Yɩɩn-sõamyã sebre 105:1-45
-
A Zeova maanda sɩd ne a nin-buiidã
105 Pʋʋs-y-yã a Zeova barka!+ Bool-y-yã a yʋʋrã!Kɩt-y tɩ b bãng a tʋʋmã buud toɛy-toɛyã sʋka!+
2 Yɩɩl-y yẽ yĩnga. Yɩɩl-y n pẽg-y-yã-a.Bʋgs-y-yã a tʋʋm-kãsemsã fãa zutu.*+
3 Pẽg-y y mens a yʋʋrã sẽn yaa sõngã yĩnga.+
Bɩ sẽn baood-b a Zeova wã kɩdem sũ-noogo.+
4 Bao-y-yã a Zeova,+ la y bao a pãngã.
Bao-y-yã a nengã wakat fãa.
5 Tẽeg-y tʋʋm-kãsems nins a sẽn tʋmã yelle,a yel-soalmã la a sẽn kao bʋʋd to-to wã yelle,+
6 yãmb sẽn yaa a tʋm-tʋmd a Abrahaam+ yagense,yãmb a Zakoob kom-dibli wã sẽn yaa neb nins a sẽn yãkã.+
7 Yẽ yaa tõnd Wẽnnaam a Zeova.+
A bʋ-kaoor toor-toorã tata dũniyã tɛk fãa.+
8 A tẽegda a kaoolã yell wakat fãa,+pʋleng ning a sẽn pʋlmã* zãmaan tusr yĩnga,+
9 rat n yeel tɩ kaool ning a sẽn maan ne a Abrahaamã,+la wẽeneg ning a sẽn wẽen a Izaakã.+
10 A kɩtame tɩ wẽen-kãng lebg noor a Zakoob yĩnga,la kaool sẽn paad wakat fãa a Israyɛll yĩnga.
11 A yeelame: “Mam na n kõo yãmb Kanaã soolmã,+tɩ yɩ pʋɩɩr b sẽn kõ yãmba.”+
12 Wakat kãng tɩ b sõorã paoodame.+N-ye, b sõorã sɩd ra paooda wʋsgo, tɩ b ra yaa sãamb soolmã pʋgẽ+ me.
13 Bãmb da yita buud a ye pʋgẽ n kẽng buud a to pʋgẽ,la rĩung a ye pʋgẽ n kẽng buud a to pʋgẽ.+
14 Wẽnnaam pa sak tɩ ned baa a ye nams-b ye.+La yẽ zaba rĩm-dãmb bãmb yĩnga,+
15 n yeele: “Ra sɩɩs-y mam sẽn yãk* b rãmbã ye.Ra maan-y m no-rɛɛsdbã wẽng ye.”+
16 A kɩtame tɩ kom kẽ soolmã.+A kɩtame tɩ b pa le paamd rɩɩb* ye.
17 A tʋma rao t’a reng b taoore.Yaa ned ning b sẽn koos yembdã, rat n yeel t’a Zozɛfe.+
18 B sẽba* a naoã ne bãense.+B balga a yublã kutu.*
19 Hal n tãag wakat ning a Zeova gomdã sẽn pidsã,+yaa a gomdã n da yɩlgd-a.
20 Rĩmã tʋmame tɩ b tɩ yiis-a.+Buud toɛy-toɛyã naab kõ-a-la lohorem.
21 A kɩtame t’a lebg a zakã taoor soaba,n get a paoongã fãa yelle,+
22 sẽn na yɩl t’a soog* a nanambsã wa a sẽn date,*la a zãms a kãsem-dãmbã yam.+
23 Rẽ poore, a Israyɛll waa Ezɩpti.+A Zakoob zĩnda sãand a Kam soolmẽ wã.
24 Wẽnnaam kɩtame t’a nin-buiidã fɩɩg n lebg wʋsgo.+A kɩtame tɩ b paam pãng n yɩɩg b zabd-n-taasã.+
25 A basame t’a nin-buiidã zabd-n-taasã yam toeem tɩ b kisg-ba,n sed taab n na n zab ne a tʋm-tʋmdbã.+
26 A tʋma a tʋm-tʋmd a Moyiiz+ne a Aarõ+ a sẽn yãkã.
27 B maana Wẽnnaam bãnã bãmb sʋka.B maana a yel-soalmã a Kam soolmẽ wã.+
28 Wẽnnaam tʋma lika, tɩ soolmã lebg lika.+B* pa kɩɩs a goamã ye.
29 A toeema b koomã tɩ lebg zɩɩm,n kʋ b zĩmã.+
30 B soolmã pida ne lomse,+baa rĩmã ro-gãasẽ.
31 Wẽnnaam kɩtame tɩ kɛɛda wa pid b soolmã fãa,n paas rũmpigli.+
32 A kɩtame tɩ b sa-koomã lebg sapɩlma,la a kɩt tɩ sa-yãgb* zĩnd b soolmẽ wã.+
33 A sãama b viyn tɩɩsã ne b kankamsã,la a kao b soolmã tɩɩs a taabã.
34 A yeelame tɩ sʋy pid soolmã.Yaa sʋy sẽn pa tõe n yɩge, tɩ b sõorã yaa ka tɛka.+
35 B rɩɩ soolmã moodã la a tɩɩsã fãa,la b rɩ tẽngã bõn-koaadlã biisi.
36 Rẽ poore, Wẽnnaam kʋʋ b soolmã bi-rẽeng fãa,+rat n yeel tɩ b pipi biig fãa.*
37 A yiisa a nin-buiidã soolmã pʋgẽ ne wanzuri la sãnem,+la a buudã sʋka, ned baa a ye pa lak n lʋɩ ye.
38 B sẽn wa n loogdẽ wã, Ezɩpt nebã kɩdma sũ-noogo.Bala Israyɛll nebã* rabeem da tar-b lame.+
39 A yɛdga sawadg n lud-ba,+
la a kõ bugum sẽn na yɩl n vẽneg-b yʋngo.+
40 Nin-buiidã kosa nemdo, t’a kõ-b kodense.+A ra kõt-b-la rɩɩb sẽn yit saasẽ wakat fãa tɩ sekd-ba.+
41 A wesga pĩig kugr tɩ koom yi.+Koomã zoee we-rasempʋɩɩgẽ wã wa kʋɩlga.+
42 Bala a tẽega pʋleng ning sẽn yaa sõngã a sẽn da pʋlem a tʋm-tʋmd a Abrahaamã yelle.+
43 Dẽ, a yiisa a nin-buiidã ne sũ-noogo.+A yiisa neb nins a sẽn yãkã ne sũ-noog kaasgo.
44 A kõo nin-buiidã bu-zẽms soolem.+B reega bũmb nins buud a taab neb sẽn tʋm wʋsg n paamã n sooge.+
45 Yaa sẽn na yɩl tɩ b tũ Wẽnnaam noyã,+la b sak a tõodã.
Pẽg-y-yã a Zah!*
Vẽnegr toor-toore
^ Pa rẽ bɩ, “Gom-y-yã a tʋʋm-kãsemsã fãa yelle.”
^ Ebre, “gomd ning a sẽn togsã.”
^ Ebre, “zae.” Ges-y gom-biis võor bilgrã zĩigẽ.
^ Ebre, “A kaoo burã raad fãa.” Tõe tɩ yaa raad nins b sẽn da tar n tuiid bur n bĩngdẽ wã.
^ Ebre, “B namsa.”
^ Bɩ, “A sɩɩgã kẽe kutẽ.”
^ Ebre, “sẽb.”
^ Bɩ, “wa sẽn noom a sɩɩgã.”
^ Tõe tɩ yaa a Moyiiz ne a Aarõ.
^ Bɩ, “bug-witim.”
^ Bɩ, “bãmb pãngã sɩngre.”
^ Ebre, “bãmb.”
^ Bɩ, “Aleluya!” “Yah” bɩ “Zah” wã yaa a Zeova yʋʋrã bool-koɛɛga.
