B boonda “vɩɩm sebrã” me tɩ “vɩɩm seb-pindmã,” bɩ “tẽegr sebre.” Yaa neb nins sẽn na n wa paam vɩɩm sẽn kõn sa wã yʋy n be be. (Vẽnegre 3:5; 20:12, MN; Malasɩ 3:16, Sebr Sõngo) Wẽnnaam gʋlsda neb nins sẽn nong yẽ la b sakd yẽ wã yʋy be.—Zã 3:16; 1 Zã 5:3.

 Wẽnnaam tẽra neb nins sẽn kell n sak yẽ wã yʋy, tɩ yaa wa a gʋlsda b yʋyã sebr pʋgẽ, “hal dũni naaneg wẽndẽ.” (Vẽnegre 17:8) Wõnda yaa wẽn-sakd a Abɛll n yɩ pipi n paam tɩ b gʋls a yʋʋrã vɩɩm sebrã pʋgẽ. (Ebre-rãmbã 11:4) Pa yʋy Wẽnnaam sẽn gʋlsd woto bal ye. Vɩɩm sebrã yaa kaset t’a Zeova nonga “neb nins sẽn yaa bãmb dẽndã.”—2 Tɩmote 2:19; 1 Zã 4:8.

B tõe n yẽesa ned yʋʋr “vɩɩm sebrã” pʋgẽ bɩ?

 N-ye. Wẽnnaam goma pĩnd wẽndẽ Israyɛll neb nins sẽn kɩɩsã yelle, n yeele: “Yaa ned ning sẽn beeg maamã yʋʋr la m na n yẽes m sebrã pʋga.” (Yikri 32:33) La d sã n kell n yɩ sakdba, d yʋyã na n paa “vɩɩm seb-pindmã” pʋgẽ.—Vẽnegre 20:12.