Nebã tika bũmb nins a Zeezi Kirist sẽn zãms nebã n lugl “kiris-neb” tũudum toɛy-toɛya. La Biiblã wilgdame tɩ kiris-neb tũudum hakɩɩk a ye bal n be. Ad bũmb a tãab sẽn wilgd rẽ:

1.   A Zeezi yeelame tɩ yẽ zãmsa nebã “sɩdã,” tɩ pipi kiris-nebã ra boond b tũudmã tɩ “sɩdã.” (Zã 8:32; 2 Pɩyɛɛr 2:2; 2 Zã 4; 3 Zã 3) Gom-kãensã wilgdame tɩ neb nins sẽn zãmsd b taabã bũmb sẽn pa zems ne a Zeezi sẽn zãms nebã pa maand bũmb ning kiris-neb hakɩɩk sẽn segd n maanã ye.

2.   Biiblã wilgdame tɩ yaa tɩlɛ tɩ kiris-nebã fãa “goamã tũud taaba.” (1 Korẽnt-rãmbã 1:10) La tũudum nins sẽn yet tɩ b yaa kiris-nebã wʋsg wae n kɩɩsda taab zãmsg nins sẽn tar yõodã wɛɛngẽ. Wala makre, yɩ kiris-ned sẽn dat n yɛɛlgã wɛɛngẽ. Tũudum-kãensã fãa pa tõe n be bʋʋm ye.—1 Pɩyɛɛr 2:21.

3.   A Zeezi pĩnd n togsame tɩ neb wʋsg ra na n yetame tɩ b yaa kiris-neba, n yaool n pa sakd a noyã, la t’a na n zãgsa nin-kãense. (Matye 7:21-23; Luk 6:46) Kẽerã nengẽ wã yaa tũudmã taoor dãmb nins sẽn sãamd tũudum hakɩɩkã b mens nafr yĩngã n belg-ba. (Matye 7:15) La sãnda nonga tũudum nins sẽn yet bal tɩ b yaa Kirist tũudmã, bala be, b zãmsd-b-la bũmb nins b sẽn dat n wʋmã, la pa sɩdã sẽn be Biiblã pʋgẽ wã ye.—2 Tɩmote 4:3, 4.

 A Zeezi wẽe yel-bũnd n gom ki ne nadens yelle, n deng n togs tɩ b ra na n wa kɩɩsa Kirist tũudum hakɩɩkã. (Matye 13:24-30, 36-43) Ra na n kaoosame tɩ b pa tõe n bãng kiris-neb hakɩɩkã ne zirẽ-be-kiris-nebã n bak ye. Sɩdã kɩɩsg paama pãng tʋm-tʋmdbã kũum poor wa a Zeezi sẽn da pĩnd n togsã. (Tʋʋmã 20:29, 30) Baa sɩdã kɩɩsdbã zãmsgã sẽn tõe n yɩ toor-toorã, zirẽ-be-kiris-nebã fãa “bʋdg n basa sɩdã.”—2 Tɩmote 2:18.

 A Zeezi pĩnd n togsame me tɩ welgr ning sẽn be kiris-neb hakɩɩkã ne zirẽ-be-kiris-nebã sʋkã ra na n wa lebga vẽenega. Bõn-kãng maana tõnd wakatã sẽn yaa “dũniyã sɛɛb” wakatã.—Matye 13:30, 39.