Rẽ yĩnga d tõe n kɩsa sɩd tɩ Wẽnnaam pʋlemsã na n pidsame bɩ? A Zeezi ra kɩsa sɩd ne rẽ. A sẽn da zãmsd nebã bũmb ninsã kɩtame tɩ bãmb me ra tõe n bas b yam ne rẽ. A sẽn wa n sõsd ne nebã tãngã zugã, a rɩka makr a ye, tɩ be Matye 5:18. A yeelame: “Sɩd-sɩda, mam yeta yãmb tɩ baa saasã la tẽngã sã n looge, Tõogã gʋls-bil ning sẽn pa ta a taabã, wall a gʋls-bi-pɛdg baa ye kõn sãame, tɩ bõn-kãensã fãa pa pids ye.” (MN)

Ebre wã gʋls-bil ning sẽn pa ta a taabã yaa י (yod). Yaa tetragrammã pipi gʋls-bilã. * Tetragrammã yaa Wẽnnaam yʋ-peellã sẽn yaa Zeova wã ne ebre. Yaa gʋls-biis a naase. Gʋlsdbã la fariziyẽ-rãmbã nifẽ, Wẽnnaam Tõogã goam la a gʋls-biisã fãa tara yõod wʋsgo. B ra getame meng tɩ Tõogã “gʋls-bi-pɛdg” fãa tara yõod wʋsgo.

A Zeezi yeelame tɩ saasã la tẽngã tõe n loogame, la tɩ Tõogã yel-bõoneg baa a ye pa tõe n pa pids ye. Wẽnnaam Gomdã wilgda vẽeneg tɩ saasã la tẽngã na n paa wakat fãa yĩnga. (Yɩɩn-sõamyã 78:69) Rẽnd a Zeezi gomdã yaa sẽn na n wilg tɩ Tõogã yel-bõoneg baa a ye pa na n pa n pa pids ye.

La a Zeova getame tɩ yel-bõonegã me tara yõod bɩ? N-ye. Ad makr sẽn wilgd rẽ: A Zeova ra yeela Israyɛll nebã tɩ b sã n na n wãb Pakã nemdã, b pa segd n kaoog bɩ n wõrg kõbr baa a yembr ye. (Yikri 12:46) Wõnda yaa yel-bila. La rẽ yĩnga, Israyɛll nebã wʋma b sẽn da pa tog n kaoog bɩ n wõrg kõbr baa a yembrã võor bɩ? Wõnda b pa wʋm a võor ye. La a Zeova ra miime tɩ yaa bãngr-gomd sẽn wilgd tɩ b sã n wa na n ka Mesi wã ra-lukã zugu, a kõbr baa a ye pa na n kaoog ye. (Yɩɩn-sõamyã 34:21; Zã 19:31-33, 36)

A Zeezi gomdã sõngda tõnd tɩ d bãng bõe? Tõnd me tõe n kɩsa sɩd zãng-zãng tɩ Wẽnnaam a Zeova pʋlemsã fãa na n pidsame, baa yel-bõonegã menga. Ad ebre wã gʋls-bilã sɩd kɩtame tɩ d tar pɛl-kɛgenga!