Aolep Armej Rej Iioon Inepata!
KATAK KO KÕN TAITÕL̦IN BOK IN | WÃWEEN BWE EN DIKL̦O̦K AM̦ INEPATA
Aolep Armej Rej Iioon Inepata!
“Iar etal in wia m̦õñã ak ear wõr wõt kukiij, ak 10,000 alen an l̦apl̦o̦k on̦ãer jãn kar m̦okta! Raan eo tok juon, ear ejjel̦o̦k m̦õñã ñan jidik ilo m̦õn wia eo.”—Paul, jãn Zimbabwe.
“L̦eo ippa ear ba ñan ña ke ej etal jãn kõm. Iar lukkuun inepata kõn an kar jab m̦ool ñan ña. Ta eo enaaj kiiõ wal̦o̦k ñan ajri rã nejũ?”—Janet, jãn Amedka.
“Ñe ej jo̦ ainikien jaidiñ im ebbokl̦o̦k rakõt ko, ij ettõr im kũttiliek im babu ilal̦. Elõñ awa tokãlik, peiũ ekabde wũdiddid wõt.”—Alona, jãn Israel.
El̦ap inepata ko rej wal̦o̦k kõnke jej mour ilo raan kein me ekanooj “pen mour.” (2 Timote 3:1, UBS) Elõñ rej inepata kõn apañ ko rej wal̦o̦k ikijjeen jããn, an rup baam̦le ko aer, tarin̦ae, nañinmej, im jorrããn ko rel̦l̦ap. Jet rej inepata kõn ãjmour ko aer im rej kajjitõk ippãer make im ba: ‘Men eo ear eddek ilo ãnbwinnũ enaaj ke oktak im juon kããnjõr?’ Bar jet rej inepata kõn ro jibwier im rej ba: ‘Ajri rã jibũ renaaj rũttol̦o̦k ilo juon kain jukjukun pãd rot?’
Ejjab aolep men ko jej inepata kaki renana. Ekkã ad inepata im ikkũm̦kũm̦ m̦okta jãn ad teej, bõk kun̦aad ilo juon bũrookraam̦, ak interpiu. Ejjab bar nana ñe jej mijaki men ko rekauwõtata kõnke men in ej jipañ kõj ñan kõjparok kõj jãn ad jorrããn. Bõtab, ñe ej l̦e jãn joñan ad inepata, men in emaroñ ko̦kkure kõj. Kar kõm̦m̦an ekkatak ko ippãn elõñl̦o̦k jãn 68,000 rũtto ro, im kar loe bwe meñe jej inepata jidik, ak men in emaroñ kõkaduukl̦o̦k ad mour. Ejim̦we an kar Jijej kajjitõk im ba: “Wõn iaami emaroñ kaetokl̦o̦k an mour kõn an inepata kake?” Ealikkar bwe ñe juon ej l̦ap an inepata, men in eban kaetokl̦o̦k an mour. Eñin unin an kar Jijej ba: “Kom̦win jab inepata.” (Matu 6:25, 27, UBS) Ak ewi wãween bwe en dikl̦o̦k ad inepata?
Uwaak eo ekitibuj ad kwal̦o̦k mãlõtlõt, kal̦apl̦o̦k ad tõmak ilo Anij, im kõjatdikdik kõn ilju im jekl̦aj. Meñe jejjab iioone apañ ko rel̦l̦ap kiiõ, ak jemaroñ iiooni ilju im jekl̦aj. Kõn men in, jen lale ta ko rar jipañ Paul, Janet, im Alona bwe en dikl̦o̦k aer inepata.
