Иисусын 70 тунемшыже Господьын икымше кас кочкышыж годым лийын огыл гынат, тиде огеш ончыкто, пуйто нуно Иисуслан йӧрышӧ лиймым чарненыт але тудым коден каеныт. Просто ту касын Иисус апостолжо-влак дене пырля лийнеже ыле.

Иисус 12 апостолжымат, вес 70 тунемшыжымат йӧрышылан шотлен. Эн ончыч Иисус тунемшыж-влак гыч 12 пӧръеҥым ойырен налын. Нуным тудо апостол манын лӱмден (Лук. 6:12—16). Кунам Иисус 12 тунемшыжым ӱжын да «Юмын Кугыжаныш нерген увертарен каласкалаш да черлым паремдаш нуным колтен», тудо Галилейыште лийын (Лук. 9:1—6). А варарак Иудейыште лиймыж годым «Господь эше шымле тунемшым ойырен налын да... кокыт дене колтен» (Лук. 9:51; 10:1). Тыге, Иисусын тӱрлӧ вере тудын нерген каласкалыше тунемшыже-влак лийыныт.

Еврей-влак, Иисусын тунемше лиймекат, ожнысыла кажне ийын ешышт дене пырля Кугечым эртареныт (Исх. 12:6—11, 17—20). Колымо деч ончыч Иисус апостолжо-влак дене пырля Иерусалимыш толын. Но тудо Иудей, Галилей да Перей гыч чыла тунемшыжым тушко толаш да тудын дене пырля тиде пайремым пайремлаш йодын огыл. Иисусын тиде касым апостолжо-влак дене пырля гына эртарымыже шуын докан. Тудо нунылан каласен: «Орлыкым чытымем деч ончыч Мый тендан дене тиде кугече кочкышым моткоч кочнем ыле!» (Лук. 22:15).

Тидлан Иисусын кугу амалже лийын. Вашке тудо «тӱнян языкшым Шке ӱмбакыже налын», «Юмын Пачаже» семын колышаш ыле (Иоан. 1:29). Тудо Иерусалимыште колышаш ыле, кушто шуко курым мучко Юмын служитлышыже-влак надырыштым конденыт. Кунам израильтян-влак Кугечым пайремленыт, пача нунылан шарныктен, кузе Иегова нуным Египетысе куллык деч утарен. Но Иисусын надырже кугурак значениян лийын — тудо айдеме тукымым язык ден колымаш деч утарен (1 Кор. 5:7, 8). Иисусын надырже апостол-влаклан христиан погынымашын негызше лияш йӧным пуэн (Еф. 2:20—22). Святой Иерусалим олан пырдыжшын негызше 12 кӱ гыч шоген, кудышт ӱмбалне «Пачан латкок Апостолжын лӱмышт» возымо лийын (Почм. 21:10—14). Кузе ужына, ӱшанле апостол-влаклан Юмын эрыкшым шуктымаште ойыртемалтше роль пуымо лийын. Сандене ме умылена, молан Иисус пытартыш Кугече да Господьын кас кочкышыж годым нунын дене пырля лийнеже ыле.

Иисусын 70 да вес тунемшыже-влак Господьын ту кас кочкышыж годым лийын огытыл. Туге гынат тиде кас нунылан кугу значениян лийын. Нуно ӱшанле кодыныт гын, вара нуно святой шӱлыш дене шӱрымӧ лийыныт да Кугыжаныш нерген сугыньын участникше-влак лийыныт, кудыжым Иисус апостолжо-влак дене ту касын ыштен (Лук. 22:29, 30).