Климатските промени влијаат штетно врз коралните гребени, врз школките и раковите, како и врз останатиот подводен свет. Научниците предупредуваат дека речиси сите гребени — кои поддржуваат најмалку четвртина од сиот познат жив свет во морињата — би можеле да изумрат во следните 30 години.

Експертите проценуваат дека до 90 отсто од морските птици можеби изеле некаква пластика, и се смета дека поради пластиката која се наоѓа во океаните секоја година угинуваат милиони морски животни.

Генералниот секретар на Обединетите нации, Антонио Гутереш, во 2022 год. изјавил: „Океаните ги земаме здраво за готово, и во моментов се соочуваме со она што јас би го нарекол ’ургентна состојба на океаните‘“.

Океаните и живиот свет во нив се создадени самите да се прочистуваат и да се одржуваат во добра состојба под услов луѓето да не ги загадуваат во голема мера. Една книга објаснува дека, кога еден дел од морето не е изложен на индустриско загадување, „процесите преку кои океаните самите се обновуваат се одвиваат непречено“ (Regeneration: Ending the Climate Crisis in One Generation). Да разгледаме неколку примери:

• Ситни организми наречени фитопланктони консумираат и складираат јаглерод диоксид — гас кој се смета дека е главен причинител на глобалното затоплување. Само фитопланктоните складираат речиси иста количина јаглерод диоксид колку што складираат сите дрвја, тревите и другите копнени растенија на Земјата заедно.

• Микробите се хранат со остатоците од мртвите риби, кои во спротивно би ги загадиле океаните. Потоа, микробите стануваат храна за други морски суштества. Според интернет-страницата за океаните од Смитсоновиот институт, оваа заедничка соработка „придонесува океаните да бидат чисти“.

• Многу океански суштества преку својот дигестивен систем ја претвораат киселата вода во океаните — која им штети на коралите, школките и раковите, како и на други суштества — во поздрава алкална вода.

Отпадот кој никогаш нема да влезе во океаните никогаш нема да мора да биде отстранет. Затоа експертите ги поттикнуваат луѓето да користат торби, прибор и садови кои се за повеќекратна употреба, а не пластични кои се користат само еднаш, а потоа се фрлаат во ѓубре.

Но, ова не е доволно. Неодамна, една организација за заштита на животната средина за една година собрала околу 8.300 тони отпад исфрлен од океаните на брегот на 112 земји. Сепак, тоа е само илјадити дел од ѓубрето кое што секоја година влегува во океаните.

Списанието Нешнл Џиографик известило дека „закиселувањето [на океаните] е дојдено до точка од која веројатно нема враќање“. Морските суштества се „во борба со глобалната економија, чиј темел се евтините фосилни горива. Ова воопшто не е фер борба“.

„Полна е земјата со твоите творби. А во ова море, толку големо и широко, се движат животни без број, суштества мали и големи“ (Псалм 104:24, 25).

Нашиот Творец ги создал океаните и нивната способност самите да се прочистуваат. Размисли: Ако тој знае толку многу за морињата и за сиот жив свет во нив, зарем не е логично да заклучиме дека може и да ја поправи штетата која им се нанесува на океаните? Види ја статијата „Бог ветува дека нашата планета ќе опстане“, која се наоѓа на страница 15.