যেহোবানা মীওইবশিং লৈননবা পৃথিবী শেমখিবনি। মসি ঐখোয়গী য়ুমনি। ঈশ্বরনা মীওইবগী ইহান হানবা মতৈ-মনাও আদম অমসুং হৱাবু স্বর্গদা লৈহন্নবা শেমখিবা নত্তে, মরমদি, স্বর্গদা লৈনবগীদমক স্বর্গদূতশিংবু মহাক্না হান্ননা শেম্বীখ্রে। (যোব ৩৮:৪, ৭) ঈশ্বরনা অহানবা মী আদম্বু এদেনগী ইংখোল কৌবা নুংঙাইরবা মফম অমদা লৈহনখি। (মৈহৌরোন ২:১৫-১৭) যেহোবানা আদম অমসুং মহাক্কী তুংগী চারোন-শুরোনশিংনা পৃথিবীদা লোম্বা নাইদনা হিংনবগী খুদোংচাবা পীবিখি।—থাগৎ ঈশৈ ৩৭:২৯; ১১৫:১৬ পাবিয়ু।

ইহান হানবদা এদেনগী ইংখোল খক্তনা পারাদাইস ওইরম্মী। ঈশ্বরনা অহানবা মতৈ-মনাও অদুগী মচা-মশুশিংনা পৃথিবী অসিবু থলহনবা পামলম্মী। মতমগী মতুংইন্না মখোয়না মালেম শীন্থুংনা শন্দোক্তুনা পৃথিবীবু পারাদাইস অমা ওইনা শেমলমগদৌবনি। (মৈহৌরোন ১:২৮) পৃথিবী অসি কৈদৌনুংদা মাঙলোই। মসি মতমপুম্বদা মীওইবগী লৈফম ওইগনি।—থাগৎ ঈশৈ ১০৪:৫ পাবিয়ু।

ঈশ্বরনা করিগীদমক পৃথিবী শেমখিবনো? হায়রিবা ভিদিও অসি য়েংবিয়ু

আদম অমসুং হৱানা ঈশ্বরনা হায়বা ইনখিদে। মরম অদুনা যেহোবানা মখোয়বু এদেনগী ইংখোলদগী তান্থোকখি। মীওইবনা পারাদাইসতা লৈবগী খুদোংচাবদু মাঙহনখি অমসুং মদু কনামত্তনা হঞ্জিলহনবা ঙমখিদে। বাইবলনা হায়, “ঈশ্বর নীংদবশিংগী মখুত্তা মালেম পীথোক্লে।”—যোব ৯:২৪.—মৈহৌরোন ৩:২৩, ২৪ পাবিয়ু।

ঈশ্বরনা মীওইবা শেমখিবগী পান্দম অদু থুংহল্লরোইদ্রা? থুংহনগনি! মরমদি মহাক্তি ইঙম-ঙম্বনি। মহাক্না তৌবা খুদিংদা মায়পাক্তবা অমত্তা লৈতে। (যিশাইয়া ৪৫:১৮) মহাক্না মীওইবা জাতিগীদমক থম্বিখিবা পান্দম অদু শোয়দনা থুংহনগনি।—থাগৎ ঈশৈ ৩৭:১১, ৩৪ পাবিয়ু।

যীশুনা ঈশ্বরগী খনগৎলবা নিংথৌ অমা ওইনা পানবা মতমদা পৃথিবীসি অমুক হন্না পারাদাইস ওইহল্লক্কনি। আর্মাগেদ্দোন কৌবা লান্দা যীশুনা স্বর্গদূতশিংবু লুচিংদুনা ঈশ্বরগী মায়োক্তা লৈবশিংবু মাঙহনগনি। অদুদগী যীশুনা সৈতানবু চহী ১,০০০  ফাজিন্দুনা থমগনি। মাঙহনগদৌরিবা অদুদা ঈশ্বরগী মনাইশিংদি হিংহৌগনি। মরমদি যীশুনা মখোয়বু লমজীংবীগনি অমসুং ঙাকথোকপীগনি। মখোয়না পারাদাইস ওইরবা পৃথিবী অদুদা লোম্বা নাইদনা নুংঙাইনা হিংহৌগনি।—ফোংদোকপিবা ২০:১-৩; ২১:৩, ৪ পাবিয়ু।

ঈশ্বরনা পৃথিবীদা করম্বা মতমদা ফত্তবশিংগী অরোয়বা পুরক্কদৌরি? অরোয়বা অদু নকশিল্লক্লে হায়বা খঙনবা যীশুনা “খুদম” পীরম্মী। ঙসি ওইরিবা তাইবংপানগী ফিভম অসিনা মীওইবনা হিংবদা অকিবা পোকহল্লে। ফিভমশিং অসিনা ঐখোয় “তাইবংপান অসি লোইগদবগী” মতম অদুদা হিংলি হায়বা তাকই।—মাত্থি ২৪:৩, ৭-১৪, ২১, ২২ পাবিয়ু।

যীশুনা চহী ১,০০০ স্বর্গদগী পৃথিবীদা নিংথৌ ওইনা পানগনি, মতমদুদা মহাক্না অৱা-অনা পুম্নমক্কী অরোয়বা পুরক্কনি। (যিশাইয়া ৯:৬, ৭; ১১:৯) নিংথৌ ওইবগী মথক্তা যীশুনা পুরোহিৎলেন ওইনসু থবক তৌগনি। অদুগা মহাক্না ঈশ্বরবু নুংশিজবশিংগী পাপশিং লৌথোকপিগনি। মতৌ অসুম্না ঈশ্বরনা যীশুগী খুত্থাংদা অনাবা, অহল ওইরকপা অমসুং অশিবা পুম্নমক লৌথোকখ্রগনি।—যিশাইয়া ২৫:৮; ৩৩:২৪ পাবিয়ু।

ঈশ্বরনা হায়বা ইনজবা মীশিংনা পারাদাইসতা লৈগনি। (১ যোহান ২:১৭) পুকচেল তপ্পশিংবু থিনবা অমসুং করম্না মখোয়বু ঈশ্বরনা য়াবশিং ওইরক্কদগে হায়বদু তাকপীনবা যীশুনা মহাক্কী তুংইনবশিংবু থারম্মী। ঙসিসু যেহোবানা পারাদাইস ওইরক্কদৌরিবা পৃথিবী অদুদা মীওই কয়ানা পুন্সি ফংজনবা শেম শারি। (জেফানিয়া ২:৩) মীশিংনা যেহোবাগী সাক্ষীশিংগী কিংদম হোলশিংদা লাক্তুনা অফবা মপুরোইবশিং অমসুং মপাশিং অদুগা অফবা লোইনবীশিং অমসুং মমাশিং করম্না ওইগদগে হায়বদু তমজৈ। মচাশিংগা, মপা-মমাশিংগা পুন্না ঈশ্বর নীংমিন্নৈ অমসুং বাইবলনা হায়রিবশিং অসিদগী করম্না মখোয়গী পুন্সিদা কান্নবা ফংগদগে হায়বদু তমজৈ।—মীকা ৪:১-৪ পাবিয়ু।