Baa ne gom-bil ning sẽn yaa “pʋg yiisgã” sẽn pa be Biiblã pʋgẽ wã, Biiblã vɛrse-rãmb wʋsg wilgda Wẽnnaam tagsg sẽn yaa a soab ninsaal vɩɩmã wɛɛngẽ, baa biig sẽn nan ket a ma pʋgẽ vɩɩm.

 Vɩɩmã yaa Wẽnnaam kũuni. (Sɩngre 9:6; Yɩɩn-sõamyã 36:9) Ninsaalbã fãa vɩɩm tara yõod a nifẽ, baa biig sẽn nan ket a ma pʋgẽ vɩɩm. Dẽnd ned sã n yãk yam n kʋ biig sẽn ket a ma pʋgẽ, yaa yõor la a sẽn yãkã.

 Tõog ning Wẽnnaam sẽn da kõ Israyɛll nebã pʋgẽ, a yeelame yaa: “Rap a yiib sã n zabd taaba, n fão pag sẽn tar pʋg t’a rog tɩ pa ta, tɩ yõor yaool n pa yãke, sẽn tar-a taalã segd n yaoo bũmb ning pagã sɩd sẽn na n togsã. La a segd n yaoome tɩ zems bʋ-kaoodbã sẽn na n yãk yam ningã. La yõor sã n yãke, fo segd n kõo vɩɩm vɩɩm yĩnga.”—Yikri 21:22, 23. a

•  Wakat bʋg la ninsaal vɩɩm sɩngda?

•  Wẽnnaam na n kõo ned sẽn zoe n yiis pʋg sugr bɩ?

•  Sã n mik tɩ ma wã bɩ biigã vɩɩm bee yell pʋgẽ, pʋgã yiisg yaa wẽng bɩ?

 Wẽnnaam nifẽ, ninsaal vɩɩm sɩngda wakat ning a ma wã sẽn dɩk-a pʋgã. Biiblã sẽn yaa Wẽnnaam Gomdã sã n wa gomd biig sẽn ket a ma pʋgẽ yelle, a gomda a yell wa a zoe n yaa neda. Ad makr a wãn sẽn wilgd tɩ Wẽnnaam nifẽ, biig sẽn nan ket a ma pʋgẽ vɩɩm, ne biig sẽn zoe n dog vɩɩm yaa yembre:

•   Wẽnnaam vẽnega rĩm a Davɩɩd t’a yeel yaa: “Yãmb ninã yãa maam m sẽn wa n be m ma wã pʋgẽ wã.” (Yɩɩn-sõamyã 139:16) Wẽnnaam nifẽ, a Davɩɩd sẽn wa n ket a ma wã pʋgẽ wã, a ra zoe n yaa neda.

•   Sẽn paase, nand meng tɩ b rog a Zeremi, Wẽnnaam ra zoe n miime t’a na n wa yɩɩ yẽ no-rɛɛsa. Wẽnnaam yeel-a lame yaa: “Nand tɩ mam maan foo f ma wã pʋgẽ, mam da mii foo. Nand tɩ fo roge, mam kɩtame tɩ fo lebg sõngo. Mam kɩtame tɩ fo lebg m no-rɛɛs buud toɛy-toɛy yĩnga.”—Zeremi 1:5.

•   Biibl-gʋlsd a Luk sẽn da yaa logtorã tũnuga ne Gɛrk gom-bi-yɛngã, n gom biig sẽn ket a ma pʋgẽ yelle, la biig sẽn nan dog yelle.—Luk 1:41; 2:12, 16.

 Neb nins sẽn zoe n yiis pʋsã tõe n paamame tɩ Wẽnnaam kõ-b sugri. B sã n sakd Wẽnnaam tagsg sẽn yaa a soab vɩɩmã wɛɛngẽ wã masã, b pa segd n sãam b sũur tɩ loog noor ye. Biiblã yetame yaa: “A Zeova yaa nimbãan-zoɛt la sõmblem soaba . . . A zãagda tõnd ne d beegrã, wa yaang sẽn zãr ne nin-taoor to-to wã.” b (Yɩɩn-sõamyã 103:8-12) A Zeova kõta neb nins fãa sẽn sɩd tek yam n kot sugr b pĩnd yel-wẽnã yĩngã sugri, baa sẽn yiis-b pʋsã.—Yɩɩn-sõamyã 86:5.

 Biiblã sẽn yet bũmb ning biig sẽn ket a ma pʋgẽ vɩɩm wɛɛngẽ wã pa kõt ned sor t’a tõe n yiis pʋga, a sẽn tagsd tɩ ma wã bɩ biigã vɩɩm bee yell pʋgẽ yĩng ye.

 La rogmã sasa, bũmb sã n maan tɩ lebg tɩlɛ tɩ b yãk b sã n na n fãaga ma wã bɩ biigã, d maanda wãna? Yell a woto buud taoore, yaa neb nins sẽn be yellã pʋgẽ wã n segd n yãk b sã n na n fãaga ma wã bɩ biigã.