Nebã na n yãame tɩ f yaa kõata. Rẽ na n kɩtame tɩ bãmb me nong n kõt foo. Ad Biiblã sẽn yet rẽ wɛɛngẽ:
“Bɩ y kõ la b na kõ yãmba. . . . Bala, ne makdg ning yãmb sẽn makd n kõt nebã, Wẽnnaam na n maka ne rẽnda n kõ yãmba.”—Luk 6:38.
Biiblã lebgr a to pʋgẽ, b yeelame: “Manesem ning yãmb sẽn tar ne nebã, manesem-kãng la b na n tall ne yãmba.”—Luk 6:38, Contemporary English Version.
Yiibu. Fo sã n sõng neb a taabã, yaa f meng la f sõng-yã.
Fo sã n maand neb a taabã neere, f manegd n nanda f mengã, kɩtdame me tɩ f tar sũ-noogo. Biiblã yeelame:
“Kũun wata ne sũ-noog n yɩɩd reegre.”—Tʋʋmã 20:35, MN.
“Fo sã n na n bool neb tɩ b wa n dɩ ne foom, bool naong rãmba, la koms-rãmba, la wobse, la zoense, la fo na n paama sũ-noogo, b sẽn ka tar n na n kõ foom n lebsã yĩnga.”—Luk 14:13, 14.
Kom-bɩɩs sẽn sõngd neb a taaba
Kom-bɩɩs wʋsg nong n sõngda neb a taabã. Ad makr a wãna.
A Casey yeelame: “Wakat ninga, m sẽn dat bal yaa m zĩnd n ges tele. La m tagsda m roagdbã yelle, n miẽ tɩ b bee b tʋʋmã zĩigẽ n tʋmd wʋsgo, la tɩ b sã n wa sig tʋʋma, b yaame. Dẽ m kiisda tele wã, n yik n pɛg laasã, n yẽes roogã la teedã, la m maan kafe, bala m miime tɩ m baaba ne m ma nonga kafe. M ma sã n ta n kẽ bal la a sẽn yet tɩ “fãa yaa yɩlemde, rẽ me m wʋmda yũ-noogo. Barka m biig-sõngo.” M sã n mi tɩ m sẽn maana nooma m baaba ne m ma, m sũurã nooma wʋsgo.”
A Holly yẽ yeelame: “M roagdbã sõnga maam wakat fãa, la b kõt maam bũmb nins sẽn yaa tɩlɛ ne-mã. Rɩẽ, b mobillã sãamame tɩ manegrã ra yaa toog ne-ba. M kõ-b-la ligd tɩ b tõog n manege. Ra yaa m ligdã fãa la bala. B ra pa rat n sak ye. La m pẽdg-b lame tɩ b baas n sake. M sã n da tarẽ, m na kõ-b tɩ yɩɩg woto. M sẽn paam n kõ-b ligd bilfã sɩd kõo maam sũ-noog menga.”
Fo miime, kom-bɩɩs wʋsg sẽn yaa a Zeova Kaset rãmb paamda sũ-noogo, b sẽn sõngd neb tɩ b zãmsd Biiblã yĩnga. Kẽer meng yikame n kẽng tẽng a to, bala Biibl karen-saamb dãmb pa waoog be ye.
A Evan yeelame: “Mam yii Etazĩni n kẽng Mɛgsɩk n na n tɩ sõng neb tɩ b zãms Biiblã. Wakat ninga, m pa tar ligd wʋsg bɩ bũmb a to n na n kõ ned ye. La m gũus n gesame tɩ nebã sẽn nong n yɩɩd yaa m sẽn na n dɩkd m sẽkã la m pãngã n moond-b kõɛɛgã.”
Bõe la m tõe n maan n sõng neb a taabã?
Fo me rat n paama neb a taabã sõngr sẽn wat ne sũ-noog ningã bɩ? Ad bũmb a wãn f sẽn tõe n maane:
N sõng f zakã rãmba:
F tõe n pɛga laasã, bɩ n pɩɩg roogã la f yẽese. Ra gũ tɩ b yeel-f tɩ f yaool n maan ye
F tõe segla rɩɩbo
F tõe n pʋʋsa f roagdbã barka, bũmb nins fãa b sẽn maandã yĩnga
F tõe n sõnga f yao t’a maan a ɛgzɛrsiis-rãmba
N sõng neb sẽn pa f zak neba:
F tõe n gʋlsa sebr n tool ned sẽn pa keeme
F tõe n sõnga f yak sẽn kʋʋle, n tʋm a zakã tʋʋmde
F tõe n tɩ gesa ned sẽn be yir n pa tõe n yi
F tõe n daa bũmb n tɩ kõ ned sẽn namsde
Mak woto: Tags bũmb kẽer f sẽn tõe n maan n sõng neda, la f yãk yam n maan dẽ semen-kãnga. F na n yãame tɩ na n kõ-f-la sũ-noog wʋsgo.
A Alana yeelame: “F sã n sõng neb a taabã, kõta sũ-noogo. Bala f miime tɩ f sẽn maanã yaa sõma, la tɩ nebã nanda bũmb ning f sẽn maanã. Tõe meng tɩ rẽ maaneg talla yamleoog n yɩɩd f sẽn da tagsdã. Wakat ning menga, sẽn naf foo wã yɩɩda f sẽn bõnã.”
