ИКМЫНЯР ий ончыч Индонезийыште Санги́хе изи отрошто лийыда ыле гын, очыни, серыште кум мемнан аканам ужыда ыле. Нуно верысе еҥ-влаклан пеш сайын палыме улыт. Вет нине ака-влак нунылан Библийым сайрак умылаш полшат. Но ты ганалан ака-влак йӧршынак вес пашам ыштеныт.

Эн ончыч нуно теҥыз гыч кугу кӱ-влакым серыш луктыныт. Нунын гыч южышт футбольный мече кугытан лийыныт. Вара изи пу пӱкеныш шинчын, ака-влак нине кӱ-влакым чӧгыт дене тыгыдемденыт. Тыгыде кӱжӧ-влак чыве муно деч изирак лийыныт. Вара нуно тиде кӱм пластик ведраш погеныт да мӧҥгышкышт тошкалтыш дене кӱзыктеныт. Тушто нуно тиде кӱм кугу мешакыш оптеныт. Вара нине мешак-влак грузовикыш оптымо да корным чоҥашлан наҥгайыме лийыныт.

Нине ака-влак гыч иктыже Ху́льда лийын. Тыглай годым ыштен налме оксаже ешыжын кӱлешлыкшым ситарашлан гына ситен. Но тудо эше ик цельым шынден — планшетым налаш. Вет тунам тудо JW Library^® приложенийым кучылт кертеш ыле. Хульда пален: тиде приложений гыч видеоролик-влак да вес материал тудлан сайрак таныклаш да Библийым умылаш полшат.

Тылзат пеле Хульда кажне эрдене молгунамсе деч кок шагатлан шукырак пашам ыштен. Тудо тынар шуко кӱм тыгыдемден налын, нунын дене изи грузовикымат темаш лиеш ыле. Тыгела тудо погымо оксажлан планшетым налын.

«Кӱм тыгыдемдыме паша куштылго огыл. Мый, мутат уке, чот ноенам. Уло капем коржын, — манеш Хульда. — Но кунам у планшетым кидыш налынам, мый вигак кап корштымо нерген монденам! Тудлан кӧра мыланем ындыжым таныклаш да христиан вашлиймашлан ямдылалташ куштылгырак». Эше Хульда ойла: «Пандемий жапыште, кунам чыла вашлиймаш-влак да таныклымаш интернет гоч эртеныт, планшет чот полшен». Ме Хульда дене пырля куанена, вет тудо цельышкыже шуын кертын.