Beoog sẽn vẽeg fãa d wʋmda kiba-beed ne televiziõ wã maasem, telefõn-dãmbã, tablɛt-dãmb la ordinatɛɛr-dãmbã maasem. Naoor wʋsgo d yãta video-rãmb sẽn wilgd yɛlã sẽn yɩ to-to wã ball-balle.

 Kambã geta bõn-kãense.

 Wãn to la y tõe n sõng y kambã tɩ kiba-beedã ra yɛɛs-b wʋsgo?

•  Wãn to la kiba-beedã namsd kambã?

•  Bõe la y tõe n maan n sõng y kambã tɩ kiba-beedã ra sãam b sũur wʋsgo?

•  Yel-beed sã n maan yãmb biig nifẽ, wãn to la y tõe n sõng-a?

•   Kamb wʋsg sã n get kibayã sãamda b sũyã. Kamb kẽer tõeeme n pa wilgd bũmb nins sẽn be b sũurẽ wã, la kiba-beedã b sẽn wʋmdã tõe n namsd-b-la wʋsgo. a B roagdbã sã n maand yɩɩr wʋsgo, tõe n kɩtame tɩ bãmb me yɩɩrã paase.

•   Kambã tõeeme n pa wʋm bũmb ning b sẽn yãt kibayã pʋsẽ wã võor sõma ye. Wala makre, kamb kẽer tõe n tagsdame tɩ bũmb ning sẽn maanã na n paama bãmb zakã rãmb me. Yel-beed sã n maan tɩ b yiisd-a n yɩlemdẽ tɩ kom-bõonegã getẽ, b tõe n wa tagsdame tɩ yel-beedã maand n yɩlemdame.

•   Yellã wẽnem tõeeme n pa ta b sẽn wilgdã, la kambã pa mi rẽ ye. Kambã tõeeme n pa miẽ tɩ kiba-kɩtbã siglsã yaa ligd-baoodba, tɩ neb wʋsg sã n get b kibayã bɩ kẽesd-b yõod ye. Rẽ n so tɩ b mi n zẽn yell ninga, n dat tɩ nebã yɛɛs n ket n getẽ sẽn na yɩl n wʋm a võore.

•   Ra bas-y tɩ y kambã ges kiba-beedã wʋsg ye. Woto pa rat n yeel tɩ y kambã pa segd n bãng bũmb nins sẽn maand dũniyã zugã ye. La b sã n getẽ wall b kelgd kiba-beed b sẽn yiisd n yɩlemdẽ, pa sõma ne-b ye.

   “Wakat ninga maam ne m sɩdã mi n gomda bũmb sẽn maan yell ball-baalle, n yĩm tɩ rẽ namsda tõnd kambã sẽn mi n wʋmdã wʋsgo.”—A Maria.

   Biiblã saglga: “Yɩɩr sãamda sũur hal wʋsgo.”—Yel-bũnã 12:25.

•   Maag-y y yĩng n kelg y biigã, la y leok ne bʋgsem. Sã n yaa toog ne y biigã t’a gom bũmb ning sẽn maanã yelle, y tõe n yeel-a lame t’a maan desẽ n bilg rẽ. Y sã n na n gom ne y biigã rẽ wɛɛngẽ, bɩ y tũnug ne gom-biis a sẽn na n wʋm b võor nana-nana, la y ra gom ne-a bũmb kẽer sẽn pa tɩlɛ t’a bãng yellã wɛɛngẽ ye.

   “Tõnd sã n mi n zĩnd n maag d yĩng n kelg d bi-puglã, sõngd-a-la wʋsgo. Rẽ n são d sẽn na n yeel-a bal yaa: ‘Yɛlã yaa woto masã. D pa tar b tɩɩm ye.’”—A Sarahi.

   Biiblã saglga: “Ned buud fãa segd n wɩnga ne kelgre, la a maag ne goama.”—Zak 1:19.

•   Sõng-y y biigã t’a bãng tɩ bũmb ning sẽn maanã tõeeme n pa tolg n yaa wẽng wa b sẽn wilgdã ye. Wala makre, bi-bees sã n yõk neda, kiba-kɩtbã sẽn gomd rẽ yell to-to wã tõe n kɩtame tɩ wõnd yaa bũmb sẽn wae. Wilg-y y kambã bũmb toor-toor y sẽn maan sẽn na yɩl n kogl-ba. Tẽeg-y me tɩ kiba-kɩtbã sã n gomd bũmb sẽn maan yelle, yaa bũmbã sẽn pa wae n maandẽ yĩnga.

   “Sõng-y y kambã tɩ b tõog n mao ne bũmb ning sẽn namsd-bã. Naoor wʋsgo, yaa b sẽn tagsd yellã zug to-to wã n namsd-ba. Rẽnd d sã n sõng d kambã tɩ b tagsd bõn-sõma yelle, tõe n sõng-b-la wʋsgo”—A Lourdes.

   Biiblã saglga: “Yam soab sẽn tagsd n yaool n gomã yĩnga, n kɩtd tɩ b tẽed a goamã.”—Yel-bũnã 16:23.