1-2. ഇസ്രാ​യേ​ലി​ലെ ചില രാജാ​ക്ക​ന്മാ​രെ​ക്കു​റിച്ച്‌ ബൈബിൾ എന്താണ്‌ പറയു​ന്നത്‌?

 ഇസ്രാ​യേ​ലി​നെ ഭരിച്ച 40-ലധികം രാജാ​ക്ക​ന്മാ​രു​ടെ പേരുകൾ ബൈബി​ളിൽ കാണാം. a അവരെ​ക്കു​റി​ച്ചുള്ള വിവര​ണ​ങ്ങ​ളിൽ നമുക്കു താത്‌പ​ര്യം തോന്നുന്ന പല വിവര​ങ്ങ​ളും പറയു​ന്നുണ്ട്‌. ഉദാഹ​ര​ണ​ത്തിന്‌, നല്ല രാജാ​ക്ക​ന്മാർപോ​ലും ചില മോശം കാര്യങ്ങൾ ചെയ്‌ത​തി​നെ​ക്കു​റിച്ച്‌ ബൈബി​ളിൽ പറയുന്നു. അങ്ങനെ ഒരാളാ​യി​രു​ന്നു ദാവീദ്‌ രാജാവ്‌. യഹോവ അദ്ദേഹ​ത്തെ​ക്കു​റിച്ച്‌ ഇങ്ങനെ പറഞ്ഞു: ‘എന്റെ ദാസനായ ദാവീദ്‌ എന്റെ മുന്നിൽ ശരിയാ​യതു മാത്രം പ്രവർത്തി​ച്ചു​കൊണ്ട്‌ മുഴു​ഹൃ​ദ​യ​ത്തോ​ടെ എന്നെ അനുഗ​മി​ച്ചു.’ (1 രാജാ. 14:8) എന്നാൽ വിവാഹം കഴിച്ച ഒരു സ്‌ത്രീ​യു​മാ​യി അദ്ദേഹം ലൈം​ഗിക അധാർമി​ക​ത​യിൽ ഏർപ്പെ​ടു​ക​യും അവളുടെ ഭർത്താ​വി​നെ യുദ്ധത്തിൽ കൊല്ലാൻ ഗൂഢാ​ലോ​ചന നടത്തു​ക​യും ചെയ്‌തി​ട്ടുണ്ട്‌.—2 ശമു. 11:4, 14, 15.

² ഇനി, അവിശ്വ​സ്‌ത​രായ പല രാജാ​ക്ക​ന്മാ​രും നല്ല കാര്യ​ങ്ങ​ളും ചെയ്‌തി​ട്ടുണ്ട്‌. രഹബെ​യാ​മി​നെ​ക്കു​റിച്ച്‌ ചിന്തി​ക്കുക. യഹോ​വ​യു​ടെ കണ്ണിൽ അദ്ദേഹം “മോശ​മായ കാര്യങ്ങൾ ചെയ്‌തു.” (2 ദിന. 12:14) പക്ഷേ, ഇസ്രാ​യേ​ലി​ലെ പത്തു ഗോ​ത്ര​ങ്ങൾക്ക്‌ എതിരെ യുദ്ധം ചെയ്യരു​തെ​ന്നും അവർ മറ്റൊരു രാജാ​വി​നെ തിര​ഞ്ഞെ​ടു​ക്ക​ട്ടെ​യെ​ന്നും യഹോവ പറഞ്ഞ​പ്പോൾ അദ്ദേഹം അത്‌ അനുസ​രി​ച്ചു. കൂടാതെ അദ്ദേഹം ദൈവ​ജ​നത്തെ സംരക്ഷി​ക്കാ​നാ​യി കോട്ട​മ​തി​ലു​കൾ കെട്ടി നഗരങ്ങൾ ബലപ്പെ​ടു​ത്തി.—1 രാജാ. 12:21-24; 2 ദിന. 11:5-12.

3. ഏതു പ്രധാ​ന​പ്പെട്ട ചോദ്യം നമ്മുടെ മനസ്സി​ലേക്കു വന്നേക്കാം, ഈ ലേഖന​ത്തിൽ നമ്മൾ എന്തു ചർച്ച ചെയ്യും?

³ ഇതു നമ്മുടെ മനസ്സി​ലേക്കു പ്രധാ​ന​പ്പെട്ട ഒരു ചോദ്യം കൊണ്ടു​വ​ന്നേ​ക്കാം. ഇസ്രാ​യേൽ രാജാ​ക്ക​ന്മാർ നല്ലതും മോശ​വും ആയ കാര്യങ്ങൾ ചെയ്‌തു. അപ്പോൾപ്പി​ന്നെ എന്തിന്റെ അടിസ്ഥാ​ന​ത്തി​ലാണ്‌ യഹോവ അവരെ വിശ്വ​സ്‌ത​രാ​ണോ അല്ലയോ എന്നു വിലയി​രു​ത്തി​യത്‌? ഈ  ചോദ്യ​ത്തി​ന്റെ ഉത്തരം കണ്ടെത്തു​ന്നത്‌, യഹോവ നമ്മളിൽനിന്ന്‌ എന്താണു പ്രതീ​ക്ഷി​ക്കു​ന്ന​തെന്നു മനസ്സി​ലാ​ക്കാൻ നമ്മളെ സഹായി​ക്കും. ഇസ്രാ​യേൽ രാജാ​ക്ക​ന്മാ​രെ വിലയി​രു​ത്തി​യ​പ്പോൾ യഹോവ കണക്കി​ലെ​ടു​ത്തി​രി​ക്കാ​വുന്ന മൂന്നു കാര്യ​ങ്ങ​ളെ​ക്കു​റിച്ച്‌ നമുക്കു നോക്കാം. അവരുടെ ഹൃദയ​നില, അവരുടെ പശ്ചാത്താ​പം, അവർ സത്യാ​രാ​ധ​ന​യോ​ടു പറ്റിനി​ന്നോ ഇല്ലയോ എന്നത്‌.

അവർ പൂർണ​ഹൃ​ദ​യ​ത്തോ​ടെ യഹോ​വയെ സ്‌നേ​ഹി​ച്ചു

4. വിശ്വ​സ്‌ത​രായ രാജാ​ക്ക​ന്മാ​രും അവിശ്വ​സ്‌ത​രായ രാജാ​ക്ക​ന്മാ​രും തമ്മിലുള്ള ഒരു വ്യത്യാ​സം എന്തായി​രു​ന്നു?

⁴ യഹോ​വയെ സന്തോ​ഷി​പ്പിച്ച രാജാ​ക്ക​ന്മാർ യഹോ​വയെ പൂർണഹൃദയത്തോടെ b ആരാധി​ച്ച​വ​രാ​യി​രു​ന്നു. ഉദാഹ​ര​ണ​ത്തിന്‌, നല്ല രാജാ​വായ യഹോ​ശാ​ഫാത്ത്‌ ‘പൂർണ​ഹൃ​ദ​യ​ത്തോ​ടെ യഹോ​വയെ അന്വേ​ഷി​ച്ചു.’ (2 ദിന. 22:9) യോശി​യ​യെ​ക്കു​റിച്ച്‌ ബൈബിൾ പറയു​ന്നത്‌, ‘അദ്ദേഹ​ത്തെ​പ്പോ​ലെ പൂർണ​ഹൃ​ദ​യ​ത്തോ​ടെ യഹോ​വ​യി​ലേക്കു മടങ്ങിവന്ന ഒരു രാജാവ്‌ അദ്ദേഹ​ത്തി​നു മുമ്പോ ശേഷമോ ഉണ്ടായി​ട്ടില്ല’ എന്നാണ്‌. (2 രാജാ. 23:25) ഇനി, പിന്നീട്‌ തെറ്റുകൾ ചെയ്‌ത ശലോ​മോ​ന്റെ കാര്യ​മോ? “അദ്ദേഹ​ത്തി​ന്റെ ഹൃദയം . . . തന്റെ ദൈവ​മായ യഹോ​വ​യിൽ പൂർണ​മാ​യി​രു​ന്നില്ല.” (1 രാജാ. 11:4) അവിശ്വ​സ്‌ത​നായ മറ്റൊരു രാജാ​വാ​യി​രു​ന്നു അബീയാം. അദ്ദേഹ​ത്തെ​ക്കു​റി​ച്ചും ബൈബിൾ ഇങ്ങനെ പറയുന്നു: “അയാളു​ടെ ഹൃദയം . . . യഹോ​വ​യിൽ പൂർണ​മാ​യി​രു​ന്നില്ല.”—1 രാജാ. 15:3.

5. പൂർണ​ഹൃ​ദ​യ​ത്തോ​ടെ യഹോ​വയെ സേവി​ക്കുക എന്നതിന്റെ അർഥം എന്താ​ണെന്നു വിശദീ​ക​രി​ക്കുക.

⁵ അപ്പോൾ പൂർണ​ഹൃ​ദ​യ​ത്തോ​ടെ യഹോ​വയെ സേവി​ക്കുക എന്നതിന്റെ അർഥം എന്താണ്‌? പൂർണ​ഹൃ​ദ​യ​ത്തോ​ടെ ദൈവത്തെ സേവി​ക്കുന്ന ഒരാൾ, ദൈവത്തെ ആരാധി​ക്കു​ന്നതു വെറുതെ ഒരു കടമ​പോ​ലെ ആയിരി​ക്കില്ല. പകരം, അദ്ദേഹം അതു ചെയ്യു​ന്നതു ദൈവ​ത്തോ​ടുള്ള ഭക്തിയും സ്‌നേ​ഹ​വും കാരണ​മാ​യി​രി​ക്കും. അതു​പോ​ലെ അദ്ദേഹം തന്റെ ജീവി​ത​ത്തി​ലു​ട​നീ​ളം ആ സ്‌നേ​ഹ​വും ഭക്തിയും കാത്തു​സൂ​ക്ഷി​ക്കു​ക​യും ചെയ്യും.

6. നമുക്ക്‌ എങ്ങനെ പൂർണ​ഹൃ​ദ​യ​ത്തോ​ടെ യഹോ​വയെ സ്‌നേ​ഹി​ക്കു​ന്ന​തിൽ തുടരാം? (സുഭാ​ഷി​തങ്ങൾ 4:23; മത്തായി 5:29, 30)

⁶ നമുക്ക്‌ എങ്ങനെ വിശ്വ​സ്‌ത​രായ രാജാ​ക്ക​ന്മാ​രെ അനുക​രി​ച്ചു​കൊണ്ട്‌ പൂർണ​ഹൃ​ദ​യ​ത്തോ​ടെ യഹോ​വയെ സ്‌നേ​ഹി​ക്കു​ന്ന​തിൽ തുടരാം? മോശ​മായ സ്വാധീ​നങ്ങൾ ഒഴിവാ​ക്കി​ക്കൊണ്ട്‌. ഉദാഹ​ര​ണ​ത്തിന്‌, ഒഴിവു​സ​മ​യ​ങ്ങ​ളിൽ എന്തു കാണുന്നു, എന്തു ചെയ്യുന്നു എന്നതി​നൊ​ക്കെ നമ്മൾ ശ്രദ്ധ കൊടു​ക്കണം. കാരണം, അതിനു നമ്മുടെ ഹൃദയത്തെ വിഭജി​ത​മാ​ക്കാൻ കഴിയും. മോശ​മായ സഹവാ​സ​ത്തി​ന്റെ കാര്യ​വും അങ്ങനെ​ത​ന്നെ​യാണ്‌; പണമാണു ജീവി​ത​ത്തിൽ ഏറ്റവും വലു​തെന്നു ചിന്തി​ക്കാൻ അത്‌ ഇടയാ​ക്കും. ഇതു​പോ​ലെ എന്തെങ്കി​ലും ഒരു കാര്യം യഹോ​വ​യോ​ടുള്ള നമ്മുടെ സ്‌നേഹം കുറയാൻ ഇടയാ​ക്കു​ന്നു​ണ്ടെ​ങ്കിൽ പെട്ടെ​ന്നു​തന്നെ വേണ്ട മാറ്റങ്ങൾ വരുത്തുക.—സുഭാ​ഷി​തങ്ങൾ 4:23; മത്തായി 5:29, 30 വായി​ക്കുക.

7. മോശം സ്വാധീ​നങ്ങൾ നമ്മൾ ഒഴിവാ​ക്കു​ന്നതു പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌?

⁷ നമ്മുടെ ഹൃദയം വിഭജി​ത​മാ​ക്കാൻ, അതായത്‌ പൂർണ​ഹൃ​ദ​യ​ത്തോ​ടെ യഹോ​വയെ സേവി​ക്കു​ന്ന​തിൽനിന്ന്‌ നമ്മളെ തടയാൻ, ഒന്നി​നെ​യും അനുവ​ദി​ക്ക​രുത്‌. ദൈവ​സേ​വ​ന​ത്തിൽ തിര​ക്കോ​ടെ ഏർപ്പെ​ടു​ന്ന​തു​കൊണ്ട്‌ മോശം സ്വാധീ​ന​ങ്ങ​ളൊ​ന്നും നമു​ക്കൊ​രു പ്രശ്‌ന​മാ​കി​ല്ലെന്നു ചില​പ്പോൾ നമ്മൾ ചിന്തി​ച്ചു​പോ​യേ​ക്കാം. ഒരു ഉദാഹ​രണം നോക്കാം. നല്ല വെയി​ലുള്ള ദിവസം നിങ്ങൾ പുറത്തു​പോ​യിട്ട്‌ തിരിച്ച്‌ വീട്ടിൽ എത്തി. വന്ന ഉടനെ നിങ്ങൾ മുറി​യിൽ എ.സി. ഓണാക്കി. പക്ഷേ വാതിൽ തുറന്നി​ട്ടി​രി​ക്കു​ക​യാ​ണെ​ങ്കിൽ എന്തെങ്കി​ലും പ്രയോ​ജ​ന​മു​ണ്ടോ? പുറത്തെ ചൂട്‌ അകത്തേക്കു കയറു​ന്ന​തു​കൊണ്ട്‌ മുറി ഒരിക്ക​ലും തണുക്കില്ല. എന്താണ്‌ പാഠം? യഹോ​വ​യു​മാ​യുള്ള നമ്മുടെ ബന്ധം ശക്തമാക്കി നിറു​ത്തു​ന്ന​തിന്‌ ആത്മീയ​കാ​ര്യ​ങ്ങൾ ചെയ്‌താൽ മാത്രം പോരാ. ഒപ്പം നമ്മളെ മോശ​മാ​യി സ്വാധീ​നി​ച്ചേ​ക്കാ​വുന്ന കാര്യ​ങ്ങൾക്കു നേരെ നമ്മുടെ ഹൃദയ​ത്തി​ന്റെ വാതിൽ അടയ്‌ക്കു​ക​യും വേണം. അങ്ങനെ​യാ​കു​മ്പോൾ ഈ ലോക​ത്തി​ലെ ചൂടു “വായു,” അതായത്‌ ദൈവ​ത്തി​ന്റെ നിലവാ​ര​ങ്ങ​ളു​മാ​യി ചേരാത്ത മനോ​ഭാ​വം നമ്മുടെ ഹൃദയ​ത്തി​ലേക്കു കടന്ന്‌ അതിനെ വിഭജി​ത​മാ​ക്കില്ല.—എഫെ. 2:2.

അവർ പശ്ചാത്ത​പി​ച്ചു

8-9. രാജാ​ക്ക​ന്മാ​രായ ദാവീ​ദും ഹിസ്‌കി​യ​യും തിരുത്തൽ കിട്ടി​യ​പ്പോൾ എങ്ങനെ​യാ​ണു പ്രതി​ക​രി​ച്ചത്‌? (പുറം​താ​ളി​ലെ ചിത്രം കാണുക.)

⁸ നമ്മൾ നേരത്തെ കണ്ടതു​പോ​ലെ ദാവീദ്‌  ഗുരു​ത​ര​മായ ഒരു തെറ്റു ചെയ്‌തു. എന്നാൽ, നാഥാൻ പ്രവാ​ചകൻ ആ തെറ്റു തിരു​ത്തി​യ​പ്പോൾ അദ്ദേഹം താഴ്‌മ​യോ​ടെ പശ്ചാത്ത​പി​ച്ചു. ദാവീദ്‌ വെറുതെ നാഥാനെ കാണി​ക്കാ​നോ ശിക്ഷ ഒഴിവാ​ക്കാ​നോ വേണ്ടി പശ്ചാത്താ​പം അഭിന​യി​ക്കു​ക​യാ​യി​രു​ന്നില്ല. പകരം, ദാവീദ്‌ ആത്മാർഥ​മാ​യി പശ്ചാത്ത​പി​ച്ചു. 51-ാം സങ്കീർത്ത​ന​ത്തി​ലെ ദാവീ​ദി​ന്റെ വാക്കു​ക​ളിൽനിന്ന്‌, താൻ ചെയ്‌ത കാര്യ​ത്തെ​ക്കു​റിച്ച്‌ അദ്ദേഹ​ത്തിന്‌ എത്ര​ത്തോ​ളം വിഷമം തോന്നി​യെന്നു നമുക്കു മനസ്സി​ലാ​കും.—സങ്കീ. 51:3, 4, 17, മേലെ​ഴുത്ത്‌.

⁹ ഹിസ്‌കിയ രാജാ​വും യഹോ​വ​യ്‌ക്കെ​തി​രെ പാപം ചെയ്‌തു. ബൈബിൾ ഇങ്ങനെ പറയുന്നു: “ഹിസ്‌കി​യ​യു​ടെ ഹൃദയം അഹങ്കരി​ച്ചു; . . . അങ്ങനെ തന്റെത​ന്നെ​യും യഹൂദ​യു​ടെ​യും യരുശ​ലേ​മി​ന്റെ​യും മേൽ ഹിസ്‌കിയ ദൈവ​കോ​പം വിളി​ച്ചു​വ​രു​ത്തി.” (2 ദിന. 32:25) എന്തു​കൊ​ണ്ടാണ്‌ ഹിസ്‌കിയ അഹങ്കരി​ച്ചത്‌? അദ്ദേഹ​ത്തി​ന്റെ സമ്പത്തോ, അസീറി​യ​ക്കാർക്ക്‌ എതിരെ നേടിയ വിജയ​മോ, അത്ഭുത​ക​ര​മാ​യി രോഗം മാറി​യ​തോ ഒക്കെയാ​യി​രി​ക്കാം ചില​പ്പോൾ അതിന്റെ കാരണം. ബാബി​ലോൺകാ​രെ തന്റെ സമ്പത്തു മുഴുവൻ കാണി​ക്കാൻ അദ്ദേഹത്തെ പ്രേരി​പ്പി​ച്ചത്‌ ആ അഹങ്കാ​ര​മാ​യി​രി​ക്കാം. എന്താ​ണെ​ങ്കി​ലും രാജാ​വി​ന്റെ ആ പ്രവൃത്തി യഹോ​വ​യ്‌ക്ക്‌ ഇഷ്ടമാ​യി​ല്ലെന്ന്‌ യശയ്യ പ്രവാ​ചകൻ അദ്ദേഹ​ത്തോ​ടു പറഞ്ഞു. (2 രാജാ. 20:12-18) അപ്പോൾ ദാവീ​ദി​നെ​പ്പോ​ലെ ഹിസ്‌കി​യ​യും താഴ്‌മ​യോ​ടെ പശ്ചാത്ത​പി​ച്ചു. (2 ദിന. 32:26) അതു​കൊ​ണ്ടാണ്‌ ഒടുവിൽ യഹോവ അദ്ദേഹത്തെ ‘ശരിയാ​യതു ചെയ്‌ത,’ വിശ്വ​സ്‌ത​നായ ഒരു രാജാ​വാ​യി കണ്ടത്‌.—2 രാജാ. 18:3.

10. തിരുത്തൽ കിട്ടി​യ​പ്പോൾ രാജാ​വായ അമസ്യ എങ്ങനെ പ്രതി​ക​രി​ച്ചു?

¹⁰ എന്നാൽ യഹൂദ​യു​ടെ രാജാ​വായ അമസ്യ ശരിയാ​യതു ചെയ്‌തെ​ങ്കി​ലും “അതു പൂർണ​ഹൃ​ദ​യ​ത്തോ​ടെ​യാ​യി​രു​ന്നില്ല.” (2 ദിന. 25:2) എന്താണ്‌ അദ്ദേഹ​ത്തി​നു പറ്റിയ തെറ്റ്‌? ഏദോ​മ്യ​രെ തോൽപ്പി​ക്കാൻ യഹോവ അദ്ദേഹത്തെ സഹായി​ച്ചു. എന്നാൽ അതിനു ശേഷം അദ്ദേഹം അവരുടെ ദൈവ​ങ്ങളെ കുമ്പി​ടാൻതു​ടങ്ങി. c യഹോ​വ​യു​ടെ പ്രവാ​ചകൻ അദ്ദേഹത്തെ തിരു​ത്താൻ ശ്രമി​ച്ച​പ്പോൾ, അദ്ദേഹം ദേഷ്യ​ത്തോ​ടെ പ്രവാ​ച​കനെ പറഞ്ഞു​വി​ട്ടു.—2 ദിന. 25:14-16.

11. 2 കൊരി​ന്ത്യർ 7:9, 11 അനുസ​രിച്ച്‌ ക്ഷമ ലഭിക്കാൻ നമ്മൾ എന്തു ചെയ്യണം? (ചിത്ര​ങ്ങ​ളും കാണുക.)

¹¹ ഈ രാജാ​ക്ക​ന്മാ​രിൽനി​ന്നെ​ല്ലാം നമുക്ക്‌ എന്തു പഠിക്കാം? തെറ്റു പറ്റു​മ്പോൾ പശ്ചാത്ത​പി​ക്കു​ക​യും അത്‌ ആവർത്തി​ക്കാ​തി​രി​ക്കാൻ പരമാ​വധി ശ്രമി​ക്കു​ക​യും വേണം. പക്ഷേ, വളരെ നിസ്സാ​ര​മെന്നു നമുക്കു തോന്നുന്ന ഒരു കാര്യ​ത്തി​നു സഭയിലെ മൂപ്പന്മാ​രിൽനിന്ന്‌ തിരുത്തൽ കിട്ടു​ന്നെ​ങ്കി​ലോ, അപ്പോൾ നമ്മൾ എങ്ങനെ പ്രതി​ക​രി​ക്കണം? യഹോവ നമ്മളെ സ്‌നേ​ഹി​ക്കു​ന്നി​ല്ലെ​ന്നോ മൂപ്പന്മാർ നമുക്ക്‌ എതിരാ​ണെ​ന്നോ ഒരിക്ക​ലും ചിന്തി​ക്ക​രുത്‌. ഇസ്രാ​യേ​ലി​ലെ നല്ല രാജാ​ക്ക​ന്മാർക്കു​പോ​ലും തിരു​ത്ത​ലും ഉപദേ​ശ​വും ഒക്കെ ആവശ്യ​മാ​യി​രു​ന്നു. (എബ്രാ. 12:6) അതു​കൊണ്ട്‌ നമുക്ക്‌ ഒരു തിരുത്തൽ കിട്ടു​മ്പോൾ (1) താഴ്‌മ​യോ​ടെ പ്രതി​ക​രി​ക്കുക, (2) വേണ്ട മാറ്റങ്ങൾ വരുത്തുക, (3) മുഴു​ഹൃ​ദ​യ​ത്തോ​ടെ യഹോ​വയെ സേവി​ക്കു​ന്ന​തിൽ തുടരുക. ആത്മാർഥ​മാ​യി പശ്ചാത്ത​പി​ക്കു​ന്നെ​ങ്കിൽ, യഹോവ ഉറപ്പാ​യും നമ്മളോ​ടു ക്ഷമിക്കും.—2 കൊരി​ന്ത്യർ 7:9, 11 വായി​ക്കുക.

അവർ സത്യാ​രാ​ധ​ന​യോ​ടു പറ്റിനി​ന്നു

12. വിശ്വ​സ്‌ത​രായ രാജാ​ക്ക​ന്മാ​രും അവിശ്വ​സ്‌ത​രായ രാജാ​ക്ക​ന്മാ​രും തമ്മിലുള്ള പ്രധാ​ന​വ്യ​ത്യാ​സം എന്താണ്‌?

¹² യഹോവ വിശ്വ​സ്‌ത​രാ​യി കണ്ട രാജാ​ക്ക​ന്മാർ സത്യാ​രാ​ധ​ന​യോ​ടു പറ്റിനി​ന്ന​വ​രാ​യി​രു​ന്നു. അങ്ങനെ ചെയ്യാൻ അവർ ജനത്തെ പ്രോ​ത്സാ​ഹി​പ്പി​ക്കു​ക​യും ചെയ്‌തു. നമ്മൾ കണ്ടതു​പോ​ലെ അവർക്കു പല തെറ്റു​ക​ളും പറ്റിയി​ട്ടുണ്ട്‌ എന്നതു ശരിയാണ്‌. പക്ഷേ അവർ യഹോ​വയെ മാത്ര​മാണ്‌ ആരാധി​ച്ചത്‌. അതു​പോ​ലെ ദേശത്തു​നിന്ന്‌ വിഗ്ര​ഹാ​രാ​ധന നീക്കം ചെയ്യാൻ കഠിന​മാ​യി ശ്രമി​ക്കു​ക​യും ചെയ്‌തി​രു​ന്നു. d

13. യഹോവ ആഹാബ്‌ രാജാ​വി​നെ അവിശ്വ​സ്‌ത​നാ​യി കണക്കാ​ക്കി​യത്‌ എന്തു​കൊണ്ട്‌?

¹³ യഹോവ അവിശ്വ​സ്‌ത​രാ​യി കണ്ട രാജാ​ക്ക​ന്മാ​രു​ടെ കാര്യ​മോ? അവർ ചെയ്‌ത എല്ലാം മോശം കാര്യ​ങ്ങ​ളാ​യി​രു​ന്നില്ല. ഉദാഹ​ര​ണ​ത്തിന്‌, ദുഷ്ട രാജാ​വാ​യി​രുന്ന ആഹാബു​പോ​ലും നാബോ​ത്തി​നെ കൊന്ന കാര്യ​ത്തിൽ കുറ​ച്ചൊ​ക്കെ താഴ്‌മ​യും കുറ്റ​ബോ​ധ​വും കാണിച്ചു. (1 രാജാ. 21:27-29) കൂടാതെ അദ്ദേഹം നഗരങ്ങൾ പണിയു​ക​യും ഇസ്രാ​യേ​ലി​നു​വേണ്ടി പല വിജയങ്ങൾ നേടു​ക​യും ചെയ്‌തു. (1 രാജാ. 20:21, 29; 22:39)  എന്നാൽ അദ്ദേഹം, ഭാര്യ​യു​ടെ മോശ​മായ സ്വാധീ​ന​ത്തി​നു വഴങ്ങി വ്യാജാ​രാ​ധന ദേശ​ത്തെ​ങ്ങും വ്യാപ​ക​മാ​ക്കി. അതു വളരെ വലി​യൊ​രു തെറ്റാ​യി​രു​ന്നു. അദ്ദേഹം ഒരിക്ക​ലും അതെക്കു​റിച്ച്‌ പശ്ചാത്ത​പി​ച്ചു​മില്ല.—1 രാജാ. 21:25, 26.

14. (എ) രഹബെ​യാം രാജാ​വി​നെ യഹോവ അവിശ്വ​സ്‌ത​നാ​യി കണ്ടത്‌ എന്തു​കൊണ്ട്‌? (ബി) അവിശ്വ​സ്‌ത​രായ രാജാ​ക്ക​ന്മാ​രിൽ മിക്കവ​രും എന്തു തെറ്റാണ്‌ ചെയ്‌തത്‌?

¹⁴ അവിശ്വ​സ്‌ത​നായ മറ്റൊരു രാജാ​വാ​യി​രു​ന്നു രഹബെ​യാം. നമ്മൾ നേരത്തേ കണ്ടതു​പോ​ലെ തന്റെ ഭരണകാ​ലത്ത്‌ രഹബെ​യാം ഒരുപാ​ടു നല്ല കാര്യങ്ങൾ ചെയ്‌തു. എന്നാൽ അദ്ദേഹ​ത്തി​ന്റെ രാജത്വം ശക്തമാ​യ​പ്പോൾ യഹോ​വ​യു​ടെ നിയമം ഉപേക്ഷിച്ച്‌ വ്യാജ​ദൈ​വ​ങ്ങൾക്കു പുറകെ പോയി. പിന്നെ​യ​ങ്ങോട്ട്‌ അദ്ദേഹം സത്യാ​രാ​ധ​ന​യിൽ ഉറച്ചു​നി​ന്നില്ല. (2 ദിന. 12:1) യഹോ​വ​യെ​യും വ്യാജ​ദൈ​വ​ങ്ങ​ളെ​യും അദ്ദേഹം മാറി​മാ​റി ആരാധി​ച്ചു​കൊ​ണ്ടി​രു​ന്നു. (1 രാജാ. 14:21-24) സത്യാ​രാ​ധ​ന​യിൽനിന്ന്‌ അകന്നു​പോയ രാജാ​ക്ക​ന്മാർ രഹബെ​യാ​മും ആഹാബും മാത്ര​മാ​യി​രു​ന്നില്ല. അവിശ്വ​സ്‌ത​രായ രാജാ​ക്ക​ന്മാ​രിൽ മിക്കവ​രും ഏതെങ്കി​ലും ഒക്കെ വിധത്തിൽ വ്യാജാ​രാ​ധ​ന​യിൽ ഉൾപ്പെ​ട്ടി​ട്ടുണ്ട്‌. യഹോവ ഒരു രാജാ​വി​നെ നല്ലതാ​ണോ മോശ​മാ​ണോ എന്നു വിലയി​രു​ത്തി​യത്‌ പ്രധാ​ന​മാ​യും അദ്ദേഹം സത്യാ​രാ​ധ​ന​യോ​ടു പറ്റിനി​ന്നോ ഇല്ലയോ എന്നു നോക്കി​യി​ട്ടാണ്‌.

15. സത്യാ​രാ​ധ​ന​യോ​ടു പറ്റിനിൽക്കു​ന്ന​തി​നെ യഹോവ വളരെ പ്രധാ​ന​മാ​യി കാണു​ന്നത്‌ എന്തു​കൊണ്ട്‌?

¹⁵ സത്യാ​രാ​ധ​ന​യോ​ടു പറ്റിനിൽക്കു​ന്ന​തി​നെ യഹോവ ഇത്ര പ്രാധാ​ന്യ​ത്തോ​ടെ കണ്ടത്‌ എന്തു​കൊ​ണ്ടാണ്‌? ഒരു കാരണം യഹോ​വ​യു​ടെ ജനത്തെ സത്യാ​രാ​ധ​ന​യിൽ വഴിന​യി​ക്കാ​നുള്ള ഉത്തരവാ​ദി​ത്വം രാജാ​ക്ക​ന്മാർക്കു​ണ്ടാ​യി​രു​ന്നു. മാത്രമല്ല, വ്യാജാ​രാ​ധന മറ്റു പല ഗുരു​ത​ര​മായ പാപങ്ങൾ ചെയ്യു​ന്ന​തി​ലേ​ക്കും അനീതി കാണി​ക്കു​ന്ന​തി​ലേ​ക്കും ജനത്തെ നയിക്കു​മാ​യി​രു​ന്നു. (ഹോശേ. 4:1, 2) അതുകൂ​ടാ​തെ ഇസ്രാ​യേൽ രാജാ​ക്ക​ന്മാ​രും ജനവും യഹോ​വ​യ്‌ക്കു സമർപ്പി​ത​രാ​യി​രു​ന്നു. അതു​കൊ​ണ്ടാണ്‌ അവർ വ്യാജാ​രാ​ധ​ന​യി​ലേക്കു പോയ​തി​നെ ബൈബിൾ വ്യഭി​ചാ​ര​വു​മാ​യി താരത​മ്യം ചെയ്യു​ന്നത്‌. (യിരെ. 3:8, 9) വ്യഭി​ചാ​രം ചെയ്യുന്ന ഒരു വ്യക്തി തന്റെ ഇണയെ ഏറ്റവും വേദനി​പ്പി​ക്കുന്ന ഒരു തെറ്റാണ്‌ ചെയ്യു​ന്നത്‌.  സമാന​മാ​യി യഹോ​വ​യ്‌ക്കു സമർപ്പി​ത​നായ ഒരാൾ വ്യാജ​ദൈ​വ​ങ്ങളെ ആരാധി​ക്കു​മ്പോൾ അയാൾ യഹോ​വ​യു​ടെ ഹൃദയത്തെ വല്ലാതെ വേദനി​പ്പി​ക്കു​ക​യാണ്‌. e—ആവ. 4:23, 24.

16. യഹോ​വ​യു​ടെ കണ്ണിൽ നീതി​മാ​നെ​യും ദുഷ്ട​നെ​യും തമ്മിൽ പ്രധാ​ന​മാ​യും വേർതി​രി​ക്കു​ന്നത്‌ എന്താണ്‌?

¹⁶ ഇതിൽനിന്ന്‌ നമുക്ക്‌ എന്തു പഠിക്കാം? വ്യാജാ​രാ​ധ​ന​യോ​ടു ബന്ധപ്പെട്ട എല്ലാം ഒഴിവാ​ക്കാൻ നമ്മൾ ഉറച്ച തീരു​മാ​ന​മെ​ടു​ക്കണം. എന്നാൽ അതു മാത്രം പോരാ. നമ്മൾ സത്യാ​രാ​ധ​ന​യോ​ടു പറ്റിനിൽക്കു​ക​യും ദൈവ​സേ​വ​ന​ത്തിൽ തിര​ക്കോ​ടെ ഏർപ്പെ​ടു​ക​യും വേണം. യഹോ​വ​യു​ടെ കണ്ണിൽ നല്ലവരായ ആളുകളെ മോശം ആളുക​ളിൽനിന്ന്‌ വേർതി​രി​ക്കു​ന്നത്‌ എന്താ​ണെന്നു മലാഖി പ്രവാ​ചകൻ വ്യക്തമാ​ക്കി. അദ്ദേഹം എഴുതി: “നീതി​മാ​നും ദുഷ്ടനും തമ്മിലും ദൈവത്തെ സേവി​ക്കു​ന്ന​വ​നും സേവി​ക്കാ​ത്ത​വ​നും തമ്മിലും ഉള്ള വ്യത്യാ​സം നിങ്ങൾ വീണ്ടും കാണും.” (മലാ. 3:18) നമ്മളെ​യും യഹോവ നീതി​മാ​ന്മാ​രാ​യി കാണാ​നാണ്‌ നമ്മൾ ആഗ്രഹി​ക്കു​ന്നത്‌. അതു​കൊണ്ട്‌ ദൈവത്തെ സേവി​ക്കു​ന്ന​തിൽനിന്ന്‌ നമ്മളെ തടയാൻ യാതൊ​ന്നി​നെ​യും അനുവ​ദി​ക്ക​രുത്‌. നമ്മൾ അപൂർണ​രാ​ണെ​ങ്കി​ലും നമുക്കു തെറ്റുകൾ പറ്റു​മെ​ങ്കി​ലും അതൊ​ന്നും യഹോ​വയെ സേവി​ക്കു​ന്നതു നിറു​ത്തി​ക്ക​ള​യാൻ ഒരു കാരണ​മാ​ക​രുത്‌. യഹോ​വയെ സേവി​ക്കു​ന്നതു നിറു​ത്തു​ന്ന​തു​തന്നെ ഗുരു​ത​ര​മായ ഒരു തെറ്റാ​ണെന്ന്‌ ഓർക്കാം.

17. നമ്മൾ ആരെ വിവാഹം കഴിക്കു​ന്നു​വെ​ന്നതു പ്രധാ​ന​മാ​യി​രി​ക്കു​ന്നത്‌ എന്തു​കൊണ്ട്‌?

¹⁷ വിവാഹം കഴിക്കാൻ ആഗ്രഹി​ക്കുന്ന ഒരു ഏകാകി​യാണ്‌ നിങ്ങ​ളെ​ങ്കിൽ, ഇണയെ തിര​ഞ്ഞെ​ടു​ക്കുന്ന കാര്യ​ത്തിൽ ശരിയായ തീരു​മാ​ന​മെ​ടു​ക്കാൻ മലാഖി​യു​ടെ വാക്കുകൾ എങ്ങനെ​യാണ്‌ നിങ്ങളെ സഹായി​ക്കു​ന്നത്‌? ഒരാൾക്ക്‌ എത്ര നല്ല ഗുണങ്ങ​ളു​ണ്ടെ​ങ്കി​ലും ആ വ്യക്തി സത്യ​ദൈ​വത്തെ സേവി​ക്കു​ന്നി​ല്ലെ​ങ്കിൽ യഹോ​വ​യു​ടെ കണ്ണിൽ ആ വ്യക്തി നീതി​മാ​നാ​യി​രി​ക്കു​മോ? (2 കൊരി. 6:14) അങ്ങനെ​യുള്ള ഒരാളെ നിങ്ങൾ വിവാഹം കഴിച്ചാൽ യഹോ​വ​യോ​ടു വിശ്വ​സ്‌ത​നാ​യി​രി​ക്കു​ന്ന​തി​നു നിങ്ങളെ സഹായി​ക്കാൻ ആ വ്യക്തിക്കു കഴിയു​മോ? ശലോ​മോൻ രാജാ​വി​ന്റെ കാര്യം ഓർക്കാം. അദ്ദേഹം വിവാഹം കഴിച്ച വിദേ​ശ​സ്‌ത്രീ​കൾക്കു ചില നല്ല ഗുണങ്ങ​ളൊ​ക്കെ ഉണ്ടായി​രു​ന്നി​രി​ക്കാം.  പക്ഷേ അവർ യഹോ​വയെ ആരാധി​ക്കാ​ത്ത​വ​രാ​യി​രു​ന്നു. അതു​കൊണ്ട്‌ പതി​യെ​പ്പ​തി​യെ ശലോ​മോ​നെ അവർ വ്യാജാ​രാ​ധ​ന​യി​ലേക്കു കൊണ്ടു​പോ​യി.—1 രാജാ. 11:1, 4.

18. മാതാ​പി​താ​ക്കൾ മക്കളെ എന്തു പഠിപ്പി​ക്കണം?

¹⁸ മാതാ​പി​താ​ക്കളേ, രാജാ​ക്ക​ന്മാ​രെ​ക്കു​റി​ച്ചുള്ള ബൈബിൾവി​വ​ര​ണങ്ങൾ ഉപയോ​ഗി​ച്ചു​കൊണ്ട്‌, യഹോ​വയെ സേവി​ക്കാ​നുള്ള ആഗ്രഹം മക്കളിൽ വളർത്താൻ നിങ്ങൾക്കാ​കും. സത്യാ​രാ​ധ​ന​യോ​ടു പറ്റിനി​ന്നോ ഇല്ലയോ എന്നതിന്റെ അടിസ്ഥാ​ന​ത്തി​ലാണ്‌ യഹോവ രാജാ​ക്ക​ന്മാ​രെ പ്രധാ​ന​മാ​യും വിലയി​രു​ത്തി​യത്‌ എന്നു മനസ്സി​ലാ​ക്കാൻ മക്കളെ സഹായി​ക്കുക. ബൈബിൾ പഠിക്കു​ന്ന​തും മീറ്റി​ങ്ങു​കൾക്കു പോകു​ന്ന​തും ശുശ്രൂ​ഷ​യിൽ പങ്കെടു​ക്കു​ന്ന​തും പോലുള്ള ആത്മീയ​കാ​ര്യ​ങ്ങ​ളാണ്‌ ജീവി​ത​ത്തിൽ ഏറ്റവും പ്രധാനം എന്നു വാക്കു​ക​ളി​ലൂ​ടെ​യും പ്രവൃ​ത്തി​യി​ലൂ​ടെ​യും അവരെ പഠിപ്പി​ക്കുക. (മത്താ. 6:33) അങ്ങനെ ചെയ്‌തി​ല്ലെ​ങ്കിൽ മക്കൾ യഹോ​വയെ ആരാധി​ക്കു​ന്നതു അവർക്ക്‌ യഹോ​വ​യു​മാ​യി വ്യക്തി​പ​ര​മായ ഒരു ബന്ധം ഉള്ളതു​കൊ​ണ്ടാ​യി​രി​ക്കില്ല; മറിച്ച്‌ മാതാ​പി​താ​ക്കൾ സാക്ഷി​ക​ളാ​യ​തു​കൊണ്ട്‌ മാത്ര​മാ​യി​രി​ക്കും. അങ്ങനെ​യുള്ള ഒരു കുട്ടി, സത്യാ​രാ​ധ​ന​യ്‌ക്കു ജീവി​ത​ത്തിൽ രണ്ടാം സ്ഥാനം കൊടു​ക്കാ​നോ സത്യം പൂർണ​മാ​യും ഉപേക്ഷിച്ച്‌ പോകാ​നോ സാധ്യ​ത​യുണ്ട്‌.

19. യഹോ​വയെ സേവി​ക്കു​ന്നതു നിറു​ത്തിയ ഒരാളു​ടെ കാര്യ​ത്തിൽ എന്തു പ്രതീ​ക്ഷ​യ്‌ക്കു വകയുണ്ട്‌? (“ നിങ്ങൾക്ക്‌ യഹോ​വ​യി​ലേക്കു മടങ്ങി​വ​രാ​നാ​കും!” എന്ന ചതുര​വും കാണുക.)

¹⁹ യഹോ​വയെ സേവി​ക്കു​ന്നതു നിറു​ത്തിയ ഒരാളു​ടെ കാര്യ​ത്തിൽ യാതൊ​രു പ്രതീ​ക്ഷ​യ്‌ക്കും വകയില്ല എന്നാണോ? അല്ല. അദ്ദേഹ​ത്തി​നു പശ്ചാത്ത​പി​ക്കാ​നും സത്യാ​രാ​ധ​ന​യി​ലേക്കു തിരി​ച്ചു​വ​രാ​നും കഴിയും. അതിന്‌ ആ വ്യക്തി അഹങ്കാരം ഒക്കെ മാറ്റി​വെച്ച്‌ താഴ്‌മ​യോ​ടെ മൂപ്പന്മാ​രു​ടെ സഹായം സ്വീക​രി​ക്കാൻ തയ്യാറാ​കണം. (യാക്കോ. 5:14) എത്ര ശ്രമം ചെയ്യേ​ണ്ടി​വ​ന്നാ​ലും അതൊരു നഷ്ടമല്ല. കാരണം, വീണ്ടും യഹോ​വ​യു​ടെ ഒരു സുഹൃ​ത്താ​കാൻ കഴിയു​ന്ന​തി​നെ​ക്കാൾ വലുതാ​യി മറ്റൊ​ന്നു​മില്ല!

20. വിശ്വ​സ്‌ത​രായ രാജാ​ക്ക​ന്മാ​രെ അനുക​രി​ക്കു​ന്നെ​ങ്കിൽ, യഹോവ നിങ്ങളെ എങ്ങനെ​യുള്ള ഒരാളാ​യി കാണും?

²⁰ ഇസ്രാ​യേൽ രാജാ​ക്ക​ന്മാ​രിൽനിന്ന്‌ നമ്മൾ എന്തെല്ലാം പാഠങ്ങ​ളാ​ണു പഠിച്ചത്‌? പൂർണ​ഹൃ​ദ​യ​ത്തോ​ടെ യഹോ​വയെ സ്‌നേ​ഹി​ക്കു​ന്ന​തിൽ തുടരു​ന്നെ​ങ്കിൽ നമുക്കും വിശ്വ​സ്‌ത​രായ രാജാ​ക്ക​ന്മാ​രെ​പ്പോ​ലെ ആയിരി​ക്കാ​നാ​കും. തെറ്റുകൾ പറ്റു​മ്പോൾ അതിൽനിന്ന്‌ പാഠം പഠിക്കു​ക​യും പശ്ചാത്ത​പി​ക്കു​ക​യും വേണ്ട മാറ്റങ്ങൾ വരുത്തു​ക​യും ചെയ്യുക. ഒരേ ഒരു സത്യ​ദൈ​വത്തെ മാത്രം ആരാധി​ച്ചു​കൊണ്ട്‌ സത്യാ​രാ​ധ​ന​യോ​ടു പറ്റിനിൽക്കേ​ണ്ട​തി​ന്റെ പ്രാധാ​ന്യം ഓർക്കു​ക​യും ചെയ്യാം. അങ്ങനെ നിങ്ങൾ യഹോ​വ​യോ​ടു വിശ്വ​സ്‌ത​രാ​യി നിൽക്കു​ന്നെ​ങ്കിൽ, തന്റെ മുമ്പാകെ ശരിയാ​യതു ചെയ്യുന്ന ഒരാളാ​യി യഹോവ നിങ്ങ​ളെ​യും കാണും.