অঙাং অমা য়াওরকপা মতমদা মতৈ মনাওগী পুন্সিদা হরাও নুংঙাইবনা পীক থলহনগনি। মদুগা লোয়ন-লোয়ননা মখোয়দা অচৌবা মথৌদাং অমসু হাপকৎলি। মমা মপা অমা ওইরবা মতুংদদি, নহাক্কী অয়াম্বা মতম অমসুং পাঙ্গল অঙাং শেন্নবদা চঙখিবা মতমদা ঙকপা য়াই। মপুং ফানা তুমদবা অমসুং ৱাখল চরাঙনবনা মরম ওইরগা নখোয় অনীগী মরীদা অকায়বা লাকপা য়াই। অঙাংদু শেন্নবগা লোয়ন-লোয়ননা নখোয় অনীগী য়ুম্বান পুন্সিসু ফগৎনবগীদমক, শীন্দোক শীনজিন খরদি তৌগদবনি। খুদোংচাদবশিংসি থেংনবা ঙম্নবা হোৎনবদা বাইবলগী পাউতাকশিংনা করম্না মতেং পাংগনি?

বাইবলনা করি হায়রি: “নুংশিবনা খাঙবি অমসুং চানবি।” অমসুং নুংশিবনা “মশাগী ওইজবা থিদে, নুংশিবনা থুনা শাউদে।” (১ কোরিন্থীয়া ১৩:৪, ৫) নৌরিবা মমা অমা ওইনা, নহাক্না অঙাংদা হেন্না পুক্নিং চঙবা হায়বসি মহৌশানি। অদুবু নহাক্কী নপুরোইবনদি মহাকপু মীরায়বিরে হায়না খনখিবা য়াই। মরম অদুনা মঙোন্দসু পুক্নিং চঙবীগদবনি হায়বসি কাউবিগনু। খাঙহৈবা অমসুং থৌজাল হৈবা মতৌ উৎপগা লোয়ননা নহাক্কী নপুরোইবদা, অঙাং শেন্নবগী থবকসিদা মহাক্কীসু শরুক য়াওই অমসুং মহাক্কী মতেং চঙই হায়বসি ফাওহনবীয়ু।

“মপুরোইবশা. . .নখোয়গী নুপীশিংবু. . .খঙবগা লোয়ননা পানমিন্নৌ।” (১ পিতর ৩:৭) নহাক্কী নুপীগী অয়াম্বা পাঙ্গলদি অঙাং শেন্নবদা চঙই হায়বসি খঙবীয়ু। মঙোন্দা নৌনা হাপকৎলক্লিবা মথৌদাংশিংদুনা মরম ওইরগা মহাক ৱাবা, চোকথবা অমসুং ৱাখল নুংঙাইতবা ফাওবা য়াই। করিগুম্বা মতমদদি নঙোন্দা অশাউবা ফোঙদোরকপসু য়াই। অদুবু মতমদুদা নহাক ঈংথনা লৈনবা হোৎনবিয়ু মরমদি “শাউবদা তপ্পা মহাক্না অকনবা মীদগী হেন্না ফৈ।” (পাউরৌ ১৬:৩২) ৱাখল খন্থরগা থবক তৌবিয়ু অমসুং মহাক্কী দরকার ওইবশিংদা মতেং পাংবিয়ু।—পাউরৌ ১৪:২৯

নহাক্না তৌবা য়াবদি:

• মপাশিং: নহাক্কী নুপীনা অঙাং শেন্নবদা অহীং নুংথিল খাক্তনা মতেং পাংবিয়ু। নহাক্কী নুপী অমসুং নচাগীদমক মতম হেন্না পীবা ঙম্নবা, নহাক্না অতোপ্পা থবকশিংদা কাইথোক্লিবা মতমদু খরা ককথবিয়ু।

• মমাশিং: নহাক্কী নপুরোইবনা অঙাং শেন্নবগী থবক্তা মতেং পাংবিগে হায়রকপা মতমদা নহাক্না য়াবিয়ু। মহাক্না তৌরিবদু মপুঙ ফাদ্রবসু, মহাকপু থীনা হায়বীগনু। অদুগী মহুত্তা, করম্না তৌগদগে হায়বদু মঙোন্দা নুংশিনা তাকপীয়ু

বাইবলনা করি হায়রি: “মখোয় অনী হকচাং অমতা ওইগনি।” (মৈহৌরোন ২:২৪) ইমুংদা অনৌবা মীওই অমা হেনগৎলকলবসু, নখোয় অনী হৌজিকসু “হকচাং অমতা” ওইরি হায়সি কাউবিগনু। নখোয়গী মরীদু চেৎশীন্নবা ঙমজবা থাক্তা হোৎনবিয়ু।

নুপীশা, নহাক্কী নপুরোইবনা তৌবিরিবশিং অমসুং পাংবিরিবা মতেংশিংদুগীদমক হরাওবা ফাওবীয়ু। নহাক্না ফোঙদোকপা থাগৎপগী ৱাহৈশিংদুনা নখোয়গী মরীদা ‘ফহনবা’ ওইগদৌরিবনি। (পাউরৌ ১২:১৮) মপুরোইবশা, নহাক্কী নুপীবু নহাক্না কয়ামুক নুংশিবগে অমসুং মমল লৈনা লৌজবগে হায়বদু মঙোন্দা ফোঙদোকপীয়ু। মহাক্না ইমুং মনুংগীদমক কন্না হোৎজরিবা ময়ামদুগীদমক থাগৎপীয়ু।—পাউরৌ ৩১:১০, ২৮

“মী কনা অমতনা মশাগী কান্ননবতা থিরোইদবনি, অদুবু মহাক্না অতোপ্পা মীগী কান্ননবা থিগদবনি।” (১ কোরিন্থীয়া ১০:২৪) মতমচুপ্পদা নহাক্কী নপুরোইবা নত্রগা নুপীগী ফনবতা খল্লগা তৌবিয়ু। মতৈ মনাও অমা ওইনা পুন্না ৱারী শানবা, অমনা অমবু থাগৎপা ফোঙদোকচনবা অমসুং অমনা হায়বা অমনা তাননবা মতম কাইথোকপিয়ু। হকচাংগী ওইবা মরী লৈনবগী মতাংদা ইশা খক্তগী খনবা তৌবিগনু। নহাক্কী নপুরোইবা নত্রগা নুপীগী অপাম্বসু খঙবীয়ু। বাইবলনা হায়রি: “ফংগদবা অদু নখোয় অমনা অমবু ফংহন্দবা তৌগনু।” (১ কোরিন্থীয়া ৭:৩-৫) মরম অসিনা হায়রিবা ৱাফমসিগী মতাংদা নখোয় অনী থম্মোয় শেংনা ৱারী শান্নবীয়ু। অমগা অমগা ৱাখল তানবা অমসুং খাঙহৈবা উৎনবনা নখোয়গী মরীদু হেন্না চেৎশীনবা ওইহল্লক্কনি।

নহাক্না তৌবা য়াবদি:

• নখোয় অনীখক্তগী ওইবা মতম কাইথোকপা কাউবিগনু

• নহাক্কী নপুরোইবা নত্রগা নুপীবু নহাক্না নুংশি হায়বসি মহাক্না খঙনবা করিগুম্বা খরা হায়বদি মেসেজ অমা থাবীবা নত্রগা ইচম চম্বা খুদোল অমা পীবীবনচিংবা তৌবিবা য়াই

বাইবলনা করি হায়রি: “অরান খুবম ফাওবা নহাকপু শিংহনবা ঙম্বা অশেংবা শাস্ত্র অদু নহাক্না অঙাং ওইরিঙৈদগী খঙখ্রে।” (২ তীমোথি ৩:১৫) নহাক্কী পীক্লিবা অঙাংবু তাকপীনবগীদমক করি তৌগদগে হায়বদু মাঙজৌননা খনবীয়ু। পোক্লক্ত্রিঙৈদগী হৌনা, অঙাংশিংদা খঙবা ঙম্বগী শক্তি ফজনা লৈ। পুক্নুংদা লৈরিঙৈদগী হৌনা, অঙাং অদুনা নহাক্কী খোঞ্জেল খঙবা ঙমই অমসুং নহাক্কী পুক্নিংদা ফাওরিবা ইহুলশিংদু মঙোন্দা মমি তাই। য়াম্না পীক্লিঙৈদগী হৌনা মঙোন্দা পারগা তাহনবীয়ু। নহাক্না পারিবদু করিনো হায়বা মহাক্না খঙদবা য়াই, অদুবু মদুনা মহাক্না হয়েং চাউরক্লবা মতমদা পাবদা নুংঙাইবা ফাওজবা মীশক অমা ওইহল্লকপা য়াই।

অঙাংদুদা ঈশ্বরগী মরমদা ৱারী শাবিবা মতমদা মহাকসি নৌমল্লি হায়না খনবীগনু। যেহোবাদা নহাক্না হায়জবদু মহাকপুসু তাহনবীয়ু। (অনীশুবা ৱায়েন ১১:১৯) মহাক্কা শান্নমিন্নবা মতমদসু, ঈশ্বরনা শেম্বী শাবিখিবা পোৎশকশিংগী মরমদা হায়বীয়ু। (থাগৎ ঈশৈ ৭৮:৩, ৪) মহাক্না চাউরক্লবা মতমদা, নহাক্না যেহোবাবু কয়ামুক নুংশিজবগে হায়বদু খঙবা ঙমগনি অদুগা মহাক্নসু যেহোবাবু নুংশিবা ঙম্লক্কনি।

নহাক্না তৌবা য়াবদি:

• অঙাংদু তাকপী তম্বীনবা ঈশ্বরগী মফমদগী লৌশিং নিজৌ

• পীক্লিঙৈদগী তম্বা হৌনবা মরুওইবা ৱাহৈশিং নত্রগা খঙহন্নীংলিবা ৱাফমদু হন্না হন্না হায়বীয়ু