦o̦k. Kiiõ kajjioñ m̦õk l̦õmn̦ak kõn men in: Setan im aolep enjel̦ ro an renana rar jum̦ae Anij, im kar jolal̦tak er ñan lal̦ in im kiiõ ejjel̦o̦k ijen̦ remaroñ etal ñane. Kwõl̦ak lale ta ko renaaj wal̦o̦k itok jãn an rijum̦ae rein pãd ilo lal̦ in? Eokwe, l̦õmn̦ak m̦õk kõn men ko kwõj loi ilo nuuj ko ilo aelõñ eo kwõj pãd ie, ak nuuj ko jãn pel̦aakin lal̦ in.

• Kwõj ke lo bwe el̦apl̦o̦k nana im lãj, jekdo̦o̦n ñe kien im doulul ko ipel̦aakin lal̦ in rej kajjioñ kabõjrak men kein?

•   Kwõj ke lo bwe elõñl̦o̦k menin kam̦õn̦õn̦õ ko me rej kwal̦o̦k kõn kajjetõbtõb ak anijnij, meñe elõñ ro jemãn im jinen ajri ro rej kõjparok ro nejier jãn men kein?

• Kwõj ke lo bwe jukjukun pãd ko rej jorrããnl̦o̦k wõt meñe armej ro rej kate er ñan kõjparoki?

• Kwõj ke l̦õmn̦ak bwe unin an jorrããn kein wal̦o̦k ej kõnke ewõr juon eo enana me ej tõl armej ro bwe ren kõm̦m̦ani men ko renana?

Baibõl̦ ej kwal̦o̦k wõn eo ej pãd ilikin aolep men ko renana. Ej ba: “Im rar jol̦o̦k tũrãikõn eo el̦ap, jedpãnit erũtto, n̦aetan tepil̦ im Setan, eo ej m̦on̦e aolepen lal̦, em̦õj jol̦o̦ke ñan lal̦, im em̦õj jol̦o̦k enjel̦ ro an n̦a ippãn. . . . Wo ñan ãne im lo̦meto, bwe tepil̦ ear wanlal̦wõj ñan kom̦, im el̦ap an illu, bwe ejel̦ã jidik wõt iien ippãn.” (Revelesõn 12:9, 12) Elõñ armej rar etale menin kam̦ool ko im kile bwe Setan ej juon jetõb enana im ekauwõtata me ej tõl men ko rej wal̦o̦k ilo lal̦ in.

Kwõmaroñ l̦õmn̦ak ippam̦ make kõn ewi wãween am̦ maroñ kõjparok eok jãn Setan. Ej juon men ekkar bwe jen l̦õmn̦ak kake. Katak in tok juon enãj kwal̦o̦k ta ko kwõmaroñ kõm̦m̦ani ñan kõjparok eok.