UWAAK EO JÃN BAIBÕL̦: “Iien eo ej itok im rimej otemjej ilo lõb renaaj roñ ainikien [Jijej], im renaaj wal̦o̦k jãn libwier.”​—Jon 5:28, 29, UBS.

Jijej ear kanaan kõn iien eo ñe enaaj tõl ilo Aelõñ eo an. Ilo naaj tõre en̦, ro rar mej renaaj bar mour. Fernando eo me kar kwal̦o̦k kake ilo katak eo l̦o̦k m̦okta ej ba: “Iar lukkuun bwilõñ ilo iien eo m̦oktata ke iar riiti bokin Jon 5:28, 29. Men in ear letok ñan eõ juon kõjatdikdik em̦ool, im iar jino l̦õmn̦ak wõt kake kõjatdikdik in kõn ilju im jekl̦aj.”

Ilo iien ko etto, em̦m̦aan eo etiljek etan Job ear tõmak bwe ñe enaaj mej, Anij enaaj bar kõmour e. Job ear kajjitõk im ba: “El̦aññe juon armej emej, enaaj bar mour ke?” Innem ear uwaak im ba: “Aolepen raan in aõ tarin̦ae [pãd ilo Lõb] inaaj kõttar, m̦ae iien inaaj kããl. Kwõnaaj kũr, innem inaaj uwaak Eok.”​—Job 14:14, 15.

Tõmak eo kõn an armej ro naaj bar mour ear jab juon men ekããl ñan kõrã eo jein Lazerõs etan Marta. Ãlikin an Lazerõs mej, Jijej ear ba ñan Marta: “Jeim̦ im jatũm̦ m̦aan enaaj bar jerkak.” Im Marta ear uwaak im ba: “Ijel̦ã enaaj bar jerkak ilo jerkakpeje eo ilo raan ãliktata.” Im Jijej ear ba ñane, “Ña jerkakpeje eo im mour eo. Eo ej lõke Eõ, meñe emej, enaaj bar mour.” (Jon 11:23-25) Innem ãlikin an ba naan kein, ear kõmour Lazerõs! Bwebwenato in ej kaalikkar jet iaan men ko rekabwilõñlõñ renaaj wal̦o̦k ilju im jekl̦aj. Baj pijaikl̦o̦k m̦õk an naaj aolep ro rar mej ipel̦aakin lal̦ in bar jerkak im mour!

UWAAK EO JÃN BAIBÕL̦: Naanin Anij ej kwal̦o̦k bwe jerkakpeje eo an Jijej eoktak jãn armej ro 8 me Baibõl̦ ej ba bwe rar bar jerkak im mour. Rein 8 rar jerkak im mour ijin ioon lal̦. Bõtab, Jijej ear jerkakpeje im mour ilañ. Baibõl̦ ej ba: “Jijej Kũraij . . . em̦õj an mootl̦o̦k ñan lañ im ej pãd ituanbwijmaroñin Anij.” (1 Piter 3:21, 22, UBS) Ebar ke wõr renaaj jerkakpeje im mour ilañ ijello̦kun Jijej? M̦oktal̦o̦k, Jijej ear jiroñ rijjilõk ro an im ba: “M̦õjin aõ ilo̦k im kõpooj jikimi, inaaj jepl̦aaktok im bõk kom̦ ñan ippa, bwe kom̦win pãd ijo ij pãd ie.”​—Jon 14:3, UBS.

Kũraij ear etal ñan lañ im kõppopo ñan an jet iaan rũkal̦oor ro an jerkakpeje im mour ilañ. Oran  ro renaaj jerkakpeje im mour ilañ ej 144,000. (Revelesõn 14:1, 3) Ak ta eo rein renaaj kõm̦m̦ane ilañ?

Enaaj l̦ap aer poub! Baibõl̦ ej ba: “Em̦õn̦õn̦õ im eokkwõjarjar eo ej bõk m̦õttan jerkakpeje in m̦okta. Mej kein karuo ejãmin maroñ ioer; a renaaj bũrij an Anij im an Kũraij, im renaaj kiiñ Ippãn ium̦win juon to̦ujin iiõ.” (Revelesõn 20:6) Ro me renaaj jerkakpeje ñan lañ renaaj tõl ippãn Kũraij ilañ ãinwõt kiiñ im bũrij ro. Renaaj pãd ilañ im tõl lal̦ in.

UWAAK EO JÃN BAIBÕL̦: Baibõl̦ ej kwal̦o̦k naan ko an rijjilõk Paul ke ear ba: “Kõjatdikdik eo aõ ilo Anij ejja bareinwõt eo aer, bwe armej otemjej, ro rem̦m̦an im ro renana, renaaj jerkak jãn mej.”​—Jerbal 24:15, UBS.

Wõn armej ro “rem̦m̦an” me Paul ear ba bwe renaaj jerkak im mour? L̦õmn̦ak kõn men in. M̦okta jãn an kar rũkarejar eo etiljek etan Daniel mej, kar jiroñe im ba: “Kwõnaaj mej, bõtab kwõnaaj bar jerkak im bõk jinõkjeej eo am̦ ilo iien eo ãliktata.” (Daniel 12:13, UBS) Ia eo Daniel enaaj jerkak im mour ie? Eokwe, Baibõl̦ ej ba: “Ro rem̦m̦an renaaj jolõt ãne eo, im jokwe ilowaan ñan indeeo.” (Sam 37:29) Im Jijej ear bar kanaan im ba: “Em̦õn̦õn̦õ ro ettã bũrueer bwe renaaj jolõt lal̦.” (Matu 5:5) Kõn men in, Daniel im em̦m̦aan im kõrã ro jet me rar tiljek renaaj jerkak im mour ilo lal̦ in ñan indeeo.

Wõn armej ro “renana” me Paul ear bar ba bwe renaaj jerkak im mour? Armej rein rej ro remej me rar jab l̦oore ta ko Baibõl̦ ej ba kõnke rar jaje katak ko rem̦ool. Ãlikin aer naaj jerkak jãn mej, renaaj maroñ katak im jel̦ã kõn Jeova im Jijej. * (Lale kõmel̦el̦e eo itulal̦.) (Jon 17:3) Aolep ro renaaj kããlõt ñan karejar ñan Jeova, renaaj mour toon wõt an Jeova mour. Renaaj mour ñan indeeo.

UWAAK EO JÃN BAIBÕL̦: Anij “enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan.” (Revelesõn 21:4) “Im renaaj kalõk m̦õko, im jokwe ilo er; im renaaj kallib jikin kallib in kũreep, im m̦õñã jãn leen.”​—Aiseia 65:21.

Pijaikl̦o̦k m̦õk am̦ mour ilo tõre en̦ im am̦ iioone jeraam̦m̦an kein ippãn ro rejitõnbõro ippam̦ me renaaj jerkak im mour! Ak kajjitõk eo in kiiõ, Ewi wãween am̦ maroñ lukkuun tõmak bwe ro remej renaaj bar mour?