Ако постојано мислиме колку поинакви се другите од нас, може да почнеме да гледаме на работите по кои се разликуваат од нас како на мани или недостатоци. Како резултат на тоа, може да мислиме дека сме подобри од нив. Ако почнеме вака да гледаме на другите, ќе ни биде потешко да покажуваме сочувство. А ако немаме сочувство, тоа може да значи дека проблемот е посериозен — дека имаме предрасуди.

„Радувајте се со оние што се радуваат, плачете со оние што плачат“ (РИМЈАНИТЕ 12:15).

Што учиме од ова? Ова начело можеме да го сумираме во два збора — покажувај сочувство. Да покажуваме сочувство значи да се ставиме во кожата на другиот, да го почувствуваме она што тој го чувствува.

Кога сочувствуваме со некого, сфаќаме, всушност, колку слични сме со него. Стануваме свесни дека имаме исти чувства и дека реагираме исто на работите. Сочувството ни помага да сфатиме дека сите сме луѓе, без разлика кој какво потекло има. Колку повеќе се концентрираме на сличностите што ги имаме со другите толку помалку ќе ги осудуваме.

Сочувството ќе ни помогне и да ги почитуваме другите. Ен-Мари од Сенегал едно време со потценување гледала на луѓето што во очите на другите се од пониска класа. Таа објаснува како ѝ помогнало сочувството: „Кога видов колку страдаат луѓето од пониските класи, се запрашав како ќе се чувствував јас да бев на нивно место. Ова ми ги отвори очите. Ми помогна да сфатам дека самото тоа што припаѓам на ’повисока класа‘ — нешто што не е ниту по мој избор ниту по моја заслуга — не ме прави подобра од тие луѓе“. Да, ако се трудиме да сфатиме со што сѐ се борат другите, ќе бидеме поспремни да покажеме сочувство и разбирање наместо да ги критикуваме.

Труди се да не се концентрираш на разликите, туку на сличностите што ги имаш со луѓето од групата за која имаш лошо мислење. На пример, пробај да замислиш како се чувствуваат:

• додека јадат заедно со своето семејство

• на крајот од еден напорен работен ден

• додека се со своите пријатели

• додека ја слушаат својата омилена музика

Потоа пробај да се ставиш на нивно место. Прашај се:

• „Како би реагирал јас ако некој ме гледа со потценување?“

• „Како би ми било ако другите си донесат некакво мислење за мене пред да ме запознаат?“

• „Да припаѓав на таа група луѓе, како ќе сакав да се однесуваат другите со мене?“