Armej rej ba bwe Kũrijm̦õj ej juon m̦anit im imminene an Kũrjin ro ñan keememe raanin l̦otak eo an Jijej. Bõtab, elõñ iaan m̦anit ko rej kõm̦m̦ani ilo iien Kũrijm̦õj rekõm̦m̦an ad l̦õmn̦ak etke rej kõm̦m̦ani ilo raanin l̦otak eo an Jijej.

Juon men el̦ap an armej ro tõmake ej ino̦ñ ko kõn Santa Claus. Santa Claus ko ilo iien Kũrijm̦õj ko me em̦õn̦õn̦õ turin mejãer, emouj kwõdeak ko aer, epiiñ jepãer, im rej ekkõn̦ak nuknuk bũrõrõ, rar jino buñbuñ jãn juon kom̦bani in kõm̦m̦an dãn ilo kar Amedka ilo iiõ eo 1931. Ilo iiõ eo, kar kõm̦m̦an Santa Claus bwe ren kein karreelel ñan kom̦bani in im rar lo el̦ap tõprak. Bõtab ilo kar 1950 jim̦a ko, jet armej jãn Brazil rar kajjioñ jol̦o̦k aer kõjerbal Santa Claus im jino kõjerbal juon l̦al̦l̦ap etan Grandpa Indian me ej itok jãn bwebwenato ko an RiIndian ro. Ta eo ear wal̦o̦k? Ekkar ñan juon rũkaki in university etan Carlos E. Fantinati, ej ba bwe el̦apl̦o̦k an Santa Claus wiin ippãn armej ro jãn Grandpa Indian. Joñan, em̦m̦anl̦o̦k ippãer Santa Claus jãn ‘Jijej ke ear niñniñ im rar jino kõm̦m̦an bwe Santa Claus en jutak kõn raanin Kũrijm̦õj, Tijem̦ba 25 raan.’ Bõtab, Santa Claus ej ke m̦anit eo wõt im ej kõm̦m̦an bwe Kũrijm̦õj en juon men ebõd? Bwe jen jel̦ã uwaak eo, em̦m̦an jen etale m̦okta ta ko rar wal̦o̦k ilo tõre ko an Kũrjin ro jinointata.

Ekkar ñan juon bok (Encyclopedia Britannica) ej ba: “Ilo iien ko an rijjilõk ro, Kũrjin ro rar jab keememe raanin l̦otak ko an armej ro rar tiljek, ãinwõt Jijej.” Etke? Kõnke Kũrjin ro rar watõk bwe keemem ej m̦antin ripeikan im rar jel̦ã bwe rejjab aikuj in kõm̦m̦ane men in. Bareinwõt, Baibõl̦ ejjab kwal̦o̦k raanin l̦otak eo an Jijej.

Kũrjin ro jinoin rar jab keememe raanin l̦otak ko an armej ro. Bõtab, elõñl̦o̦k jãn 300 iiõ ko ãlikin Kũraij, kabuñ in Katlik ear jino ejaake m̦antin Kũrijm̦õj. Kõnke rar kõn̦aan bwe en lõñl̦o̦k uwaaer, rar kobaiktok m̦antin kabuñ ko an ripeikan ro ilo Rom bwe ren m̦õttan kabuñ eo aer, ekoba m̦anit ko rekõn kõm̦m̦ani ilo allõñ in m̦õl̦o ko. Ekkar ñan juon bok (Christmas in America) me Penne L. Restad ear je ej ba bwe kajjojo iiõ, jãn Tijem̦ba 17 ñan Jãnwõde 1, “enañin aolep RiRom ro rekõn kõm̦m̦ani kõjota ko rel̦l̦ap, kõm̦m̦an iukkure ko, bade, m̦aaj ilo ial̦ ko, im kõm̦m̦ani m̦akũtkũt ko jet ñan kabuñ ñan anij ko aer.” Im ilo Tijem̦ba 25 raan, RiRom ro rar keememe iien l̦otak eo an al̦, anij eo aer. Kõn men in, kabuñ in Katlik ear ejaake m̦antin Kũrijm̦õj ilo ejja raan in wõt. Rar ukote bwe en iien keememe raanin l̦otak eo an Jijej kõnke ren kareel elõñ iaan RiRom ro ñan kabuñ eo aer. Bõtab, bar juon bok (Santa Claus, a Biography) me Gerry Bowler ear je ej ba bwe RiRom ro “rar kõm̦m̦ani wõt m̦anit ko rekõn kõm̦m̦ani ilo allõñ in m̦õl̦o ko. Rar wõnm̦aanl̦o̦k wõt im kõm̦m̦ani ejja m̦anit ko aer ilo raanin Kũrijm̦õj.”

Elukkuun alikkar bwe men eo el̦aptata an bõd kõn Kũrijm̦õj ej kõnke ej itok jãn m̦antin kabuñ in ripeikan ro. Ilo juon bok (The Battle for Christmas) me Stephen Nissenbaum ear je ej kaalikkar bwe raanin Kũrijm̦õj ej “juon m̦antin ripeikan me rar ukote bwe armej ren l̦õmn̦ak bwe ej m̦anit an Kũrjin ro.” Kõn men in, raanin Kũrijm̦õj ejjab kautiej Anij im Nejin, Jijej Kũraij. Innem, m̦antin Kũrijm̦õj ej ke juon men dikdik? Baibõl̦ ej ba: “Ta jim̦we im bõd remaroñ ke rejetak doon? Ta meram im marok remaroñ ke pãd ippãn doon?” (2 Korint 6:14, UBS) M̦antin Kũrijm̦õj ej juon men el̦ap an bõd. Ej ãinwõt juon kããn wõjke me eip im “reban kajim̦we.”​—Ekklisiastis 1:15.