Уке. Юмын Кугыжаныш христианын шӱмыштыжӧ огыл a. Библийыште тиде Кугыжанышым «Пылпомыш Кугыжаныш» манме. «Пылпомыш» мут тудын кушто чынжымак улмыжым умылтара (Матфейын 4:17). Тудо раш ончыкта: тиде чынжымак улшо, кава гыч вуйлатыше правительстве.

•   Юмын Кугыжанышын законжо, гражданже да вуйлатышыже-влак улыт. Тудо Юмын эрыкшым каваште да мландыште шукташ шогалтыме лийын (Матфейын 6:10; Почмаш 5:10, УТ).

•   Юмын правительствыже, але Кугыжаныш, мландыште улшо «чыла калыкым, йыжыҥым да йылмым» вуйлаташ тӱҥалеш (Даниил 7:13, 14). Тиде правительствылан вуйлаташ правам еҥ-влак огыл, а Юмо шкеже пуэн (Псалом 2:4—6; Исайя 9:7).

•   Иисусын каласымыж почеш ӱшанле апостолжо-влак кавасе Кугыжаныште тудын дене пырля «престолышто шинчаш» тӱҥалыт (Лукан 22:28, 30).

•   Юмын Кугыжанышын тушманже-влак улыт, да тудо нуным пытара (Псалом 2:1, 2, 8, 9; 109:1, 2; 1 Коринфян-влаклан 15:25, 26).

 Кавасе Кугыжаныш айдемын шӱмыштыжӧ улеш да тыге айдемым виктара манын, Библийыште возымо огыл. Туге гынат тудо раш ончыкта: «Кугыжаныш нерген шомак» але «Кугыжанышын... Поро Уверже» шӱмналан влиятлен кертеш да тидым ыштышаш (Матфейын 13:19; 24:14).

«Юмын Кугыжаныш — тендан кӧргыштӧ» манме шомак мом ончыкта?

 Библийым южо кусарымаште (мутлан, «Синодальный кусарымаште») Лукан 17:21 почеламутым тыге кусарыме: «Юмын Кугыжаныш — тендан кӧргыштӧ». Тидлан кӧра южыштлан Юмын Кугыжанышын кушто улмыжым умылаш йӧсӧ. Тиде почеламутым чын умылашлан контекстшым ончалман.

 Иисус Христос нине мут-влакым фарисей-влаклан, религиозный вуйлатыше-влаклан каласен. Нуно Иисус ваштареш шогеныт да, тудым казнитлышт манын, шуко вийым пыштеныт (Матфейын 12:14; Лукан 17:20). Юмын Кугыжаныш нунын кугешныше шӱмыштышт лийын манын, шонаш чын мо? Иисус нунылан каласен: «Чонда сайын кояш тӧчымӧ да закондымылык дене темын» (Матфейын 23:27, 28).

 Моло кусарымашлаште Лукан 17:21 почеламутышто Иисусын каласымыжым чынрак кусарыме. Мутлан, «У тӱня» кусарымаште тыге каласыме: «Юмын Кугыжанышыже тендан коклаштыда». Фарисей-влак дене мутланымыж годым Иисус, Юмын шогалтыме Кугыжа, нунын ончылнышт шоген. Сандене кавасе Кугыжаныш фарисей-влак «коклаштышт» лийын манын каласаш лиеш (Лукан 1:32, 33).