“Jati amana jati amagi mathakta, aduga ningthou leibak amana ningthou leibak amagi mathakta laan hourakkani. Mapham kayada kanna yuharaba, chaktangba amasung sathiba lainasing thokkani” haina Jishuna hairammi. (Luke 21:10, 11) Hairiba thoudoksing asi matam amattada punna thoklakpa urabadi maduna “Ishworgi ningthou leibak naksillakle” haibagi khudamni. Hairiba thoudoksing asi tasengnamak thoklabra amasung prithibi pumbada pak sanna uba phanglabra? Makhada piriba pramansing asi khannaraga yengsi.

1. LAAN

Sok 1914 da meeoibagi puwarida amukta thokkhidriba laan ama thokkhi. Sok 1914 da prithibi asida achouba ahongba ama lakkhi haina puwari neinabasingna tattana khanghalli. Maramdi, chahi asida prithibigi ahanba laanjao houkhi. Laan aduda tank, nongthaktagi thadaba bomb, aphaba makhalgi nongmei, hoo chenba gas amasung atoppa mee siba yaba khutlai kaya ihan hanba oina pak sanna sijinnaba houkhi. Madugi matungda prithibigi anisuba laanjao amuk thokkhi. Laan aduda ihan hanba oina atom bomb sijinnaba houkhi. Sok 1914 dagi houraga houjik phaoba prithibigi tongan tonganba mapham kayada leppa leitana laan soknari aduga lansing aduda meeoi lakh kayagi punsi mangkhre.

2. YUHAR HABA

Britannica Academicki matunginna, “yamna chaona amang ata” thokhanba ngamba akanba yuhar haba 100 rom chahi khudinggi adumak thok-ee haina khanghalli. “Sok 1900 tagi thamlakpa recordki matunginna, chahi khudinggi achouba yuhar haba 16 lom thokkani haina eikhoina panei” haina Americagi Geological Surveyna phongdok-ee. Meeoi kharanadi yuhar habagi masing hengatlakpa natte, technologygi khutthangda masigi maramda henna khangba ngamlakpadagi hengatlakpa manbani haina phongdok-ee. Makhoina asumna haijarabasu achouba yuhar haba kaya thokpadagi prithibida hanna thokkhidriba mawongda pak sanna amang ata, asi ana kaya thokhalli haibasidi chumlaba waphamni.

 3. CHAKTANGBA

Laan, senja thumja touba, sel thumgi phibham sokchillakpa, lou-u singunabagi aphaba thourang leitabana maram oiraga prithibi sinba thungna chaktangba thokhalli. World Food Programmegi “2018 gi chahigi paodam” matunginna, “prithibi pumbada, meeoi koti 82 ga lakh 10 na chanabagi awatpa maiyoknari aduga makhoi adugi manungda meeoi koti 12 ga lakh 40 na ka henba phibham maiyoknari” haina phongdok-ee. Chaba watpana maram oiraga chahi khudinggi angang lakh 31 romgi punsi manghalli. Sok 2011 da prithibi pumbada sikhiba angangsinggi marakta chada 45 ti chaba phangdabadagi oikhi.

4. LAINA LAICHAT

World Health Organizationgi chephong amana hai: “21 suba satapdi asida achouba laina laichat kaya thoklakkhre. Hannagi lainasing—cholera, plague amasung yellow fever—amukhanna sandorakli aduga anouba kaya amasu thoklakli—SARS, pandemic influenza, MERS, Ebola amasung Zika.” COVID-19 laichatna khwaidagi anoubani. Scientist amasung doctorsingna laina laichatsinggi maramda henna phajana khangba hengatlaklabasu laina khudingmak phahanba ngambagi pambeidi makhoina puthokpa ngamde.

5. PRITHIBI SINBA THUNGNA TOURIBA PAO SANDOKPAGI THABAK

Jishuna mangjounana hairamba khudamdugi saruk ama oina wapham asisu phongdoklammi: “Ningthou leibakki aphaba wapao asi jati pumnamakta sakhi oinanaba taibangpan apumbada sandokkani; aduga aroiba matam adu lakkani.” (Maathi 24:14) Ngasi taibangpansida achouba khudongchadaba kaya maiyoknajarabasu jati khudingmaktagi meeoi lakh mariphu henbana Ishworgi Ningthouleibakki nungaiba pao sandokli. Lon 1,000 gi mathakta tongan tonganba leibak 240 da makhoina hairiba thabak asi touri. Asumna pak sanna pao sandokpagi thabak touba asi meeoibagi puwarida amukta thokkhidri.

Jishuna thokkani hairamba thoudoksingdu ngasi eikhoigi matamda chapchana thokpa uri. Wapham asida eikhoina pukning changba karigi darkar oiribano? Maramdi Jishuna asumna hairammi: “Nakhoina pumnamak asi thokpa ubada Ishworgi ningthou leibak naksillakle haiba khangu.”—Luke 21:31.

Biblegi matunginna chahi paba amasung Jishuna piramba khudam asi kupna yengba matamda, Ishworna mahakki Ningthouleibak adu sok 1914 a da sargada lingkhatkhre haiba khangba ngammi. Matam aduda mahakki machanupa Jishu Christabu mahakna Ningthou oina hapkhi. (Thagat Ishei 2:2, 4, 6-9) Ikui kuidana Ishworgi Ningthouleibakna prithibida sashan touba houragani amasung masina meeoibagi leingak khudingmakpu louthokkhragani, aduga prithibi asi meeoibasingna lomba naidana leinabagidamak paradise oina semgatlagani.

“Nahakki Ningthou leibak laksanu. Sargada nahakki ningba toubagumna malemdasu tousanu” haina Jishuna Ishworda haijakhiba waphamsi ikui kuidana prithibida thoklaragani. (Maathi 6:10) Adu oirabadi, Ningthouleibak asina sok 1914 dagi sashan touba houkhiba matam adudagi houjik phaoba kari kari touraklibage? Ningthouleibak asina meeoibasinggi mathakta mapung phana sashan touraklaba matamda karamba ahongbasing uba phanggani?