Библийыште Иисус Христосым чӱчкыдын «Юмын Эрге» манме (Иоаннын 1:49). Тиде шомак теве мом ончыкта: Юмо чыла чонан-влаклан, ты шотыштак Иисусланат, илышым пуэн (Псалом 35:10; Почмаш 4:11). Библий огеш туныкто, пуйто Иисус тыге ыштыме лийын, кузе еҥ-влак йочам ыштат.

 Библий дене келшышын, суксо-влакат Юмын эргыже-влак улыт (Иов 1:6). Тыгак, икымше айдеме, Адам, Юмын эргыже улеш манын, Библий ойла (Лукан 3:38). Но Иисус чыла нине Юмын эргыже-влак деч ойыртемалтеш, вет тудо Юмын икымше ыштымашыже лийын да тудым веле Юмо шкетын ыштен.

•  Иисус мландыште шочмыж деч ончыч каваште илен мо?

•  Иисус мландыш толмыж деч ончыч мом ыштен?

 Илен. Мландыште айдеме семын шочмо деч ончыч Иисус суксо лийын. Тудо шкат каласен: «Мый... пылпомыш гыч толынам» (Иоаннын 6:38; 8:23).

 Эн ончыч Юмо Иисусым ыштен, вара веле — молыжымат. Библийыште Иисус нерген теве мом каласыме:

•   Тудо «Юмын ыштыме тӱня деч ончыч шочшо» (Колоссян-влаклан 1:15).

•   Тудо «Юмын чыла ыштымыжын тӱҥалтышыже» (Почмаш 3:14).

 Библийысе ончылгоч каласымаш дене келшышын, Иисус тудо лийын, «кӧн шочмыжо — акрет жап гыч, ожнысо кечыла гыч» (Михей 5:2; Матфейын 2:4—6).

 Тудо каваште кӱшылсӧ верым налын. Юмылан кумалмыж годым Иисус каваште налын шогымо верже нерген тыге каласен: «Тӱня тӱҥалме деч ончыч Тый денет Мыйын могай чапем лийын, ынде тудо чап денак Тый, Ачай, Мыйым Шке ончылнет чапландаре» (Иоаннын 17:5).

 Тудо Ачажлан уло тӱням ышташ полшен. Иисус Юмо дене пырля пашам ыштен да «тудлан уста мастар семын» полшен (Притчи 8:30). Библийыште Иисус нерген каласыме: «пылпомышто, мландӱмбалне мо уло... чыла Тудын гоч ышталтын» (Колоссян-влаклан 1:16).

 Иисус Юмылан уло тӱням ышташ полшен, ты шотыштак суксо-влакым да Сандалыкым (Почмаш 5:11). Юмо ден Иисусым архитектор ден строитель дене таҥастараш лиеш. Кузе архитектор проектым шонен луктеш, а строитель тиде проект почеш зданийым чоҥа, тыгак Юмо ден Иисус пырля пашам ыштеныт.

 Тудо «Шомак» лийын. Иисусын мландыш толмо деч ончычсо илышыже нерген ойлен, Библий тудым «Шомак» манын лӱмда (Иоаннын 1:1). Очыни, тиде теве мом ончыкта: тудын гоч Юмо вес суксо-влаклан тӱрлӧ шинчымаш ден кӱштымашым пуэн.

 Тылеч посна Юмо Иисус гоч еҥ-влак дене мутланен. Мутлан, Эдем садыште Адам ден Евалан кӱштымашым пуымыж годым Юмо, очыни, Иисусым кучылтын (Тӱҥалтыш 2:16, 17). Тыгак Юмо израильтян-влакым ир мландыште Иисус гоч вӱден докан. Нуно тудым колыштшаш ыльыч (Исход 23:20—23) a.