যীশুনা মহাক্কী তুংইনবশিংদা অচুম্বা ধর্ম্ম অমখক্কী মরমদা তম্বীরম্মী। মসি লোম্বা নাইদবা পুন্সি ফংনবগী লম্বীনি। যীশুনা হায়খি: লম্বী অদু “ফংবা মী য়ামদে।” (মাত্থি ৭:১৪) ঈশ্বরনা য়াবা লাইনীং-লাইশোলদি মহাক্কী ৱাহৈ বাইবলদা য়ুম্ফম ওইবা অদুখক্তনি। অচুম্বা লাইনীং-লাইশোল চৎপশিংদি অমত্তা ওইনা লৈ। মরমদি মখোয়গী থাজবা অমখক্তনি।—যোহান ৪:২৩, ২৪; ১৪:৬; এফিসা ৪:৪, ৫ পাবিয়ু।

লাইনিং লাইশোল খুদিংমক ঈশ্বরনা য়াব্রা? হায়রিবা ভিদিও অসি য়েংবিয়ু

যীশুনা অরানবা ৱা তাকথোকপা মীশিংনা খৃষ্টান লাইনীংবু মোৎহল্লক্কনি হায়না খঙহল্লম্মী। মপালথোঙদদি মখোয়দু অচুম্বা লাইনীং-লাইশোল চৎপা মীশিং মানগনি অমসুং মখোয় মশানসু যীশুগী তুংইনবনি হায়গনি। অদুবু মতৌ করম্না অসিগুম্বা মীশিং অসিগী অশেংবা মশক খঙদোকপা ঙমগদগে? অচুম্বা লাইনীং-লাইশোলনা অচুম্বা খৃষ্টানশিং পুথোকই। মখোয়গী মগুন অমসুং তৌথোরকপা থবকশিংনা যীশুগী অশেংবা তুংইনবশিংনি হায়বা খঙবা ঙম্মী।—মাত্থি ৭:১৩-২৩ পাবিয়ু।

মখাদা পীরিবা ৱাফম মঙা অসি খন্নরগা য়েংসি:

• অচুম্বা লাইনীং-লাইশোল চৎপশিংনা বাইবলবু ঈশ্বরগী ৱাহৈনি হায়না ইকাইখুম্নবা উৎলি। মখোয়না বাইবলগী নিয়মশিং ইন্নবা হোৎনৈ। মীওইবগী ৱাখল্লোন্দা য়ুম্ফম ওইবা ধর্ম্মগা অচুম্বা ধর্ম্মগা খেৎনৈ। (মাত্থি ১৫:৭-৯) অচুম্বা লাইনীং-লাইশোল চৎপশিংদি চীনগা খুৎকা মান্নৈ। মখোয়না মীঙোন্দা তাকপী-তম্বীরিবা অদু মখোয়গী পুন্সিদা ইল্লগা চৎলি।—যোহান ১৭:১৭; ২ তীমোথি ৩:১৬, ১৭ পাবিয়ু।

•   যীশুগী অশেংবা তুংইনবশিংনা ঈশ্বরগী মিং, যেহোবা হায়বসিবু ইকাইখুম্নৈ। যীশুনা ঈশ্বরগী মিংবু মীয়ামদা খঙহন্দুনা ইকাইখুম্নবা উৎলম্মী। মহাক্না মীশিংবু ঈশ্বর খঙনবা মতেং পাংলম্মী অমসুং ঈশ্বরগী মিং অশেংবা ওইসনু হায়না হায়জনবা মখোয়দা তম্বীরম্মী। (মাত্থি ৬:৯) নহাক্কী অকোয়বদা করম্বা ধর্ম্মনা ঈশ্বরগী মিং যেহোবানি হায়না খঙহনবগে?—যোহান ১৭:২৬; রোমীয় ১০:১৩, ১৪ পাবিয়ু।

• অচুম্বা খৃষ্টানশিংনা ঈশ্বরগী নিংথৌলৈবাক্কী মরমদা পাউ শন্দোকই। ঈশ্বরনা যীশুবু নিংথৌলৈবাক্কী নুংঙাইবা পাউ শন্দোক্নবা থারকখি। ঈশ্বরগী নিংথৌলৈবাক খক্তনা মীওইবগী অৱা-অনা কোক্নবগী অমত্তা ঙায়রবা আশানি। যীশুনা ৱাফম অসি মহাক্না শিদ্রিফাওবা শন্দোক্লম্মী। (লূক ৪:৪৩; ৮:১; ২৩:৪২, ৪৩) মহাক্কী তুংইনবশিংনসু পাউ অসি শন্দোক্নবা মহাক্না হায়রম্মী। কনাগুম্বনা অদোমদা ঈশ্বরগী নিংথৌলৈবাক্কী মরমদা ৱারী শারক্লবদি, মহাক্তু করম্বা ধর্ম্মদগী ওইরমগদগে?—মাত্থি ২৪:১৪ পাবিয়ু।

• যীশুগী তুংইনবশিংদি ফত্রবা তাইবংপান অসিগী শরুক অমা নত্তে। মখোয়না রাজনীতি নত্রগা সমাজগী চয়েৎনবা থবকশিংদা য়াওদে। মসিদগী মখোয়সি তাইবংপান অসিগী শরুক ওইদে হায়বদু তাকই। (যোহান ১৭:১৬; ১৮:৩৬) অদুগা মখোয়না তাইবংপান অসিগী খুদোংথীনীংঙাই ওইবা থবক অমসুং ৱাখল্লোনশিংবু মতৌ তমদে।—যাকোব ৪:৪ পাবিয়ু।

• অচুম্বা খৃষ্টানশিংনা মখোয় মশেলগী মরক্তা অমনা অমবু য়াম্না নুংশিনৈ। মখোয়না ঈশ্বরগী ৱাহৈদগী তমজদুনা মীওই কাঙলুপ খুদিংমকপু ইকাইখুম্নৈ। অরানবা ধর্ম্মশিংনা লৈবাক মশেলগী মরক্তা শোক্নরিবা লানশিংদা শৌগৎলি অদুবু অচুম্বা লাইনীং-লাইশোল চৎপশিংনদি মদুদা য়াওদে। (মীকা ৪:১-৩) অচুম্বা খৃষ্টানশিংনা মশাগী ওইজবা থিদনা মখোয়গী মতম অমসুং লৈজবশিং পুথোক্তুনা অতোপ্পবু মতেং পাংই অমসুং পুক্নীং থৌগৎলি।—যোহান ১৩:৩৪, ৩৫; ১ যোহান ৪:২০ পাবিয়ু।

ঈশ্বরগী ৱাহৈদা য়ুম্ফম ওইরগা তম্বীবা, ঈশ্বরগী মিংবু ইকাইখুম্নবা অমসুং ঈশ্বরগী নিংথৌলৈবাক খক্তনা মীওইবগী অমতা ঙায়রবা আশানি হায়না শন্দোকপা করম্বা ধর্ম্মদা লৈবগে? অমগা অমগা নুংশিনবা অমসুং লান য়াওদবা করম্বা কাঙলুপ লৈবগে? অদোমদি করি খল্লি?—১ যোহান ৩:১০-১২ পাবিয়ু।