ПРЕЛИСТАЈ некој весник. Гледај малку телевизија или слушај радио. Колку многу вести за криминал, војни и тероризам! Помисли и на твоите сопствени грижи. Можеби некоја болест или смртта на некој од твоите најмили ти причинува голема болка. Можеби и ти се чувствуваш како праведниот човек Јов, кој рекол дека е „напоен со неволја“ (Јов 10:15).

Запрашај се:

• Дали Бог имал намера мојот живот и животот на другите луѓе да биде ваков?

• Каде да најдам помош за да излезам на крај со проблемите?

• Има ли надеж дека некогаш ќе завладее мир во светот?

Библијата дава задоволувачки одговори на овие прашања.

„Тој ќе ја избрише секоја солза од нивните очи и смрт нема да има веќе, ни тага, ни пискот, ниту болка“ (Откровение 21:4)

„Сакатиот ќе скока како елен“ (Исаија 35:6)

„Ќе им се отворат очите на слепите“ (Исаија 35:5)

 „Сите оние што се во гробовите . . . ќе излезат“ (Јован 5:28, 29)

„Никој од жителите нема да рече: ,Болен сум‘“ (Исаија 33:24)

„На земјата житото богато ќе роди“ (Псалм 72:16)

Немој веднаш да помислиш дека она што го виде и го прочита на претходните страници е само сон. Бог ветил дека ќе го оствари тоа, а Библијата објаснува како.

Но, тоа не е сѐ. Библијата ќе ти помогне уште сега да бидеш среќен и да најдеш смисла во животот. Помисли за момент на своите грижи. Можеби имаш финансиски, семејни или здравствени проблеми, или можеби ти умрел некој од најмилите. Библијата може да ти помогне да излезеш на крај со проблемите. Во неа можеш да најдеш и утеха, зашто таа дава одговор на прашањата како што се:

• Зошто страдаме?

• Како да се справиме со животните грижи?

• Како да имаме посреќен семеен живот?

• Што се случува со човекот кога ќе умре?

• Дали некогаш пак ќе ги видиме нашите најмили што умреле?

• Зошто можеме да бидеме сигурни дека Бог ќе ги исполни своите ветувања за иднината?

 Тоа што ја читаш оваа книга покажува дека сакаш да дознаеш што учи Библијата, и со нејзина помош ќе успееш во тоа. Забележи дека има прашања за секој пасус. Преку прашања и одговори, Јеховините сведоци им помогнале на милиони луѓе подобро да ја запознаат Библијата. Се надеваме дека овој метод ќе ти се допадне и тебе. Сигурно ќе уживаш додека откриваш што навистина учи Библијата, и Бог нека те благослови во тоа!