വിനോ​ദ​സ​ഞ്ചാ​രി​ക​ളു​ടെ പ്രധാന സന്ദർശ​ന​സ്ഥ​ല​മാണ്‌ ഫിലി​പ്പീൻസി​ലെ പഗ്‌സൻഹാൻ പട്ടണത്തിന്‌ അടുത്തുള്ള പ്രശസ്‌ത​മായ വെള്ളച്ചാ​ട്ടം. അതിന്‌ അടുത്താണ്‌ എ​ന്റെ​ പിതാവ്‌ നാർദോ ലെറോൺ വളർന്നു​വ​ന്നത്‌. പട്ടിണി​യും പരിവ​ട്ട​വു​മാ​യി​രു​ന്നു അദ്ദേഹ​ത്തിന്‌. ഗവൺമെ​ന്റി​ൽ അഴിമതി, പോലീ​സിൽ അഴിമതി, ജോലി​സ്ഥ​ലത്ത്‌ അഴിമതി ഇതൊക്കെ കണ്ടിട്ട്‌ അദ്ദേഹ​ത്തിന്‌ കടുത്ത ദേഷ്യ​വും അമർഷ​വും തോന്നി.

 ഞങ്ങൾ എട്ടു മക്കളെ​യും വളർത്താൻ എ​ന്റെ​ മാതാ​പി​താ​ക്കൾ വളരെ പാടു​പെട്ടു. കുന്നും പ്രദേ​ശത്തെ കൃഷി നോക്കു​ന്ന​തിന്‌ മിക്ക​പ്പോ​ഴും അവർ വീട്ടിൽനിന്ന്‌ മാറി താമസി​ച്ചി​രു​ന്നു. എനിക്കും എ​ന്റെ​ ചേട്ടൻ റോഡീ​ലീ​യൊ​യ്‌ക്കും മിക്ക​പ്പോ​ഴും ഞങ്ങളുടെ കാര്യങ്ങൾ സ്വന്തമാ​യി നോക്ക​ണ​മാ​യി​രു​ന്നു. പലപ്പോ​ഴും പട്ടിണി​യാ​യി​രു​ന്നു. കുട്ടി​ക്കാ​ലത്ത്‌ ഞങ്ങൾക്ക്‌ അധിക​മൊ​ന്നും കളിക്കാൻ പറ്റിയി​ട്ടില്ല. ഏഴാം വയസ്സു​മു​തൽ ഞങ്ങൾക്ക്‌ ഒരു തെങ്ങും​തോ​പ്പിൽ പണിക്കു പോ​കേ​ണ്ടി​വന്നു. കുത്ത​നെ​യുള്ള മലമ്പാ​ത​യി​ലൂ​ടെ തേങ്ങയും ചുമന്നു​കൊ​ണ്ടു പോക​ണ​മാ​യി​രു​ന്നു. ഭാരം ഒത്തിരി കൂടു​ത​ലാ​ണെ​ങ്കിൽ ഞങ്ങളോ​ടു വലിച്ചു​കൊ​ണ്ടു​പോ​കാൻ പറയും.

 പിതാവ്‌ ഞങ്ങളെ ഒരുപാട്‌ അടിക്കു​മാ​യി​രു​ന്നു. അതിലും കഷ്ടം അദ്ദേഹം അമ്മയെ അടിക്കു​ന്നതു കാണു​ന്ന​താ​യി​രു​ന്നു. ഞങ്ങൾ അത്‌ നിർത്തി​ക്കാൻ നോക്കി​യെ​ങ്കി​ലും നടന്നില്ല. വലുതാ​കു​മ്പോൾ പിതാ​വി​നെ കൊല്ലാ​മെന്ന്‌ ഞാനും ചേട്ടനും രഹസ്യ​മാ​യി പറഞ്ഞൊ​ത്തു. സ്‌നേ​ഹ​മുള്ള ഒരു പിതാ​വി​നെ കിട്ടാൻ ഞാൻ എത്ര കൊതി​ച്ചി​ട്ടു​ണ്ടെ​ന്നോ!

 പിതാവി​ന്റെ​ അക്രമം കണ്ട്‌ ദേഷ്യ​വും മടുപ്പും വന്ന ഞാൻ 14-ാം വയസ്സിൽ വീടു വിട്ടു. കുറച്ച്‌ കാലം തെരു​വു​ക​ളിൽ താമസി​ച്ചു. മരിഹ്വാ​ന എന്ന ലഹരി​വ​സ്‌തു ഉപയോ​ഗി​ക്കാൻ തുടങ്ങി. വിനോ​ദ​സ​ഞ്ചാ​രി​കളെ വെള്ളച്ചാ​ട്ടം കാണി​ക്കാൻ ബോട്ടിൽ കൊണ്ടു​പോ​കു​ന്ന​താ​യി പിന്നീട്‌ എ​ന്റെ​ ജോലി.

 കുറച്ചു വർഷങ്ങൾക്കു ശേഷം മനില​യിൽ ഞാൻ സർവ്വക​ലാ​ശാല വിദ്യാ​ഭ്യാ​സം തുടങ്ങി. എന്നാൽ ശനി, ഞായർ ദിവസ​ങ്ങ​ളിൽ ജോലി​ക്കു​വേണ്ടി പഗ്‌സൻഹാ​നിൽ തിരി​ച്ചു​വ​രേ​ണ്ട​തു​കൊണ്ട്‌ എനിക്കു പഠിക്കാൻ കുറച്ചു സമയമേ കിട്ടി​യി​രു​ന്നു​ള്ളൂ. വെറുതെ എങ്ങോ​ട്ടെ​ന്നി​ല്ലാ​തെ ഓടു​ന്ന​തു​പോ​ലെ​യാ​യി എ​ന്റെ​ ജീവിതം. മരിഹ്വാ​ന​യ്‌ക്ക്‌ എ​ന്റെ​ ടെൻഷൻ കുറയ്‌ക്കാൻ കഴിഞ്ഞില്ല. ഞാൻ മെഥാം​ഫാ​റ്റ​മീൻസ്‌, കൊ​ക്കെയ്‌ൻ, ഹെറോ​യിൻ തുടങ്ങിയ ലഹരി​വ​സ്‌തു​ക്കൾ പരീക്ഷി​ക്കാൻ തുടങ്ങി. അത്‌ എന്നെ ലൈം​ഗിക അധാർമി​ക​ത​യി​ലേക്കു നയിച്ചു. ദാരി​ദ്ര്യം, അനീതി, കഷ്ടപ്പാട്‌ ഇവരൊ​ക്കെ​യാ​യി എ​ന്റെ​ കൂട്ടു​കാർ. ഇതി​നൊ​ക്കെ കാരണ​ക്കാർ ഗവൺമെ​ന്റാ​ണെന്ന്‌ ഞാൻ വിശ്വ​സി​ച്ചു. ഞാൻ അതിനെ വെറുത്തു. “ജീവിതം, ഇതെന്താ ഇങ്ങനെ?” എന്നു ഞാൻ ദൈവ​ത്തോ​ടു ചോദി​ച്ചു. എന്നാൽ ഈ ചോദ്യ​ത്തി​നുള്ള ഉത്തരം തരാൻ ഒരു മതത്തി​നും കഴിഞ്ഞില്ല. അങ്ങനെ എ​ന്റെ​ ദുഃഖം മറക്കാൻ ഞാൻ ലഹരി​യു​ടെ ലോക​ത്തി​ലേക്കു ഊളി​യി​ട്ടി​റങ്ങി.

 1972-ൽ ഫിലിപ്പീൻസിലെ വിദ്യാർഥി​കൾ ഗവൺമെൻറിനെതിരെ പ്രതി​ഷേ​ധങ്ങൾ സംഘടി​പ്പി​ച്ചു. ഒരു പ്രതി​ഷേ​ധ​പ്ര​ക​ട​ന​ത്തിൽ ഞാനും പങ്കെടു​ത്തു. അത്‌ അക്രമാ​സ​ക്ത​മാ​യി. കുറെ പേർ അറസ്റ്റി​ലാ​യി. മാസങ്ങൾക്കു ശേഷം രാജ്യ​മൊ​ട്ടാ​കെ പട്ടാള​നി​യമം പ്രഖ്യാ​പി​ച്ചു.

 വീണ്ടും ഞാൻ തെരു​വി​ലെത്തി. എന്നാൽ പ്രതി​ഷേ​ധ​ത്തിൽ പങ്കെടു​ത്ത​തു​കൊണ്ട്‌ അധികാ​രി​കളെ പേടി​ച്ചാണ്‌ ഞാൻ അവിടെ കഴിഞ്ഞത്‌. മയക്കു​മ​രു​ന്നു​ശീ​ലം തുടർന്നു​കൊ​ണ്ടു​പോ​കാൻ നിവൃ​ത്തി​യി​ല്ലാ​തെ വന്നപ്പോൾ ഞാൻ കക്കാനും പണക്കാർക്കും വിദേ​ശി​കൾക്കും അനാശാ​സ്യ​പ്ര​വർത്തനം നടത്താൻ വേണ്ട സഹായങ്ങൾ ചെയ്‌തു​കൊ​ടു​ക്കാ​നും തുടങ്ങി. മരിച്ചാൽ എന്ത്‌ ജീവി​ച്ചാൽ എന്ത്‌ എന്ന മട്ടിലാ​യി ഞാൻ.

 അതിനി​ടെ എ​ന്റെ​ അമ്മയും അനിയ​നും യഹോ​വ​യു​ടെ സാക്ഷി​ക​ളു​ടെ കൂടെ ബൈബിൾ പഠിക്കാൻ തുടങ്ങി. കലി വന്ന എ​ന്റെ​ പിതാവ്‌ അവരുടെ ബൈബിൾപ്ര​സി​ദ്ധീ​ക​ര​ണങ്ങൾ കത്തിച്ചു​ക​ളഞ്ഞു. എന്നാൽ സഹിച്ചു​നിന്ന അവർ സ്‌നാ​ന​മേറ്റ്‌ സാക്ഷി​ക​ളാ​യി.

 ഭൂമി​യി​ലെ​ങ്ങും ഒരു അനീതി​യും ഇല്ലാത്ത ഒരു കാല​ത്തെ​ക്കു​റി​ച്ചുള്ള ബൈബിളി​ന്റെ​ വാഗ്‌ദാ​ന​ത്തെ​പ്പറ്റി ഒരു സാക്ഷി എ​ന്റെ​ പിതാ​വി​നോട്‌ ഒരിക്കൽ സംസാ​രി​ച്ചു. (സങ്കീർത്തനം 72:12-14) അത്‌ എ​ന്റെ​ പിതാ​വിന്‌ വളരെ ഇഷ്ടമായി. അതെക്കു​റിച്ച്‌ സ്വന്തമാ​യി ഒരു പഠനം നടത്താൻ അദ്ദേഹം തീരു​മാ​നി​ച്ചു. ബൈബി​ളിൽ ദൈവം വാഗ്‌ദാ​നം ചെയ്യുന്ന ഒരു ഗവൺമെ​ന്റി​നെക്കുറിച്ചു മാത്രമല്ല അദ്ദേഹം കണ്ടത്‌. പിതാ​ക്ക​ന്മാ​രിൽനി​ന്നും ഭർത്താ​ക്ക​ന്മാ​രിൽനി​ന്നും ദൈവം പ്രതീ​ക്ഷി​ക്കു​ന്നത്‌ എന്താ​ണെ​ന്നും അദ്ദേഹം മനസ്സി​ലാ​ക്കി. (എഫെസ്യർ 5:28; 6:4) കുറച്ചു കാലത്തി​നു ശേഷം എ​ന്റെ​ പിതാ​വും മറ്റ്‌ കൂടപ്പി​റ​പ്പു​ക​ളും സാക്ഷി​ക​ളാ​യി. വീട്ടിൽനിന്ന്‌ ദൂരെ​യാ​യി​രുന്ന ഞാൻ ഇതൊ​ന്നും അറിഞ്ഞില്ല.

 1978-ൽ ഞാൻ ഓസ്‌​ട്രേ​ലി​യ​യി​ലേക്കു താമസം മാറി. സമാധാ​ന​വും സമ്പദ്‌സ​മൃ​ദ്ധി​യും നിറഞ്ഞ ആ രാജ്യ​ത്തു​പോ​ലും എനിക്ക്‌ മനസ്സമാ​ധാ​നം കിട്ടി​യില്ല. എ​ന്റെ​ മയക്കു​മ​രു​ന്നു​ശീ​ല​വും മദ്യപാ​ന​വും ഞാൻ തുടർന്നു. ആ വർഷം​തന്നെ യഹോ​വ​യു​ടെ സാക്ഷികൾ എന്നെ സന്ദർശി​ച്ചു. സമാധാ​നം നിറഞ്ഞ ഭൂമി​യെ​ക്കു​റിച്ച്‌ അവർ ബൈബി​ളിൽനിന്ന്‌ കാണി​ച്ചത്‌ എനിക്ക്‌ ഇഷ്ടമായി. എങ്കിലും അവരെ അത്ര പരിച​യ​മി​ല്ലാ​ത്ത​തു​കൊണ്ട്‌ ചെറി​യൊ​രു പേടി​യു​മു​ണ്ടാ​യി​രു​ന്നു.

 അധികം താമസി​ക്കാ​തെ ഞാൻ ഏതാനും ആഴ്‌ച​ത്തേക്കു ഫിലിപ്പീൻസിലേക്കു പോയി. പിതാവ്‌ നല്ലൊരു വ്യക്തി​യാ​കാൻ കഠിന​മാ​യി പ്രയ്‌ത​നി​ക്കു​ന്നു​ണ്ടെന്ന്‌ കൂടപ്പി​റ​പ്പു​കൾ എന്നോടു പറഞ്ഞു. പക്ഷേ അപ്പോ​ഴും എനിക്ക്‌ എ​ന്റെ​ പിതാ​വി​നോട്‌ ഉള്ളിൽ ദേഷ്യ​മാ​യി​രു​ന്നു. അദ്ദേഹ​വു​മാ​യി ഒരു ബന്ധത്തി​നും ഞാൻ ആഗ്രഹി​ച്ചില്ല.

 ജീവി​ത​ത്തിൽ ഇത്രയ​ധി​കം കഷ്ടപ്പാ​ടും അനീതി​യും ഉള്ളതി​ന്റെ​ കാരണ​ത്തെ​ക്കു​റിച്ച്‌ എ​ന്റെ​ അനിയത്തി ബൈബി​ളിൽനിന്ന്‌ എനിക്കു കാണി​ച്ചു​തന്നു. ജീവി​താ​നു​ഭവം കുറവുള്ള കൗമാ​ര​ക്കാ​രി​യായ പെങ്ങൾ എ​ന്റെ​ ചോദ്യ​ങ്ങൾക്കുള്ള ഉത്തരം തന്നപ്പോൾ ഞാൻ അമ്പരന്നു​പോ​യി. ഞാൻ പോരു​ന്ന​തി​നു മുമ്പ്‌ പിതാവ്‌ എനിക്കു നിങ്ങൾക്കു ഭൂമി​യി​ലെ പറുദീസയിൽ എന്നേക്കും ജീവിക്കാൻ കഴിയും a എന്ന പുസ്‌തകം തന്നു. “മറ്റൊന്നി​ന്റെ​യും പുറകെ പോകേണ്ട. നീ അന്വേ​ഷി​ക്കു​ന്നത്‌ കണ്ടെത്താൻ ഈ പുസ്‌തകം നിന്നെ സഹായി​ക്കും” എന്ന്‌ അദ്ദേഹം പറഞ്ഞു. ഓസ്‌​ട്രേ​ലി​യ​യിൽ ചെല്ലു​മ്പോൾ യഹോ​വ​യു​ടെ സാക്ഷി​കളെ കണ്ടുപി​ടി​ക്കാൻ അദ്ദേഹം എന്നെ പ്രോ​ത്സാ​ഹി​പ്പി​ച്ചു.

 ഞാൻ ബ്രിസ്‌ബേ​നി​ലെ എ​ന്റെ​ വീട്ടി​ലെ​ത്തി​യ​പ്പോൾ പിതാവ്‌ പറഞ്ഞതു​പോ​ലെ​തന്നെ യഹോ​വ​യു​ടെ സാക്ഷി​ക​ളു​ടെ രാജ്യ​ഹാൾ കണ്ടുപി​ടി​ച്ചു. ക്രമമാ​യി ബൈബിൾ പഠിക്കാൻ തുടങ്ങി. അഴിമ​തി​യി​ല്ലാത്ത ഒരു ഗവൺമെൻറ്‌ ഭാവി​യിൽ നമ്മളെ ഭരിക്കും എന്ന കാര്യം ദാനിയേൽ ഏഴും യശയ്യ ഒമ്പതും അധ്യാ​യ​ങ്ങ​ളി​ലേതുപോലുള്ള പ്രവച​ന​ങ്ങ​ളിൽനിന്ന്‌ ഞാൻ മനസ്സി​ലാ​ക്കി. പറുദീ​സാ​ഭൂ​മി​യി​ലെ ജീവി​ത​ത്തെ​ക്കു​റിച്ച്‌ ഞാൻ പഠിച്ചു. ദൈവ​ത്തിന്‌ ഇഷ്ടമുള്ള ഒരു ജീവിതം നയിക്കാൻ ഞാൻ ആഗ്രഹി​ച്ചു. പക്ഷേ അതിന്‌ ഞാൻ എ​ന്റെ​ വികാ​രങ്ങൾ നിയ​ന്ത്രി​ക്ക​ണ​മാ​യി​രു​ന്നു. മദ്യവും മയക്കു​മ​രുന്ന്‌ ഉപയോ​ഗ​വും കുത്തഴിഞ്ഞ ജീവി​ത​രീ​തി​യും ഒക്കെ ഉപേക്ഷി​ക്കു​ക​യും വേണമാ​യി​രു​ന്നു. എ​ന്റെ​ കൂടെ ജീവി​ച്ചി​രുന്ന പെൺകു​ട്ടി​യു​മാ​യുള്ള ബന്ധം ഞാൻ ഉപേക്ഷി​ച്ചു. കൂടാതെ എ​ന്റെ​ ദുശ്ശീ​ല​ങ്ങ​ളും ഞാൻ നിറുത്തി. യഹോ​വ​യി​ലുള്ള എ​ന്റെ​ ആശ്രയം വർധി​ച്ച​പ്പോൾ മറ്റു മാറ്റങ്ങൾ വരുത്താ​നുള്ള സഹായ​ത്തി​നാ​യി ഞാൻ പ്രാർഥി​ച്ചു.

 ഞാൻ പഠിക്കുന്ന കാര്യ​ങ്ങൾക്ക്‌ ഒരാളെ മാറ്റാൻ കഴിയു​മെന്ന്‌ പതി​യെ​പ്പ​തി​യെ എനിക്കു മനസ്സി​ലാ​യി. ശ്രമം ചെയ്‌താൽ ഒരാൾക്കു “പുതിയ വ്യക്തി​ത്വം” ധരിക്കാം എന്നു ബൈബിൾ പറയു​ന്നുണ്ട്‌. (കൊ​ലോ​സ്യർ 3:9, 10) ഞാൻ അതിനു ശ്രമി​ച്ച​പ്പോൾ എനിക്ക്‌ ഒരു കാര്യം മനസ്സി​ലാ​യി; പിതാവ്‌ ആളാകെ മാറി​യെന്ന്‌ പറഞ്ഞു​കേ​ട്ടത്‌ ശരിയാ​യി​രി​ക്കു​മെന്ന്‌. ദേഷ്യ​വും വെറു​പ്പും കളഞ്ഞ്‌ പിതാ​വു​മാ​യി സമാധാ​ന​ത്തി​ലാ​കാൻ ഞാൻ ആഗ്രഹി​ച്ചു. ഒടുവിൽ കുട്ടി​ക്കാ​ലം​മു​തൽ മനസ്സിൽ കൊണ്ടു​നടന്ന പക ഉപേക്ഷിച്ച്‌ പിതാ​വി​നോ​ടു ക്ഷമിക്കാൻ ഞാൻ തയ്യാറാ​യി.

 ചെറു​പ്പ​ക്കാ​ര​നാ​യ ഞാൻ മറ്റുള്ള​വ​രു​ടെ മോശ​മായ ശീലങ്ങ​ളും പെരു​മാ​റ്റ​ങ്ങ​ളും മിക്ക​പ്പോ​ഴും അനുക​രി​ച്ചി​രു​ന്നു. ബൈബിളി​ന്റെ​ മുന്നറി​യിപ്പ്‌ എ​ന്റെ​ കാര്യ​ത്തിൽ സത്യമാ​യി; ചീത്ത കൂട്ടു​കെട്ട്‌ എന്നെ വഴി​തെ​റ്റി​ച്ചു. (1 കൊരി​ന്ത്യർ 15:33) പക്ഷേ യഹോ​വ​യു​ടെ സാക്ഷി​ക​ളിൽനിന്ന്‌ എനിക്കു വിശ്വ​സി​ക്കാൻ കൊള്ളാ​വുന്ന കൂട്ടു​കാ​രെ കിട്ടി. നല്ലൊരു വ്യക്തി​യാ​കാൻ അവർ എന്നെ സഹായി​ച്ചു. അവരുടെ ഇടയിൽനി​ന്നാണ്‌ ഞാൻ എ​ന്റെ​ ജീവി​ത​സ​ഖി​യാ​യി ലോ​റേ​റ്റയെ സ്വന്തമാ​ക്കി​യത്‌. ഞങ്ങൾ ഒരുമിച്ച്‌, ആളുകളെ സഹായി​ക്കാൻ ബൈബി​ളിന്‌ എങ്ങനെ കഴിയു​മെന്നു പഠിപ്പി​ക്കു​ന്നു.

 എ​ന്റെ​ പിതാ​വിന്‌ ഒരിക്ക​ലും ആയിത്തീ​രാൻ പറ്റി​ല്ലെന്നു ഞാൻ വിചാ​രിച്ച നിലയി​ലേക്ക്‌ അദ്ദേഹ​ത്തി​നു വരാനാ​യി—സ്‌നേ​ഹ​മുള്ള ഭർത്താവ്‌, താഴ്‌മ​യുള്ള, സമാധാ​ന​പ്രി​യ​നായ ഒരു ക്രിസ്‌ത്യാ​നി. ബൈബി​ളി​നു നന്ദി. 1987-ൽ ഞാൻ ഒരു യഹോ​വ​യു​ടെ സാക്ഷി​യാ​യി സ്‌നാ​ന​മേ​റ്റ​ശേഷം കണ്ടപ്പോൾ ജീവി​ത​ത്തിൽ ആദ്യമാ​യി എ​ന്റെ​ പിതാവ്‌ എന്നെ കെട്ടി​പ്പി​ടി​ച്ചു!

 35 വർഷത്തി​ല​ധി​കം പിതാവ്‌ അമ്മയോ​ടൊ​പ്പം ബൈബിൾ നൽകുന്ന പ്രത്യാശ മറ്റുള്ള​വ​രു​മാ​യി പങ്കു​വെച്ചു. അദ്ദേഹം മറ്റുള്ള​വരെ സഹായി​ക്കു​ന്ന​തി​നു പേരു​കേട്ട വ്യക്തി​യാ​യി മാറി. മാത്രമല്ല അദ്ദേഹം നല്ല കഠിനാ​ധ്വാ​നി​യും കരുത​ലു​ള്ള​യാ​ളും ആയിരു​ന്നു. ആ വർഷങ്ങ​ളിൽ ഞാൻ അദ്ദേഹത്തെ ആദരി​ക്കാ​നും സ്‌നേ​ഹി​ക്കാ​നും പഠിച്ചു. അദ്ദേഹത്തി​ന്റെ​ മകൻ എന്ന്‌ അറിയ​പ്പെ​ടു​ന്ന​തിൽ എനിക്ക്‌ അഭിമാ​നം തോന്നി! 2016-ൽ അദ്ദേഹം മരണമ​ടഞ്ഞു. സ്‌നേ​ഹ​ത്തോ​ടെ​യാണ്‌ ഞാൻ ഇന്ന്‌ അദ്ദേഹത്തെ ഓർക്കു​ന്നത്‌. ബൈബി​ളിൽനിന്ന്‌ പഠിച്ച കാര്യങ്ങൾ ബാധക​മാ​ക്കി​യ​പ്പോൾ ഞങ്ങൾക്കു രണ്ടു പേർക്കും വലിയ മാറ്റങ്ങൾ വരുത്താൻ കഴിഞ്ഞു. പഴയ പകയുടെ ഒരു കണിക​പോ​ലും ഇന്ന്‌ എന്നിലില്ല. എല്ലാ കുടും​ബ​ങ്ങ​ളി​ലെ​യും പ്രശ്‌ന​ങ്ങൾക്കുള്ള കാരണങ്ങൾ ഇല്ലാതാ​ക്കു​മെന്ന്‌ ഉറപ്പു​ത​ന്നി​രി​ക്കുന്ന സ്വർഗീ​യ​പി​താ​വും ദൈവ​വു​മായ യഹോ​വയെ കണ്ടെത്താൻ കഴിഞ്ഞ​തിൽ എനിക്കു വളരെ നന്ദിയുണ്ട്‌.