Nahakki yumban punsi amasung imung manung yamna nungainaba kanna hotnarabasu, khanghoudana thoklakpa thoudok amana nungaiba pumnamak manghankhiba yai. (Pao Sandokpa 9:11) Asigumba khudongchadaba thoudoksing asi thengnaba ngamnabagidamak Ishworna eikhoibu nungsina mateng pangbi. Makhada piriba Biblegi niyamsing asi illaga chatpa matamda, khwaidagi ware haina khanba phibamdu phaoba nahak amasung nahakki imung-manungna punna maiyoknaba ngamgani.

BIBLENA KARI HAIRI: “Nakhoigi langtaknaba pumnamak mangonda langsillu; maramdi mahakna nakhoigidamak khanbi.” (1 Peter 5:7) Nahakna nangliba khudongthibasing adu Ishworna thokhanba natte haibasi matam pumnamakta ningsingbiyu. (Jacob 1:13) Nahakna mangonda naksinjaribamakhei, khwaidagi phaba mawongda Ishworna nahakki mateng panggani. (Jishaiya 41:10) “Mahakki mangda nakhoigi thamoi phongdokchou.”—Thagat Ishei 62:8.

Nahakna nungtigi Bible paba amasung neinajaba matamda, pukningda nungaiba phaojagani. Maduna maram oiraga, Jehovahna “eikhoigi awa-ana pumnamakta themjinbi” haibasi nahakna khanglakkani. (2 Corinthiya 1:3, 4; Romiya 15:4) “Khangba pumnamaktagi hendoklaba Ishwordagi lakpa ingthaba” adu nangonda pibigani haina mahakna washakli.—Philippiya 4:6, 7, 13.

NAHAKNA TOUBA YABADI:

• Ingthana leiba amasung wakhal phajana khanthaba ngamnabagidamak Jehovahdagi mateng nijou

• Phibamduda kari kari touba yabage haibadu munna khanbiraga, khwaidagi phabadu khallaga toubiyu

BIBLENA KARI HAIRI: “Heisingba meegi thamoina lousing phang-ee, asingbagi nakongna khangjinnaba hotnei.” (Paorou 18:15) Oiriba phibamdu maiyoknabada imunggi meeoi khudingmakpu karina mateng pangba yagani haibadu khangdokpiyu. Imunggi meeoi khudingmakki darkar oibasingdu khangdokpiyu. Makhoiga wari sannabiyu amasung makhoina haiba tabiyu.—Paorou 20:5.

Adubu eikhoigi nungsijaba meeoi ama leikhidaba taragadi kari tougani? Pukningda phaobasing phongdokpada hanggoiba toubiganu. Jishu phaoba tanja amadadi “kapkhi” haibasi ningsingbiyu. (Johan 11:35; Pao Sandokpa 3:4) Asigumba matamdadi tumba amasung ningthijana pothaba haibasisu yamna darkar oi. (Pao Sandokpa 4:6) Maduna aruba phibamdu thengnabada mateng panggani.

NAHAKNA TOUBA YABADI:

• Khudongthiba thoudok thoktringei mamangdagi houna imung manunggi meeoisingga wari sannaduna pao phaonabagi heinabi thambiyu. Maduna konna khudongthiba thoudoksing thoklakpa matamda makhoinasu nahakka wari sannabada apanba leiroi

• Nahakna thengnariba phibamdu hannana thengnakhre haina khanba meeoisingga wari sannabiyu

BIBLENA KARI HAIRI: “Marupna matam pumnamakta nungsi, machin manaona awa anagidamak pok-ee.” (Paorou 17:17) Nahakki marupsingna nahakpu mateng pangba pamlabasu, makhoina kari tougadage haibadu khangdaba yai. Aduna, nahakna tasengna kari mateng panghanningbage haibadu makhoida phongdokpiyu. (Paorou 12:25) Maduga loinana, Biblegi niyamsing karamna illaga chatchagani haibadu Biblegi maramda khangba meeoisingdagi mateng loubiyu. Makhoina Biblegi matung inna pirakpa paotaksingduna nahakki mateng soidana panggani.—Jacob 5:14.

Ishwor amasung mahakki washaksingda chetna thajaba meeoisingga leptana punjaba matamda nahakna soidana mateng phangjagani. Pukning thougatpiba darkar oiriba meeoisingbu nahakna mateng pangbiba matamdasu, nahakki pukningda nungaiba phaogani. Jehovah amasung mahakki washaksingda leiba nahakki thajabadu makhoida haibiyu. Pukning thougatpiba darkar oiba meeoisingbu mateng pangbada isamak ithou chinba oibiyu. Nahakpu nungsibiba amasung nahakkidamak khanbiba meeoisingdagi lapthokpiganu.—Paorou 18:1; 1 Corinthiya 15:58.

NAHAKNA TOUBA YABADI:

• Luna tinnajaba marup amada wari sannabiyu aduga mahakki mateng loubiyu

• Thamoisengna nahakki darkar oibasingdugi maramda mayek sengna haibiyu