SEBRÃ GOM-ZUG SÕSGÃ | PƲ-PEELEM BEE YÕOD BƖ?
Pʋ-peelem ket n tara yõod bɩ?
A Hitoshi sẽn be Zapõ wã ra geta biru a yembr ligd yelle. Daar a yembre, yẽ ne a tʋʋmdã taoor soab sẽn wa n geend ligdi, a taoor soabã yeel-a lame t’a ra segd n maana zãmb tɩ bãmb paam yõodo. A Hitoshi leokame tɩ yẽ sũur-kasetã pa kõt-a sor t’a tʋm pʋ-lik ye. Tʋʋmdã taoor soab yeel-a lame t’a sã n pa sak yẽ raabã, a na n yiis-a-la tʋʋmdẽ wã, la a sɩd wa n yiis-a lame.
Kaoosa kiis t’a Hitoshi baood tʋʋm n pa paamdẽ, hal tɩ sãam a sũuri. Daar a yembre, a sẽn wa n sõsd ne ned sẽn dat n dɩk-a tʋʋma, a yeelame tɩ yẽ pa na n sak n tʋm pʋ-lik ye. Tʋʋmdã soab leok-a lame t’a sẽn get yɛlã to-to wã pa zems ye. A Hitoshi roagdbã la a zo-rãmb sagl-a lame t’a ra tol n bas a pʋ-peelmã, la a wa n maanda sãmbse. A yeela woto: “Mam da sokda m meng m pʋ-peelmã sã n nafd-m lame.”
A Hitoshi kibarã tẽegd-d lame tɩ pa nebã fãa n nong pʋ-peelem ye. Sɩd me, neb kẽer tõe n tagsdame meng tɩ pʋ-peelem ka yõodo, sẽn yɩɩd fãa, afɛɛr pʋgẽ. Afirikdisiid pag a yembr yeela woto: “Mam tʋmd-n-taasã wʋsg yaa pʋ-lik rãmba. Woto kɩtame tɩ b mi n pẽdgd maam wʋsg n dat tɩ m dɩk b naoore.”
Rũndã-rũndã, pʋ-likã buk a ye sẽn wae yaa ziri wã. Wala makre, yʋʋm a wãn sẽn looge, Etazĩni inivɛrsite karen-saamb a Robert Feldman yeelame tɩ kom-kãsems koabg zugu, bãmb pis-yoob n pa tõe n sõs minit 10 n pa yag ziri. A paasame tɩ rẽ linga bãmb hal wʋsgo, la tɩ bãmb da pa tagsd tɩ neb wʋsg nonga ziri yagb ye. Sɩd me, neb wʋsg yetame tɩ b kisa ziri, la bãmb mensã yaool n yagda.
Bõe yĩng tɩ zɩlem-beedo, wagdem la pʋ-likã nens toɛy-toɛy wae rũndã-rũndã? Wãn to la pʋ-likã namsd nebã fãa la bala? Sẽn yɩɩd fãa, bõe la d tõe n maan n da wa sak n tʋm pʋ-lika?
