Омразата е силно чувство на одбивност или непријателство кон некое лице или група луѓе. Таа е многу повеќе од моментално чувство на гнев.

Луѓето почнуваат да мразат од многу причини. Омразата често е насочена кон другите, но не поради нешто што тие прават туку поради тоа кои се. Оној што мрази смета дека сите луѓе од одредена група се лоши, опасни и не можат да се сменат на подобро. Може да ги гледа од високо, да ги смета за закана или како причина за проблеми. Некој можеби мрази затоа што бил жртва на насилство, неправда или, пак, доживеал нешто друго поради што кај него омразата почнала да пушта корен.

Некој може да ги мрази другите дури и кога не ги познава лично. На пример, некој може да почне несвесно да има предрасуди кон другите, само затоа што и неговото семејство или неговите пријатели имаат таков став. Така омразата лесно може да се пренесе на една цела група луѓе.

Имајќи на ум дека омразата лесно се шири, јасно ни е зошто толку многу луѓе се полни со омраза. Но, за да се искорени омразата која го држи овој свет во својот стисок, мора најпрво да дознаеме од каде влече корени. Тоа може да го дознаеме од Библијата.

ОМРАЗАТА НЕ СЕ ПОЈАВИЛА НАЈПРВО МЕЃУ ЛУЃЕТО. Таа најпрво се појавила кога еден ангел на небото, кој подоцна бил наречен Сатана Ѓаволот, се побунил против Бог. Библијата вели дека Ѓаволот е „човекоубиец откако се побуни“. Тој е „лажливец и татко на лагата“ и продолжува да сее омраза и насилство (Јован 8:44; 1. Јованово 3:11, 12). Библијата за него вели дека е злобен, гневен и насилен (Јов 2:7; Откровение 12:9, 12, 17).

НЕСОВРШЕНИТЕ ЛУЃЕ СЕ СКЛОНИ КОН ОМРАЗА. Првиот човек Адам се повел по Сатана и направил грев. Како резултат на тоа, сите луѓе наследиле грев и несовршеност (Римјаните 5:12). Каин, првородениот син на Адам, од омраза го убил својот брат Авел (1. Јованово 3:12). Точно е дека многу луѓе покажуваат љубов и сочувство, но поради наследениот грев, повеќето се склони кон себичност, завист и гордост — особини што само ја подгреваат омразата (2. Тимотеј 3:1-5).

НЕТОЛЕРАНЦИЈАТА Е ПЛОДНА ПОЧВА ЗА ОМРАЗАТА. Светот во кој живееме ја разгорува омразата со тоа што поттикнува на бездушно и немилосрдно однесување и ставови. Библијата вели дека „целиот свет е под власта на Злобниот“, Сатана Ѓаволот (1. Јованово 5:19). Затоа, на секој чекор има нетолеранција, предрасуди, навредлив говор, малтретирање и вандализам.

Меѓутоа, Библијата не само што ни открива од каде влече корени омразата туку и ни открива кое е решението за неа.