“মপুরোইবশিংনা মখোয় মখোয়গী মশাবু নুংশিবগুম্না, মখোয় মখোয়গী নুপীশিংবু নুংশিগদবনি। মশামক্কী নুপীবু নুংশিবা মী অদুনা মহাক মশামকপু নুংশিজবনি। মরমদি মী কনা অমতনা কৈদৌঙৈদসু মশামক্কী হকচাংবু য়েংথিদে. . .মহাক্কী হকচাংবু য়োকখৎচৈ অমসুং য়েংশিঞ্জৈ।”—এফিসা ৫:২৮, ২৯.

মপুরোইবনা ইমুং অমগী মকোক্নি। (এফিসা ৫:২৩) অদুদু মসি হায় হায়দুনা, মহাক্কী নুপীবু তাথীনা তৌবা নত্ত্রগা মাগী নুপীনা মহাক্না তৌ হায়রিমখৈ তৌগদবনি হায়বগী ৱাখল্লোনদি লৈরোইদবনি। মহাক্না মহাক্কী নুপীবু লুনা তৌবিগদবনি। মহাক্কী দরকার ওইবশিং খঙবীবা খক্তা নত্তনা মহাক্কী থম্মোয়দা ফাওরিবশিংসু খঙবীগদবনি। মহাক্না মশা মথন্তগী খল্লোইদবনি, মহাক্কী নুপীবুসু হরাউহন্নবা হোৎনগদবনি। (ফিলিপ্পীয়া ২:৪) অফবা মপুরোইবা অমনা মহাক্কী নুপীদা ৱা লোত্তে অদুগা মহাক্কী নুপীনা হায়বশিংসু পুক্নীং চঙনা তাবী। মহাক্না মহাক্কী নুপীদা “অখাবা পূক্নীং” থম্বা নত্ত্রগা মৈ হৌনা শাওবা তৌদে। মহাক্কী নুপীবু ফুবী চৈবীবা নত্ত্রগা থম্মোয় শোকহনবা হায়বনচিংবসু তৌদে।—কোলোসীয়া ৩:১৯.

“নুপীনা মহাক্কী মপুরোইববু ঈকাই খুম্নগদবনি।”—এফিসা ৫:৩৩.

নুপী অমনা মহাক্কী মপুরোইববু ইকায়খুম্নগদবনি অমসুং মপুরোইবনা লৌবা ৱারেপশিংদা শৌগৎকদবনি। অদুম্না তৌরবদি ইমুং মনুং ঈং তপ্না পানবা হায়বদু ওইগনি। মপুরোইবনা অশোয়বা অমা তৌরকপা মতমদা মদু পন্দুনা হঞ্জিন হঞ্জিন ঙাঙলোয়দবনি। অদুগুম্বা মতাংদসু মহাক্না পুক্নীং তপথনা লৈগদবনি। (১ পিতর ৩:৪) করিগুম্বা নুংঙাইতবা ৱাফম অমগী মতাংদা হায়নীংলবসু তাঞ্জা চাবা মতাং য়েংদুনা অমসুং ইকায়খুম্নবগা লোয়ননা মপুরোইবগী মফমদা ফোঙদোক্কদবনি।—পাউ শন্দোকপা ৩:৭.

“নিপানা মহাক্কী . . . নুপীদা নপশিনগনি, অদুগা মখোয় অনী হকচাং অমতা ওইগনি।”—মৈহৌরোন ২:২৪

নুপা অমগা নুপী অমগা লুহোংলবা মতুংদদি মখোয় অনীগী ওইবা য়ুম্বান পুন্সিগী অচেৎপা মরী অমা শেম্লবনি। মরম অসিনা, য়ুম পাল্লবা মতৈ মনাও অনীমক্না মখোয়গী য়ুম্বান পুন্সিগী মরীদু চেৎনা থম্নবা কন্না হোৎনগদবনি। মদুগীদমক মখোয়না ফজনা ৱারী ৱাতাই শান্নবা অমসুং অপীক অপীকপা হীরমশিংদসু থৌজাল উৎনবা দরকার ওই। মতৈ মনাওগী মরক্তা খক নত্তনা অতোপ্পগা য়ুম্বানবগী মরী থম্লোইদবনি। মরমদি মসি য়াম্না থম্মোয় কায়নীংঙাই ওইবা থৌওংনি। অসিগুম্বা থবকসিনা ইমুং কায়হল্লি অদুগা মতৈ মনাওগী মরক্তা লৈনরম্বা থাজবদু মাঙহল্লি। মরম অসিনা, মতৈ মনাও ওইবশিংনা অমনা অমগী মফমদা থাজবা য়াবা মীশক ওইগদবনি।—হিব্রু ১৩:৪.

“অঙাং অমবু মহাক্না চৎকদবা লম্বী তম্বিয়ু, মহাক্না অহন ওইরবদা মদুদগী লৈথোক্লোই।”—পাউরৌ ২২:৬.

ঈশ্বরনা মমা মপা ওইবশিংদা মখোয়গী মচাশিংবু তাকপী তম্বীনবগী থৌদাং শিন্নৈ। অদুনা মখোয়না অঙাংশিংদা করিগুম্বা অমা তৌ নত্ত্রগা তৌগনু হায়না তাকপা খক্তা নত্তনা মখোয় মশানসু থবক ওইনা তৌদুনা উৎলগা তাকপীগদবনি। (অনীশুবা  ৱায়েন ৬:৬, ৭) অঙাংশিংনা অশোয়বা অমা তৌরকপা মতমদা হান্না হেক্তা শাউগৎলোইদবনি। মদুগী মহুত্তা হৈ শিংবা মমা মপাশিংনা “তাবদা থুবা, ঙাঙবদা তপ্পা অমসুং শাউবদা তপ্পা” ওইগদবনি। (যাকোব ১:১৯) করিগুম্বা অঙাং অমগী অশোয়বা অমা চুমথোকপা দরকার ওইরকপা মতমদসু নুংশিনা অমসুং অশাউবা উত্তনা ফজনা হায়বিগদবনি।

“অঙাংশা, . . . নখোয়গী নমা নপানা হায়বা ইল্লু . . . নমা নপাবু ঈকাই খুম্নৌ।”—এফিসা ৬:১, ২.

অঙাংশিংনা মমা মপাবু য়াম্না ইকায়খুম্নগদবনি অমসুং মখোয়না হায়বা ইঞ্জগদবনি। অদু ওইবা তারগদি ইমুং মনুং য়াম্না ঈং তপ্না অমসুং নুংঙাইনা লৈগনি। অদুগা ইমুংগী মীওই খুদিংমকসু হরাউগনি। অঙাংশিংনা চাউরক্লবা মতমদসু মখোয়গী মমা মপাবু ইকায়খুম্নগদবনি অমসুং মখোয়বু য়েংশিনবীগদবনি। হায়বদি য়ুমগী থবক মচা মশুশিং, শেল থুমগী দরকার ওইবশিংদা মতেং পাংগদবনি অমসুং মখোয়গী লৈফম চাফমশিং য়েংশিনবীগদবনি।—১ তীমোথি ৫:৩, ৪.