ИМА многу луѓе што се во опасност да ја изгубат работата, домот, па дури и да останат без пензија, а сепак се опседнати со купување зашто мислат дека со парите ќе можат да си купат и среќа. Каков апсурд!

Таквите луѓе се лесен плен за рекламната идустрија, која со своите привлечни реклами сака да ни каже дека мораме да имаме поголема куќа, подобра кола и брендирана облека. Немаш пари? Нема проблем, купувај на кредит! На мнозина им е најважно да остават впечаток дека добро стојат финансиски, а всушност се во долгови до гуша.

Но, кога-тогаш реалноста ќе те гризне. Во книгата Епидемија на нарцизам (The Narcissism Epidemic) се вели: „Купувањето раскошни работи на кредит за да изгледаш и да се чувствуваш како победник е исто како да земаш дрога за да се чувствуваш подобро. Во почетокот и двете се евтини и функционираат супер, но не за долго. На крајот, остануваш без скршена пара и паѓаш во депресија“.

Библијата кажува колку е бесмислено да го ‚истакнуваме својот имот‘ (1. Јованово 2:16). Факт е дека опседнатоста со материјални работи ни го одвлекува вниманието од најважните работи во животот — работи кои не можат да се купат со пари. Да разгледаме три такви работи.

Бриен, a тинејџерка од САД, смета дека татко ѝ им придава преголема важност на работата и на парите што ги заработува. Таа вели: „Имаме сѐ што ни треба, па дури и повеќе, ама татко ми никогаш не е дома. Постојано е некаде на пат. Знам дека тоа му е дел од работата, ама мислам дека треба да поминува време и со своето семејство“.

Размисли: За што може да жали подоцна татко ѝ на Бриен? Како се одразува на неговиот однос со ќерка му тоа што става преголем акцент на материјалните работи? Што му треба на неговото семејство повеќе од пари?

Библиски начела:

• „Алчноста за пари е корен на сите зла. Некои луѓе се толку алчни по пари, што дури... си нанесоа многубројни болки“ (1. Тимотеј 6:10, Радосна Вест).

• „Подобро е јадење од зеленчук таму каде што има љубов отколку згоен јунец таму каде што има омраза“ (Изреки 15:17).

Заклучок: Среќата со пари не се купува. Семејството ќе биде среќно само ако поминувате време заедно и си покажувате љубов и внимание (Колошаните 3:18-21).

„Мајка ми цело време ми кажува дека треба да се омажам за некој богат и да се школувам за да можам да најдам добра работа и да бидам обезбедена за цел живот“, вели Сара (17). „Изгледа дека единствено нешто што ѝ се врти низ глава се парите.“

Размисли: Кога помислуваш на иднината, кои работи те загрижуваат? Како би можеле тие грижи да станат претерани? Како би можела мајка ѝ на Сара да има поурамнотежено гледиште за финансиската сигурност?

Библиски начела:

• „Престанете да собирате богатство на земјата, каде што молецот и ’рѓата нагризуваат и каде што крадци провалуваат и крадат“ (Матеј 6:19).

• „Не знаете каков ќе ви биде животот утре“ (Јаков 4:14).

Заклучок: Трупањето пари не носи вистинска сигурност. На крајот на краиштата, парите може да бидат украдени — а и не можат да излечат болест или да спречат смрт (Проповедник 7:12). Библијата истакнува дека можеме да чувствуваме вистинска сигурност само ако го запознаеме Бог и неговата намера (Јован 17:3).

„Родителите ме научија да живеам скромно“ вели Тања (24). „Јас и мојата сестра близначка бевме среќни додека растевме иако честопати ги имавме само основните работи.“

Размисли: Зошто не е секогаш лесно да се биде задоволен со основните работи? Како твојот став кон парите влијае врз твоето семејство?

Библиски начела:

• „Ако имаме храна, облека и покрив над главата, со тоа да бидеме задоволни“ (1. Тимотеј 6:8).

• „Среќни се оние што настојуваат да ги задоволат своите духовни потреби“ (Матеј 5:3).

Заклучок: Парите и она што може да се купи со нив не се најважните работи во животот. Библијата вели: „Дури и кога некој има во изобилство, неговиот живот не произлегува од она што го поседува“ (Лука 12:15). Најголемо задоволство во животот наоѓаме кога го знаеме одговорот на важни животни прашања, како што се:

• Зошто сме тука?

• Што ни носи иднината?

• Како можам да ги задоволам моите духовни потреби?