N-ye! Biiblã yita Wẽnnaam sẽn yaa soab ning “sẽn belsd sũ-sãang rãmbã” nengẽ. (2 Korẽnt rãmbã 7:6) Baa Biiblã sẽn pa sebr logtoɛɛmb sẽn yiis n na n sõng nebã tɩ b sũur noom ne b mengã, a sõnga neb wʋsg sẽn da tagsd b mengã yõor yãkr yelle. A saglsã tõe n sõnga yãmb me.

•  Sagl-bʋs la Biiblã kõt tɩ tõe n sõnge?

•  Biiblã gomda neb sẽn da tagsd tɩ b sẽn kiid n são yell bɩ?

•  Biiblã vɛrse bʋs n tõe n sõng yãmb tɩ y tõog n bas tagsa a woto?

•  Y zoa sã n yeel yaa: “M tagsdame tɩ m sẽn kiid n são,” bõe la y tõe n maane?

•  La m sã n da zoe n mamsa m yõorã yãkr yẽ?

• ● Togs-y neb a taabã bũmb nins sẽn namsd yãmba.

   Biiblã yetame yaa: “F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.”—Yel-bũnã 17:17.

   A võorã: D sã n wa tar tags-kɛga, d rata neb a taabã sõngre.

   Y sã n pa togs neb a taabã bũmb nins sẽn namsd yãmba, tags-kɛgã tõe n wa looga y pãnga. La y sã n togs neb a taabã bũmb nins sẽn namsd yãmbã, y sũ-sãamsã tõe n boogame, la rems y tagsa wã.

   Y sẽn tõe n mak n gese: Gom-y rẽ yell ne ned rũndã. Tõe n yɩɩ y zakã neda, wall y zoa y sẽn kɩs sɩd ne. a Y tõe n baoo sebr me n gʋls bũmb nins sẽn namsd yãmbã.

• ● Bao-y logtor sõngre.

   Biiblã yetame yaa: “Pa neb nins sẽn tar laafɩ wã n baood tɩp ye. Yaa bãad-rãmb n baood tɩpa.”—Matiye 9:12.

   A võorã: D sã n wa pa keeme, d segd n baoo logtor sõngre.

   Ned sã n wa tagsd a meng yõor yãkr yelle, tõe n wilgdame t’a bẽeda yam-ka-m-meng bãaga. Yam-ka-m-meng bãag yaa wa bãas a taabã bala. D pa segd n zoe yãnd ye. Yaa bãag b sẽn tõe n tɩpe.

   Y sẽn tõe n mak n gese: Modg-y n bao-y logtor sõngre, n da bas tɩ kaoos ye.

• ● Tẽeg-y tɩ Wẽnnaam geta yãmb yelle.

   Biiblã yetame yaa: “B pa koosd yirs a nu ligd-koeems a yi sẽn pa zem baa fʋɩ sɩda? Baasgo, Wẽnnaam pa yĩmd b baa a ye yell ye. . . . Bɩ y ra maan dabeem ye. Yãmb yõod yɩɩda yirs wʋsgo.”—Luk 12:6, 7.

   A võorã: Yãmb tara yõod wʋsg Wẽnnaam nifẽ.

   Yãmb tõe n tagsdame tɩ y yaa y yembre, la Wẽnnaam mii y sẽn namsd to-to wã. A geta yãmb yelle, baa y yamã sã n yii vɩɩmã. Yɩɩn-sõamyã 51:17 wã yetame yaa: “Mam Wẽnnaam, fo pa na n zãgs sũur sẽn maand a bãngẽ la sẽn sik a meng ye.” Wẽnnaam datame tɩ y kell n vɩɩmde, bala a nonga yãmba.

   Y sẽn tõe n mak n gese: Bao-y n bãng-y kaset sẽn be Biiblã pʋgẽ n wilgd tɩ Wẽnnaam nonga yãmba. Wala makre, y tõe n gesa Approchez-vous de Jéhovah sebrã sak 24.

• ● Pʋʋs-y Wẽnnaam.

   Biiblã yetame yaa: “Sik-y y yɩɩrã fãa n bas ne-a [Wẽnnaam], bala a geta yãmb yelle.”—1 Pɩyɛɛr 5:7.

   A võorã: Wẽnnaam datame tɩ y pelg y pʋg n togs-a bũmb ning sẽn kɩt tɩ y maand yɩɩrã.

   Wẽnnaam tõe n kõ-y-la sũur pʋgẽ bãane, la pãnga, tɩ y tõog toogo. (Filip rãmbã 4:6, 7, 13) Yaa woto la a maand n sõngd neb nins sẽn pʋʋsd-a n kot-a sõngr ne b sũur fãa wã.—Yɩɩn-sõamyã 55:22.

   Y sẽn tõe n mak n gese: Pʋʋs-y Wẽnnaam rũndã. Pʋd-y-yã a yʋʋrã sẽn yaa Zeova wã, n togs-a bũmb ning sẽn namsd yãmbã. (Yɩɩn-sõamyã 83:18) Kos-y-yã-a t’a sõng-y tɩ y tõog toogo.

• ● Bʋgs-y bõn-sõma nins Biiblã sẽn yet tɩ watame wã zugu.

   Biiblã yetame yaa: “Tõnd sẽn saagd n na n wa paam bũmb ningã yaa wa baar tõnd vɩɩmã yĩnga, sẽn vigl kãn-kãe la sẽn pa vigsdi.”—Ebre-rãmbã 6:19, notã.

   A võorã: Sũ-sãamsã tõe n tar-y lame n lengdẽ, wa sebg sẽn lengd koom-koglgo. La bõn-sõma nins Biiblã sẽn yet tɩ watame wã tõe n sõng-y lame tɩ y yals kãn-kãe.

   Y sã n tẽed bũmb nins Biiblã sẽn yet tɩ watame wã, pa saag-viid ye. Tika Wẽnnaam sẽn pʋlem t’a na n wa kɩtame tɩ namsg buud fãa sa wã zugu.—Vẽnegre 21:4.

   Y sẽn tõe n mak n gese: Karm-y Koe-noog sẽn yit Wẽnnaam nengẽ! borsiirã sak a 5 wã, tɩ y na n bãnga bũmb nins Biiblã sẽn yet tɩ watame wã n paase.

• ● Maan-y bũmb y sẽn nooge.

   Biiblã yetame yaa: “Sũ-noog yaa tɩɩm sẽn yaa sõma.”—Yel-bũnã 17:22.

   A võorã: D sã n maand bũmb nins sẽn kõt tõnd sũ-noogã, sõngdame tɩ d sũur maneg n noom ne d menga.

   Y sẽn tõe n mak n gese: Maan-y bũmb y sẽn nonge. Wala makre, kelg-y mizik sẽn na n noog y sũuri, karm-y sebr sẽn na n keng y raoodo, wall y maan bũmb a to sẽn noom yãmba. Y sã n maan bũmb n sõng y taabã, baa yaa yel-bõonese, y sũ-noogã na n paasame.—Tʋʋma 20:35.

• ● Ges-y yãmb mengã yĩns laafɩ wã yelle.

   Biiblã yetame yaa: ‘Yĩngã wɩsgr tara yõodo.’—1 Tɩmote 4:8.

   A võorã: D sã n maand yĩn-wɩsgre, n gõe sõma la d rɩt rɩ-sõma, nafd-d lame.

   Y sẽn tõe n mak n gese: Kẽn-y tʋʋll-tʋʋlle, baa yaa minit 15 bala.

• ● Tẽeg-y tɩ vɩɩmã pʋgẽ, tagsa wã la yɛlã toeemdame.

   Biiblã yetame yaa: “Yãmb . . . pa mi y vɩɩmã sẽn na n yɩ a soab beoog ye.”—Zak 4:14.

   A võorã: Yell sã n kɩt tɩ y maand yɩɩre, baa sã n wõnda yaa yell sẽn yɩɩd y pãnga, tõe n yaa wakat bilf yĩng bala.

   Baa y yɛlã sẽn yaa to-to wã sã n wõnda sẽn maand kae rũndã, tõe n toeema beoogo. Dẽnd bao-y y sẽn na n maan to-to n tõog n mao ne y zu-loeesã. (2 Korẽnt rãmbã 4:8) Yãmb yɛlã sẽn yaa to-to wã tõe n wa toeemame, la y sã n yãk y mengã yõore, sẽn maand kae ye.

   Y sẽn tõe n mak n gese: Karm-y Biiblã kibay nins sẽn gomd neb sẽn da tolg n koms raood yelle, hal n da tagsdẽ tɩ b sẽn kiid n são. Y na n yãa b vɩɩmã sẽn wa n toeem n lebg sõma to-to. Naoor wʋsgo, b vɩɩmã sẽn toeem to-to wã yaa bũmb b sẽn da pa tẽede. Ad makr a wãna.

 N-ye. Biiblã pʋgẽ, b wilgdame tɩ neb kẽer sɩd yeelame yaa: “M sẽn kiid n são.” Wẽnnaam pa ning-b taal rẽ yĩng ye. A pʋd n sõng-b lame. A tõe n maana woto me n sõng-yã.

A Eli

•  ● A Eli ra yaa ãnda? A Eli ra yaa no-rɛɛs sẽn tar raoodo. La wakat n zĩnd t’a ra koms raoodo. Zak 5:17 yetame yaa: “A Eli ra yaa ninsaal wa tõndo.”

•  ● Bõe yĩng t’a ra tagsdẽ t’a sẽn kiid n são? A Eli vɩɩmã pʋgẽ, sasa n zĩnd t’a ra tagsdẽ t’a lebga a yembre, rabeem yõk-a lame, a ra tagsdame me t’a ka yõod ye. Rẽ n so t’a kos a Zeova yaa: “Zeova, reeg-y m vɩɩmã.”—1 Rĩm-dãmbã 19:4.

•  ● Bõe n sõng-a? A Eli pelga a pʋg n togs Wẽnnaam sẽn be a sũurẽ. Wãn to la Wẽnnaam keng a raoodo? Wẽnnaam wilga a Eli t’a yell pak-a lame, la a maan bũmb sẽn wilgd a pãngã sẽn ta zĩig ninga. Sẽn paase, a sõnga a Eli t’a bas a yam t’a ket n tara yõodo, la a ges t’a paam sõangd sẽn tar minim la sẽn na n ges a yell neere.

•  ▸ Karm-y-yã a Eli kibarã: 1 Rĩm-dãmbã 19:2-18.

A Zoob

•  ● A Zoob ra yaa ãnda? A Zoob ra yaa rao sẽn tar arzɛgs wʋsgo, t’a zakã rãmb me yaa wʋsgo. A ra tũuda Wẽnnaam sɩd-sɩdã.

•  ● Bõe yĩng t’a ra tagsdẽ t’a sẽn kiid n são? A Zoob vɩɩmã tiig n toeemame. A bõna a paoongã fãa. A kambã fãa maana kaalem sabab-wẽng sasa. Bã-toaag n yõk-a. Sẽn na n baase, b rõd-a lame n pa zoe a nimbãanega, n yeel t’a sẽn paamd zu-loees nins fãa wã yaa yẽ mengã n bao. A Zoob yeelame yaa: “Mam kisa m vɩɩmã. M pa rat n le vɩɩmd ye.”—Zoob 7:16.

•  ● Bõe n sõng-a? A Zoob pʋʋsa Wẽnnaam la a gom ne a taabã. (Zoob 10:1-3) A zoa a Eliyu sẽn kʋm a nimbãanegã kenga a raoodo, la a sõng-a t’a toeem a sẽn get yɛlã to-to wã. Sẽn yɩɩd fãa, a Zoob saka Wẽnnaam saglgã la a sõngre.

•  ▸ Karm-y-yã a Zoob kibarã: Zoob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

A Moyiiz

•  ● A Moyiiz ra yaa ãnda? A Moyiiz yɩɩ ned sẽn lʋɩ pĩnd wẽndẽ Israyɛll nin-buiidã taoore, la no-rɛɛs sẽn maan sɩd ne Wẽnnaam.

•  ● Bõe yĩng t’a ra tagsdẽ t’a sẽn kiid n são? A Moyiiz ra tara tʋʋm wʋsgo, nin-buiidã ra wɩt-a-la wakat fãa, a ra mi n yaame me. Rẽ n so t’a yeel Wẽnnaam yaa: “Bɩ m bõos tɩ f kʋ maam mas-masã.”—Sõdbo 11:11, 15.

•  ● Bõe n sõng-a? A Moyiiz togsa Wẽnnaam sẽn be a sũurẽ. Wẽnnaam sõnga a Moyiiz n boog a tʋʋmã, tɩ rẽ kɩt t’a yɩɩrã booge.

•  ▸ Karm-y-yã a Moyiiz kibarã: Sõdbo 11:4-6, 10-17.